Kpokpaa nɔ Kpee He Wiemɔ Gbɛjianɔtoo Hee

Bɔ ni atsɔɔ gbeyeishemɔ mli aha lɛ ekome ji “gbeyeishemɔ ni mli kwɔ loo woo, titri lɛ kɛha Nyɔŋmɔ.” Enɛ tsɔɔ gbeyeishemɔ kpakpa ni awieɔ he yɛ Ŋmalɛi lɛ amli akɛ “nilee shishijee” lɛ. (Lala 111:10) Nɔ ni tamɔɔɔ nakai lɛ, gbeyeishemɔ kroko ko yeɔ Satan jeŋ ni ebɔle wɔhe lɛ nɔ. Te wɔɔfee tɛŋŋ wɔkwa nakai henumɔ ni ehiii lɛ yɛ be mli ni wɔnáa gbeyeishemɔ ni woo yɔɔ mli wɔhaa Yehowa lɛ? Kpokpaa nɔ kpee he wiemɔ gbɛjianɔtoo hee kɛha 2002 sɔɔmɔ afi lɛ haa nɛkɛ sanebimɔ nɛɛ hetoo. Saneyitso lɛ ji “Nyɛshea Nyɔŋmɔ Gbeyei ni Nyɛkɛ Anunyam Ahaa Lɛ.” (Kpoj. 14:7) Wɔbaanu gbɛ̀i srɔtoi babaoo ni Yehowa gbeyeishemɔ he baa sɛɛnamɔ kɛhaa wɔ akɛ aŋkroaŋkroi, kɛ ákɛ gbɛjianɔtoo lɛ shishi.

Eyɛ mli akɛ gbeyeishemɔ baanyɛ atsɔɔ yeyeeyefeemɔ loo ekãa ni sɛɛ efo, kɛ bɔ ni asumɔɔɔ ni akɛ shihilɛi ni mli wawai kpeɔ moŋ, shi Biblia lɛ kɛɔ akɛ: “Ajɔɔ mɔ fɛɛ mɔ ni sheɔ Yehowa gbeyei.” (Lala 128:1) Kpee he gbɛjianɔtoo lɛ baatsɔɔ wɔ bɔ ni wɔɔfee wɔdamɔ anɔkwa jamɔ he kaai anaa yɛ omanyeyeli mli. Wɔbaana bɔ ni wɔɔfee wɔye wɔbua mɛi heei ni amɛná Nyɔŋmɔ gbeyeishemɔ kpakpa, ni baakanya amɛ diɛŋtsɛ ni amɛsumɔ akɛ amɛaasɔmɔ lɛ kɛ amɛtsui, susuma, jwɛŋmɔ, kɛ hewalɛ muu lɛ fɛɛ. (Mar. 12:30) Klɛŋklɛŋ gbi lɛ baa naagbee kɛ kpokpaa wulu nɔkwɛlɔ lɛ wiemɔ ni ji, “Tsi Obɛŋkɛ Mɛi ni Osumɔɔ Amɛ lɛ Ahe Gbagbalii.” Ebaatsɔɔ wɔ bɔ ni wɔɔfee ni wɔhiɛ ahi wɔhe nɔ yɛ mɔdɛŋ ni Abonsam bɔɔ koni egbala wɔ kɛjɛ Yehowa, wɔweku, kɛ wɔ Kristofoi anyɛmimɛi lɛ ahe lɛ mli.

“She Yehowa Gbeyei, Jeee Gbɔmɛi” ji wiemɔi ejwɛ ni ahaa kɛtsaraa nɔ lɛ yitso yɛ gbi ni ji enyɔ lɛ nɔ. Ebaatsɔɔ nɔ hewɔ kɛ bɔ ni esa akɛ wɔye gbeyeishemɔ fɛɛ ni tsiɔ wɔ gbɛ ni haaa wɔnyɛ wɔtsu wɔsɔɔmɔ lɛ wɔgbe naa, loo wɔhiɛ wɔ emuuyeli kɛ henilee kpakpa mli yɛ skul kɛ nitsumɔhe lɛ nɔ kunim lɛ mli. Maŋshiɛmɔ ni ji “She Nyɔŋmɔ Gbeyei ni Oye Ekitai lɛ Anɔ” lɛ damɔ saji srɔtoi ni tsara nɔ ba ni atsɔɔ mli yɛ Kpojiemɔ yitso 14 lɛ nɔ. Kpokpaa nɔ kpee lɛ baaba naagbee kɛ hewalɛwoo gbɛtsɔɔmɔ akɛ “Yaa Nɔ Onyiɛ Yɛ Yehowa Gbeyeishemɔ Mli.”

Teokrase Sɔɔmɔ Skul, Sɔɔmɔ Kpee ni akɛfeɔ nɔkwɛmɔnɔ, baptisimɔ wiemɔ, kɛ Buu-Mɔɔ Nikasemɔ lɛ naamuamɔ lɛ fɛɛ ji wiemɔ gbɛjianɔtoo lɛ mli otii krokomɛi ni fata he ni osumɔŋ ni eŋmɛɛ bo. Fɔ̃ɔ nine otsɛ mɛi ni okɛ amɛ kaseɔ Biblia lɛ ni amɛkɛ bo aya. Mɔ fɛɛ mɔ ni sumɔɔ ni abaptisi lɛ lɛ akɛɛ onukpai asɛinɔtalɔ lɛ amrɔ nɔŋŋ. Wɔ fɛɛ wɔmiisumɔ ni wɔjie gbeyeishemɔ kpakpa ni wɔyɔɔ kɛha Yehowa lɛ kpo, ni wɔkɛ anunyam aha lɛ kɛtsɔ gbɛ ni wɔŋmɛŋ ni wiemɔ he gbɛjianɔtoo ni ekaaa nɛɛ eko aŋmɛɛ wɔ lɛ nɔ!