Oji “Nikwɛmɔnii”!
1 Bɔfo Paulo ŋma akɛ: “Akɛ wɔ efee nikwɛmɔnii aha je lɛ kɛ ŋwɛibɔfoi kɛ gbɔmɛi.” (1 Kor. 4:9) Mɛni enɛ tsɔɔ, ni te esa akɛ esa wɔhe eha tɛŋŋ ŋmɛnɛ yɛ wɔ sɔɔmɔ nitsumɔ lɛ mli lɛ?
2 Kɛha Korintonyo lɛ, wiemɔ “nikwɛmɔnii” lɛ haa akaiɔ Roma shwɛmɔhe ni ashwieɔ lá shi yɛ mli lɛ mli nifeemɔ ni baa enaagbee yɛ be mli ni ato gbɔmɛi ni abu amɛ gbele fɔ lɛ anaa yɛ mɛi akpei babaoo ahiɛ dani agbeɔ amɛ yɛ yiwalɛ gbɛ nɔ lɛ. Nakai nɔŋŋ mɛi babaoo—gbɔmɛi kɛ ŋwɛibɔfoi—na piŋmɔi ni akɛba klɛŋklɛŋ afii oha lɛ mli Kristofoi lɛ anɔ yɛ Maŋtsɛyeli lɛ he odase ni amɛye lɛ hewɔ. (Heb. 10:32, 33) Amɛ emuuyeli mlihiɛmɔ shihilɛ lɛ ná mɛi babaoo ni na lɛ anɔ hewalɛ, tamɔ bɔ ni wɔ tsuishiŋmɛɛ lɛ feɔ yɛ ŋmɛnɛŋmɛnɛ beaŋ lɛ. Namɛi wɔji nikwɛmɔnii kɛha?
3 Yɛ Je lɛ kɛ Gbɔmɛi Ahiɛ: Bei komɛi lɛ, adafitswaa woji ŋmalaa saji ni kɔɔ Yehowa webii anitsumɔi ahe. Yɛ be mli ni wɔhiɛ sɔɔ adafitswaa ni ja ni hiɛaŋkwɛmɔ bɛ mli yɛ bɔ ni wɔtsuɔ wɔnitsumɔ lɛ wɔhaa lɛ he lɛ, wɔkpaa gbɛ hu akɛ mɛi ni jieɔ mɛi ajwɛŋmɔ kɛjɛɔ wɔnitsumɔ lɛ nɔ lɛ baagbɛ wɔhe amale wiemɔi ni ejaaa amɛshwã yɛ be kɛ bei amli. Shi kɛlɛ, esa akɛ wɔya nɔ wɔjie wɔhe kpo akɛ Nyɔŋmɔ sɔɔlɔi yɛ ‘wɔhe wiemɔ fɔŋ kɛ wɔhe wiemɔ kpakpa mli.’ (2 Kor. 6:4, 8) Ebafeɔ faŋŋ kɛha mɛi ni yɔɔ jalɛ tsuii lɛ akɛ wɔji Yesu Kristo anɔkwa kaselɔi.
4 Yɛ Ŋwɛibɔfoi Ahiɛ: Mumɔŋ bɔɔnii hu kwɛɔ wɔ. Abonsam kɛ edaimonioi lɛ kwɛɔ—shi kɛ ‘girimɔ ni naa wa’ ni amɛbɔɔ mɔdɛŋ ni amɛtsĩ ‘mɛi ni hiɛ Yesu odase nitsumɔ’ lɛ naa. (Kpoj. 12:9, 12, 17) Nyɔŋmɔ bɔfoi anɔkwafoi lɛ kwɛɔ ni amɛnáa miishɛɛ kɛji eshafeelɔ kome po tsake etsui lɛ. (Luka 15:10) Esa akɛ ewo wɔ hewalɛ koni wɔle akɛ ŋwɛibɔfoi lɛ naa wɔsɔɔmɔ nitsumɔ lɛ akɛ nitsumɔ ni he hiaa fe fɛɛ, ní sɛɛnamɔ yɔɔ he ní atsuɔ yɛ shikpɔŋ lɛ nɔ ŋmɛnɛ!—Kpoj. 14:6, 7.
5 Kɛji okɛ shitee-kɛ-woo kpe aloo osusuɔ akɛ osɔɔmɔ nitsumɔ lɛ wooo yibii lɛ, kaimɔ akɛ jeŋ muu fɛɛ miikwɛ bo. Otsui shi ni oŋmɛɔ yɛ anɔkwayeli mli lɛ kɛɔ babaoo yɛ onɔkwayeli lɛ he. Yɛ naagbee lɛ, ‘ohemɔkɛyeli he ta kpakpa’ lɛ baaye abua bo koni ‘omɔ naanɔ wala lɛ mli kpɛŋŋ.’—1 Tim. 6:12.