Te Kristofoi Ahenaabuamɔ He Hiaa Ha Tɛŋŋ?
1 “Mɔ ko ehiii shi mikome ŋfa.” Nakai wiemɔ lɛ ni afii ohai 17 lɛ mli lalafolɔ ko wie lɛ gbalaa jwɛŋmɔ kɛyaa nɔ ni Biblia lɛ kɛɔ ni kɔɔ adesa shihilɛ mli hiamɔ nii titri ko he lɛ nɔ—henaabuamɔ. (Abɛi 18:1) Wɔ Kristofoi anaanyobɔɔ lɛ tsuɔ hiamɔ nii nɛɛ he nii. Yɛ mɛɛ gbɛ̀i ni he yɔɔ sɛɛnamɔ nɔ?
2 Yɛ Sɔɔmɔ Nitsumɔ lɛ Mli: Sɛɛnamɔi ni he hiaa fe fɛɛ lɛ ateŋ ekome ji bɔ ni wɔ nyɛmimɛi lɛ woɔ wɔ hewalɛ ni amɛyeɔ amɛbua wɔ yɛ sɔɔmɔ nitsumɔ lɛ mli lɛ. Yesu tsu ekaselɔi lɛ “enyɔnyɔɔnyɔ” koni amɛyashiɛ. (Mar. 6:7; Luka 10:1) Yɛ gbɛtsɔɔmɔ nɛɛ kɛ nitsumɔ mli lɛ, kɛ́ wɔkɛ mɛi krokomɛi tsu nii yɛ shiɛmɔ nitsumɔ lɛ mli lɛ, wɔnáa anɔkwale ni yɔɔ Jajelɔ 4:9, 10 lɛ mli niiashikpamɔ. Beni wɔfeɔ ekome kɛtsuɔ wɔsɔɔmɔ nitsumɔ lɛ he nii lɛ, hemɔkɛyeli, toiboo, kɛ suɔmɔ ni wɔyɔɔ kɛha wɔ nanemɛi woɔ wɔ hewalɛ ni ekanyaa ekãa ni wɔyɔɔ lɛ.
3 Eyeɔ Ebuaa Wɔ Diɛŋtsɛ: Wɔnyɛmifeemɔ lɛ hu ji hewalɛwoo kɛ gbɛtsɔɔmɔ jɛɛhe ni haa wɔdamɔɔ nɔnyɛɛi anaa ni wɔyeɔ kaai anɔ. Kristofoi ni wɔkɛ amɛ bɔɔ lɛ, baatsɛ wɔjwɛŋmɔ yisɛɛ kɛya ŋmalɛi ni kɔɔ wɔhiamɔ nii ahe lɛ nɔ. Ekolɛ amɛbaasɔle amɛha wɔ po, taakɛ bɔ ni wɔsɔleɔ wɔhaa amɛ lɛ. (2 Kor. 1:11) Ni yɛ anɔkwale mli lɛ, amɛ nɔkwɛmɔnɔ kpakpa lɛ kanyaa wɔ yɛ nitsumɔi kpakpai amli ni ewoɔ wɔ hewalɛ.
4 Yɛ Kpeei lɛ Ashishi: Wɔnáa jɔɔmɔi ni jɛɔ Kristofoi ahenaabuamɔ mli baa lɛ mli ŋɔɔmɔ kɛji akɛ wɔtee asafoŋ kpeei daa. (Heb. 10:24, 25) Mumɔŋ niyenii babaoo yɛ gbɛjianɔtoo lɛ mli, ni kpeei lɛ ni wɔyaa lɛ haa wɔbɛŋkɛɔ wɔnanemɛi heyelilɔi lɛ ahe kpaakpa. Nɛkɛ henaabuamɔi nɛɛ haa wɔnáa hegbɛ wɔboɔ wɔnyɛmimɛi hii kɛ yei lɛ atoi, yɛ be mli ni amɛjajeɔ amɛhemɔkɛyeli lɛ yɛ wiemɔ kpoku lɛ nɔ aloo kɛjɛ toibolɔi lɛ ateŋ lɛ. (Rom. 1:12) Wɔnaanyobɔɔ lɛ mli waa beni wɔkɛ wɔhe gbaa sane dani ajeɔ kpeei lɛ ashishi kɛ beni akpa kpeei lɛ. Bei ni tamɔ nɛkɛ haa wɔnáa hegbɛi ni wɔkɛjajeɔ wɔ diɛŋtsɛ wɔhemɔkɛyeli lɛ mli niiahikpamɔi wɔtsɔɔ. Enáa wɔsui anɔ hewalɛ kpakpa kɛ wɔkɛ mɛi ni sumɔɔ Yehowa, e-Wiemɔ lɛ, enitsumɔ lɛ, kɛ ewebii lɛ bɔ yɛ miishɛɛ mli lɛ.—Fil. 2:1, 2.
5 Wɔ nanemɛi Kristofoi lɛ anaanyobɔɔ he miihia wɔ. Gbɛ ni nɔ etsa ni kɛ mɔ yaa naanɔ wala mli lɛ nɔ nyiɛmɔ baawa waa kɛji amɛyelikɛbuamɔ bɛ mli. Kɛlɛ, yɛ amɛsuɔmɔ kɛ hewalɛwoo lɛ hewɔ lɛ, wɔbaanyɛ wɔya nɔ kɛbote Yehowa jalɛ jeŋ hee lɛ mli.—Mat. 7:14.