Ani Eji Gbɛtsii Nii Kɛha Shiɛmɔ?
1 Gbɔmɛi babaoo bɛ dekã yɛ amɛshihilɛi amli. Yehowa Odasefoi fata mɛi ni bɛ dekã kwraa lɛ ahe—amɛkaseɔ Nyɔŋmɔ Wiemɔ lɛ, amɛyaa asafoŋ kpeei, ni amɛkɛ amɛhe woɔ shiɛmɔ nitsumɔ lɛ mli. Kɛfata he lɛ, wɔbɛ dekã kɛ wɔ heloo gbɛfaŋ nitsumɔ, shia nitsumɔ loo skul nikasemɔ, kɛ gbɛnaa nii krokomɛi babaoo, ní fɛɛ heɔ be lɛ ahe nitsumɔ. Enɛ wa waa kɛha weku yitsei pii.
2 Yɛ shika helɛtemɔ mli shihilɛi ni ehiii ni yɔɔ hei srɔtoi hewɔ lɛ, ekolɛ esa akɛ weku yitsei kɛ ŋmɛlɛtswai babaoo atsu nii waa koni amɛkɛná nɔ ni amɛkɛbaakwɛ amɛhe. Kɛji akɛ heloo gbɛfaŋ nitsumɔ ni wa hé amɛbe kɛ hewalɛ babaoo lɛ, be fioo ko pɛ shwɛɔ kɛhaa shiɛmɔ nitsumɔ lɛ. Akɛni gbɛnaa nii kã amɛnɔ akɛ amɛkɛ amɛwekui ahiamɔ nii aha amɛ hewɔ lɛ, amɛteŋ mɛi komɛi baanu he akɛ be fioo ko pɛ amɛbaanyɛ ni amɛkɛná gbɛfaŋnɔ yɛ sɔɔmɔ lɛ mli. (1 Tim. 5:8) Eji anɔkwale akɛ nɔnyɛɛi babaoo yɛ shihilɛ mli hiamɔ nii ni aaaná lɛ he. Shi esaaa akɛ mɔ ko heloo gbɛfaŋ nitsumɔ tsɔɔ gbɛtsii nii kɛhaa sanekpakpa lɛ shiɛmɔ. (Mar. 13:10) No hewɔ lɛ, wɔɔfee jogbaŋŋ akɛ wɔɔpɛi shihilɛ diɛŋtsɛ ni wɔyɔɔ mli lɛ mli wɔkwɛ.
3 Akɛni je lɛ su miitsake be fɛɛ be hewɔ lɛ, ebaaha weku yitso ko kɛ be ni fa tsɔ awo heloo gbɛfaŋ nitsumɔ mli, kɛ yiŋtoo akɛ ekɛmiibua shika naa kɛha naagbai ni baanyɛ aba lɛ trukaa lɛ. (1 Kor. 7:31) Yɛ be mli ni efeɔ tamɔ nɔ ni heloo gbɛfaŋ nitsumɔ ni ahaa eyaa hiɛ lɛ kɛ heloo naa nibii krokomɛi loo hegbɛi kɛha gbɛhamɔ kɛ hiɛtserɛjiemɔ baaba lɛ, ani enɛ baaha weku lɛ aná miishɛɛ babaoo ni amɛtsui anyɔ amɛmli kɛji ákɛ akɛ enɛ ye mumɔŋ nibii asɛɛdii kɛ kpee ni aaaya daa lɛ najiaŋ? Yɛ anɔkwale mli lɛ, wɔbaasumɔ ni wɔkwa nɔ fɛɛ nɔ ni kɛ wɔmumɔŋ shihilɛ baawo oshara mli lɛ. Yesu ŋaawoo akɛ ‘wɔto jwetrii yɛ ŋwɛi’ ni ‘wɔtsɔmɔ niiatsɛmɛi yɛ Nyɔŋmɔ gbɛfaŋ’ lɛ toiboo ji nilee gbɛ.—Mat. 6:19-21; Luka 12:15-21.
4 Taomɔ Maŋtsɛyeli lɛ He Nibii Klɛŋklɛŋ: Yesu tsɔɔ ekaselɔi lɛ ni amɛkɛ mumɔŋ nibii aye nɔ fɛɛ nɔ hiɛ. Ewo amɛ hewalɛ akɛ: “Nyɛkahaoa nyɛhe nyɛkɛɛa akɛ: Mɛni wɔɔye, aloo mɛni wɔɔnu, mɛni hu wɔɔŋɔha wɔhe?” Mɛni hewɔ ekɛɛ nakai? Etsɔɔ mli akɛ: “Shi nyɛtsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ.” Kɛji akɛ wɔyɛ nɔmimaa yɛ enɛ he lɛɛlɛŋ lɛ, no lɛ gbɛtsii nii ko bɛ ni baatsi wɔ gbɛ koni wɔkafee nɔ ni Yesu kɛɛ kɛnyiɛ sɛɛ lɛ, akɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ [heloo gbɛfaŋ nibii ni he hiaa lɛ] aaafata he aha nyɛ.” Nyɔŋmɔ baakwɛ koni wɔnine ashɛ enɛɛmɛi anɔ! (Mat. 6:31-33) Enɛ jeee be ni ahaa daaŋ ŋmãa he haomɔi ahe yeyeeyefeemɔi, aloo bɔ ni ashweɔ ni ahi shi jogbaŋŋ yɛ nibii agbɛjianɔtoo ni etsɛŋ ebaaho kɛya lɛ ahe haomɔi ni he ehiaaa gbalaa wɔjwɛŋmɔ.—1 Pet. 5:7; 1 Yoh. 2:15-17.
5 Yiŋtoo titri ni yɔɔ heloo gbɛfaŋ nitsumɔ sɛɛ ji ni eha mɔ aná eheloo naa hiamɔ nii. Shi enyiɛ he hiaa wɔ? Bɔfo Paulo ŋma akɛ: “Kɛ́ wɔyɛ ŋmãa kɛ hehaa nii kɛkɛ lɛ, esa akɛ wɔmii ashɛ he.” Ani wɔmiibɔ mɔdɛŋ ni wɔná babaoo fe nakai? Kɛji nakai ni lɛ, no lɛ wɔbaakpa nɔ ni baajɛ mli aba ni Paulo bɔ kɔkɔ yɛ he lɛ, akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Tim. 6:8, 9; Mat. 6:24; Luka 14:33) Te wɔɔfee tɛŋŋ wɔkɛɛ akɛ nibii babaoo ni wɔshweɔ kɛtekeɔ nɔ ni wɔná lɛ miitsĩ wɔ gbɛ?
6 Kɛji akɛ yɛ heloo naa nibii ni wɔdiɔ sɛɛ lɛ hewɔ lɛ be fioo ko pɛ wɔkɛwoɔ shiɛmɔ nitsumɔ lɛ mli, aloo wɔnaaa akɛ ehe miihia ni wɔkɛ nibii ashã afɔle wɔha sanekpakpa lɛ, no lɛ ehe ehia ni wɔtsake nibii ni he hiaa wɔ titri lɛ amli. (Heb. 13:15, 16) Shihilɛ ni baa shi ni hiɛshikamɔ yɔɔ mli babaoo baaye abua koni ejie nɔ ni tsĩɔ wɔshiɛmɔ lɛ gbɛ lɛ kɛya. Esa akɛ Maŋtsɛyeli lɛ he nibii afee nɔ ni yeɔ klɛŋklɛŋ gbɛhe be fɛɛ be yɛ wɔbe kɛ hewalɛ ni wɔkɛtsuɔ nii lɛ gbɛfaŋ.
7 Deŋmegbomɔ ni Efeee Yaka Lɛ: Paulo wiemɔi lɛ woɔ wɔ hewalɛ be fɛɛ be ni ‘wɔteke nɔ yɛ Nuntsɔ lɛ nitsumɔ lɛ mli daa nɛɛ, ejaakɛ wɔle akɛ wɔ mɔdɛŋbɔɔ lɛ efeee yaka yɛ Nuntsɔ lɛ mli.’ (1 Kor. 15:58) “Nuntsɔ lɛ nitsumɔ lɛ” ni he hiaa fe fɛɛ ji Maŋtsɛyeli-shiɛmɔ kɛ kaselɔ-feemɔ nitsumɔ lɛ. (Mat. 24:14; 28:19, 20) Bɔni afee ni wɔná mli gbɛfaŋnɔ babaoo bɔ ni wɔɔnyɛ lɛ, esa akɛ wɔto be kɛha shiɛmɔyaa daa otsi, ni wɔbɔ mɔdɛŋ akɛ, wɔkɛ nakai be lɛ tsuŋ nii kɛhaŋ nitsumɔ kroko ko kwraa. (Efe. 5:15-17) Kɛkɛ lɛ, heloo gbɛfaŋ nitsumɔ loo nɔ kroko ebafeŋ gbɛtsii nii kɛhaŋ wɔ sɔɔmɔ nitsumɔ lɛ.
8 Kɛ wɔkɛ wɔhe ha kɛha Biblia mli anɔkwalei ni wɔɔgba mɛi krokomɛi lɛ, wɔnine shɛɔ miishɛɛ ni fe fɛɛ ni baa kɛjɛɔ nɔ̃ hamɔ mli lɛ nɔ. (Bɔf. 20:35) Kɛji akɛ wɔdi Maŋtsɛyeli-shiɛmɔ nitsumɔ lɛ sɛɛ lɛ, wɔbaanyɛ ni wɔkɛ hekɛnɔfɔɔ akwɛ wɔsɛɛ be gbɛ, “ejaakɛ Nyɔŋmɔ jeee mɔ ni yeɔ sane ni ejaaa ni ehiɛ aaakpa [wɔ] nitsumɔ lɛ nɔ kɛ suɔmɔ deŋme ni [wɔ]gbo yɛ egbɛi lɛ ahewɔ . . . lɛ” nɔ.—Heb. 6:10.