Ha Miishɛɛ ni Oyɔɔ yɛ Shiɛmɔ Nitsumɔ lɛ Mli lɛ Mli Awa
1 Miishɛɛ ni yɔɔ sanekpakpa lɛ kɛ hamɔ mli—ani ooná mli niiashikpamɔ yɛ oshiɛmɔ nitsumɔ lɛ mli? Kɛ́ wɔkwɛɛɛ jogbaŋŋ lɛ, jeŋ fɔŋ ni ebɔle wɔhe nɛɛ baanyɛ aha wɔshe gbeyei akɛ wɔɔshiɛ, ni ebaaha miishɛɛ ni wɔyɔɔ lɛ sɛɛ afo. Nitsumɔ ni wɔɔtsu yɛ shikpɔŋkuku ni wooo yibii mli hu lɛ baanyɛ aje wɔnijiaŋ wui. Mɛɛ nibii ni anyɛɔ atsuɔ he nii wɔbaanyɛ wɔfee koni wɔha miishɛɛ ni wɔyɔɔ yɛ shiɛmɔ nitsumɔ lɛ mli lɛ mli awa?
2 Ná Jwɛŋmɔ Kpakpa: Su kpakpa ni wɔɔná lɛ yeɔ ebuaa diɛŋtsɛ. Gbɛ kome ni wɔɔtsɔ nɔ wɔfee enɛ ji kɛtsɔ hegbɛ ni ekaaa ni wɔyɔɔ akɛ wɔɔfee “Nyɔŋmɔ hefatalɔi nitsulɔi” ní wɔɔsusu he lɛ nɔ. (1 Kor. 3:9) Yesu hu kɛ wɔ yɛ, yɛ nɛkɛ nitsumɔ nɛɛ he nitsumɔ mli. (Mat. 28:20) Ni ekɛ ŋwɛibɔfoi asafo ko fiɔ wɔsɛɛ. (Mat. 13:41, 49) Belɛ, wɔbaanyɛ wɔná nɔmimaa akɛ, ajɛ ŋwɛi aakudɔ wɔmɔdɛŋbɔi lɛ. (Kpoj. 14:6, 7) No hewɔ lɛ, ekɔɔɔ he eko bɔ ni adesai komɛi baafee amɛnii yɛ wɔnitsumɔ lɛ he amɛha lɛ, sɛɛfimɔ ni jɛ ŋwɛi lɛ haa wɔnáa miishɛɛ waa!
3 Saamɔ Ohe Jogbaŋŋ: Hesaamɔ kpakpa hu haa wɔnáa miishɛɛ. Ehe ehiaaa ni wɔha wɔhe ni wɔɔsaa kɛha shiɛmɔ nitsumɔ lɛ afee nitsumɔ babaoo. Minitii fioo ko pɛ he hiaa ni wɔkɛaasusu sane oti ni yɔɔ woji tɛtrɛbii ni eba ehee lɛ loo wolo ni akɛbaaha yɛ nyɔŋ lɛ mli lɛ he. Halamɔ shiɛmɔ wiemɔ ko kɛjɛ “Nɔ ni Esa akɛ Owie yɛ Woji Tɛtrɛbii lɛ Ahe” ni yɔɔ Wɔ Maŋtsɛyeli Sɔɔmɔ lɛ mli lɛ mli. Kwɛmɔ nɔ ni aŋma ahɔ January 2002 nɔ̃ ni ji “Shiɛmɔ Nitsumɔ Mli Shiɛmɔ Wiemɔi ni Akɛha” lɛ mli, loo kwɛmɔ Reasoning wolo lɛ mli kɛha hiɛkpamɔ wiemɔ ni mɔɔ shi. Kɛ́ nɔ ko ni bei pii lɛ shiatsɛmɛi lɛ teɔ shi woɔ lɛ feɔ gbɛtsii nii kɛha bo lɛ, saamɔ ohe yɛ hetoo ko ni baaha amɛwiemɔ lɛ hetoo ni ebaagbala jwɛŋmɔ kɛya saneyitso ni teeɔ miishɛɛ shi lɛ nɔ. Reasoning wolo lɛ yeɔ ebuaa waa yɛ enɛ feemɔ mli. Nɛkɛ yelikɛbuamɔ nɛɛ kɛ nitsumɔ baaha wɔná nɔmimaa ni he hiaa lɛ koni wɔshiɛ kɛ miishɛɛ.
4 Okɛ Hehiamɔ Asɔle: Sɔlemɔ he miihia kɛha miishɛɛ ni hiɔ shi daa. Akɛni wɔmiitsu Yehowa nitsumɔ lɛ hewɔ lɛ, ehe miihia ni wɔkpa lɛ fai ni eha wɔ emumɔ lɛ, ní emli yibii lɛ ateŋ ekome ji suɔmɔ lɛ. (Gal. 5:22) Yehowa baaha wɔ hewalɛ koni wɔya nɔ ni wɔshiɛ. (Fil. 4:13) Kɛ́ wɔsɔle yɛ wɔshiɛmɔ nitsumɔ lɛ he lɛ, ebaanyɛ eye ebua wɔ koni wɔhiɛ jwɛŋmɔ kpakpa beni wɔkɛ niiashikpamɔi ni eŋɔɔɔ lɛ ekpe lɛ. (Bɔf. 13:52; 1 Pet. 4:13, 14) Kɛ́ wɔnu gbeyeishemɔ he lɛ, sɔlemɔ baanyɛ aye abua wɔ koni wɔkã he ni wɔkɛ ekãa kɛ miishɛɛ ashiɛ.—Bɔf. 4:31.
5 Gbelemɔ Hegbɛi: Eji anɔkwale akɛ, kɛ́ wɔkɛ mɛi gba sane ni wɔye amɛ odase lɛ, ehaa wɔshiɛmɔ nitsumɔ lɛ ŋɔɔ waa. Kɛ́ otsake oshia kɛ shia gbɛjianɔtoo lɛ mli kɛwo be kroko lɛ, ekolɛ, yɛ gbɛkɛnaashi mli loo beni je miihe ana lɛ, ekolɛ omanyeyeli baanyɛ aba. Be fɛɛ be ni onyiɛ gbɛjegbɛ lɛ nɔ, ooya jara nɔ, loo ota bɔs mli, loo ooshara shi yɛ hejɔɔmɔhe ko lɛ, okɛ mɛi kpeɔ. Mɛni hewɔ osaaa ohe yɛ sane ko ni akɛjeɔ sanegbaa shishi lɛ mli ni obɛŋkɛ mɛi ni etamɔ nɔ ni amɛjieɔ naanyobɔɔ su kpo lɛ? Aloo obaanyɛ oyatsu nii yɛ heloonaa nitsumɔhe ko loo skul ko, he ni okɛ mɛi krokomɛi gbaa sane gbi fɛɛ gbi lɛ. Ekolɛ, obaaná hegbɛ ni okɛye odase kɛtsɔ Ŋmalɛ mli sane ko ni oootee lɛ shi ni baakanya miishɛɛ lɛ nɔ. Anaa ŋaawoi kpakpai yɛ nɔ ni aŋma ahɔ January 2002 Wɔ Maŋtsɛyeli Sɔɔmɔ lɛ hiɛgbɛ lɛ mli. Mɔdɛŋbɔi nɛɛ ateŋ eko baanyɛ aha miishɛɛ ni mɔ ko yɔɔ yɛ shiɛmɔ nitsumɔ lɛ mli lɛ awa.
6 Akɛni miishɛɛ yeɔ ebuaa wɔ ni wɔmiaa wɔhiɛ hewɔ lɛ, kwɛ bɔ ni ehe hiaa ni wɔhiɛ mli! Kɛ́ wɔfee nakai lɛ, wɔbaakpa nyɔmɔwoo babaoo beni nɛkɛ nitsumɔ ni atsuŋ eko dɔŋŋ nɛɛ baa enaagbee lɛ. Nakai gbɛkpamɔ lɛ po baanyɛ aha miishɛɛ ni wɔyɔɔ yɛ shiɛmɔ nitsumɔ lɛ mli lɛ mli awa.—Mat. 25:21.