Sanebimɔ He

◼ Mɛɛ be mli esa akɛ atse kuu ko ni wieɔ maŋsɛɛ wiemɔ?

Kɛji akɛ ayɛ mɛi saŋŋ ni wieɔ maŋsɛɛ wiemɔ yɛ asafo ko shikpɔŋkuku mli lɛ, esa akɛ onukpai lɛ abɔ mɔdɛŋ fɛɛ ni amɛaanyɛ koni amɛto shiɛmɔ nitsumɔ lɛ he gbɛjianɔ yɛ nakai wiemɔ lɛ mli. (km 7/02 bf. 1; km 2/98 bf. 3-4) Eeenyɛ efee akɛ mɛi ni wieɔ maŋsɛɛ wiemɔ lɛ egbɛ eshwã asafoi enyɔ loo nɔ ni fe nakai ni bɛŋkɛ lɛ ashikpɔŋkukuji lɛ amli fɛɛ. Yɛ shihilɛ ni tamɔ nɛkɛ mli lɛ, kpokpaa nɔkwɛlɔi lɛ kɛ gbɛtsɔɔmɔ ni he hiaa baaha asafoi ni ekɔɔ amɛhe lɛ, koni eye ebua amɛ ni amɛkɛ ekomefeemɔ atsu shiɛmɔ nitsumɔ lɛ. Yɛ be kɛ bei amli lɛ, abaanyɛ ato maŋshiɛmɔ loo Buu-Mɔɔ Nikasemɔ he gbɛjianɔ koni akɛle mɛi ayibɔ ni wieɔ maŋsɛɛ wiemɔ lɛ ni baaba kpeei lɛ.

Abaanyɛ atse kuu ko ni wieɔ maŋsɛɛ wiemɔ kɛji ashɛ taomɔ nibii ni nyiɛ sɛɛ nɛɛ ahe: (1) Kɛji ayɛ shiɛlɔi loo mɛi ni yɔɔ wiemɔ lɛ he miishɛɛ ni nuɔ sanekpakpa lɛ shishi jogbaŋŋ yɛ maŋsɛɛ wiemɔ lɛ mli. (2) Kɛji ayɛ onukpa loo asafoŋ sɔɔlɔ ni he esa ni baanyiɛ hiɛ koni ekwɛ kpee ni abaafee lɛ nɔ kɛ hoo lɛ shikome yɛ daa otsi mli lɛ. (3) Kɛji onukpai akuu lɛ miisumɔ ni amɛye amɛbua kuu lɛ. Kɛ ashɛ taomɔ nibii nɛɛ ahe lɛ, esa akɛ onukpai lɛ atswa nitsumɔhe nine lɛ adafi bɔni afee ni akpɛlɛ kuu lɛ nɔ koni akɛ gbɛtsɔɔmɔi krokomɛi aha.

Ajeɔ kui babaoo shishi kɛ Asafo Woloŋ Nikasemɔ ni afeɔ daa otsi. Yɛ sɛɛ mli lɛ, onukpai lɛ baanyɛ akpɛlɛ nɔ koni akɛ kpeei krokomɛi, tamɔ Maŋshiɛmɔ kɛ Buu-Mɔɔ Nikasemɔ lɛ afata he. Kɛji akɛ onukpa loo asafoŋ sɔɔlɔ ko ni he esa ni nyɛɔ wiemɔ lɛ ewieɔ lɛ baanyɛ esɔmɔ akɛ ŋaawolɔ lɛ, no lɛ abaanyɛ afee Teokrase Sɔɔmɔ Skul lɛ Nifeemɔ ni Ji 2, 3, kɛ 4 lɛ yɛ tsũ kroko mli. Shi kɛlɛ, kuu lɛ baafata asafo lɛ he kɛha tsɔsemɔ wiemɔ lɛ, Biblia mli saji otii anɔmimaa, kɛ Sɔɔmɔ Kpee lɛ. Abaanyɛ ni ato kpeei kɛha shiɛmɔyaa hu he gbɛjianɔ kɛha kuu lɛ.

Kuu lɛ mli bii fɛɛ baatsu nii yɛ ekomefeemɔ mli yɛ onukpai akuu lɛ nɔkwɛmɔ shishi. Esa akɛ onukpai lɛ kɛ gbɛtsɔɔmɔ ni ŋmɛɔ pɛpɛɛpɛ aha, koni amɛjie mɔ hesusumɔ ni mli kwɔ kpo yɛ kuu lɛ hiamɔ nii ahe nitsumɔ mli. Kɛji kpokpaa nɔkwɛlɔ lɛ ba asafo ni kɛ yelikɛbuamɔ haa kuu lɛ saramɔ lɛ, ebaato gbɛjianɔ koni ekɛ kuu lɛ hu atsu nii, bɔni afee ni etswa kuu lɛ ema shi yɛ mumɔŋ. Kɛtsɔ Yehowa jɔɔmɔ nɔ lɛ, ekolɛ kuu ni wieɔ maŋsɛɛ wiemɔ lɛ baatsɔ asafo yɛ be ni sa mli.