Tsɔɔmɔ Mɛi Krokomɛi Wiemɔ Krɔŋŋ Lɛ
1 Yɛ ‘maji, akutsei, gbɔmɛi kɛ wiemɔi srɔtoi’ babaoo amli ni Yehowa Odasefoi jɛ lɛ fɛɛ sɛɛ lɛ, amɛji mɛi ni efee ekome, jeŋ muu fɛɛ nyɛmifeemɔ diɛŋtsɛ. (Kpoj. 7:9) Eji nɔ ko ni sa kadimɔ waa diɛŋtsɛ yɛ ŋmɛnɛŋmɛnɛ jeŋ ni mli egbala nɛɛ mli. Te feɔ tɛŋŋ ni ebaa lɛ nakai? Ejaakɛ “aŋɔ wiemɔ krɔŋŋ” aha wɔ.—Zef. 3:9, NW.
2 Tsakemɔi ni Yɔɔ Naakpɛɛ: Mɛni ji nɛkɛ wiemɔ krɔŋŋ nɛɛ? No ji anɔkwale ni yɔɔ Nyɔŋmɔ Wiemɔ lɛ mli ni kɔɔ Yehowa kɛ eyiŋtoi ahe lɛ he shishinumɔ ni ja ni aaaná, titri lɛ, anɔkwale ni kɔɔ Nyɔŋmɔ Maŋtsɛyeli lɛ he lɛ. Taakɛ Yesu gba efɔ shi lɛ, aatsɔ gbɛjianɔtoo ni anaa, “tsulɔ anɔkwafo kɛ nilelɔ” lɛ nɔ akɛmiija nɛkɛ anɔkwale nɛɛ, ni nɔ ni ejɛ mli kɛba ji akɛ, gbɔmɛi “ni jɛ jeŋmaji anɔ wiemɔi srɔtoi fɛɛ mli” miikpɛlɛ anɔkwa jamɔ nɔ.—Mat. 24:45; Zak. 8:23.
3 Beni mɛi kaseɔ wiemɔ krɔŋŋ lɛ, etsirɛɔ amɛ koni amɛjaje amɛshihilɛ gbɛ̀i ni ekɛ Yehowa shishitoo mlai akpã gbee. Amɛkaseɔ bɔ ni ‘amɛ fɛɛ amɛyitsoŋ kɛ amɛjwɛŋmɔ aaafee ekome.’ (1 Kor. 1:10) Ŋwɛi nitsɔɔmɔ hu haa amɛnáa jeŋba ni he tse ni sa, anɔkwa wiemɔ, titri lɛ nɔ ni kɔɔ mɛi krokomɛi ni aaagba amɛ sanekpakpa lɛ he. (Tito 2:7, 8; Heb. 13:15) Tsakemɔi ni yɔɔ naakpɛɛ nɛɛ woɔ Yehowa hiɛ nyam.
4 Ákɛ nɔkwɛmɔnɔ lɛ, ajɛ Biblia lɛ mli aha nuu ko ni ashiɛ sanekpakpa lɛ atsɔɔ lɛ lɛ sanebimɔi babaoo ni eyɔɔ lɛ fɛɛ hetoo. Akɛni nɔ ni enu lɛ tsirɛ lɛ hewɔ lɛ, ebɔi nikasemɔ shii enyɔ yɛ otsi fɛɛ otsi mli ni ebɔi kpeeiyaa. Enaa kpɛ ehe yɛ suɔmɔ mli ni ajɛ ahere lɛ hiɛmɛɛ yɛ Maŋtsɛyeli Asa lɛ nɔ lɛ hewɔ, ejaakɛ mɛi ni ba kpee lɛ ateŋ mɛi babaoo hiɛ hewolo nɔ sui srɔtoi. Etsɛɛɛ ni lɛ kɛ eŋa fee tsakemɔi yɛ amɛshihilɛ mli ni abaptisi amɛ. Kɛjɛ no nɔ kɛbaa nɛɛ, eye ebua mɛi krokomɛi aaashɛ 40 ni ewekumɛi babaoo fata he lɛ koni amɛsɔmɔ Yehowa. Yɛ piŋmɔ ni epiŋɔ yɛ gbɔmɔtsoŋ gbɔjɔmɔ hewɔ lɛ fɛɛ sɛɛ lɛ, ebɔi sɔɔmɔ nyɛsɛɛ nɛɛ akɛ daa gbɛgbalɔ.
5 Mɛi Krokomɛi ni Aaatsɔɔ Amɛ Nii: Shihilɛi ni yaa nɔ yɛ je lɛŋ lɛ miiha anɔkwafoi babaoo miisusu bɔ ni amɛjwɛŋɔ nii ahe kɛ bɔ ni amɛshihilɛi yɔɔ ha lɛ ahe ekoŋŋ. Taakɛ Yesu ji lɛ, esa akɛ wɔná shwelɛ akɛ wɔɔye wɔbua amɛ. Sɛɛkuu kɛ saramɔi kɛ Biblia mli nikasemɔi ni mɔɔ shi lɛ ji nɔ titri ni yeɔ ebuaa anɔkwafoi koni amɛkase wiemɔ krɔŋŋ lɛ.
6 Gbɛ ko ni enyɛ ewo yibii yɛ mɛi ni bɛ deka lɛ ahe ji ni aaafee Biblia mli nikasemɔ ni yɔɔ kuku be mli ni adamɔ amɛshinaai anaa lɛ. (km 5/02 bf. 1) Ani oka enɛ okwɛ? Beni osaa ohe kɛha sɛɛkuu kɛ saramɔ ko lɛ, halamɔ shiɛmɔ wiemɔi ni baasa shiatsɛ lɛ he kɛjɛ nɔ ni aŋma ahɔ January 2002 Wɔ Maŋtsɛyeli Sɔɔmɔ lɛ mli lɛ mli. Ato shiɛmɔ wiemɔi ni aŋmala ahɔ mli nɛɛ babaoo he gbɛjianɔ koni akɛje sanegbaa shishi tɛɛ kɛjɛ Taoɔ wolo bibioo aloo Nilee wolo lɛ mli. Kasemɔ shiɛmɔ wiemɔ lɛ shii abɔ bɔni afee ni onyɛ otsɔ hiɛkpamɔ wiemɔ lɛ nɔ kɛje kukuji lɛ ateŋ ekome mli sanegbaa shishi yɛ gbɛ ni yɔɔ mlɛo nɔ. Halamɔ Ŋmalɛ kome loo enyɔ ni obaakane koni nyɛsusu he kɛjɛ kuku lɛ mli, ni oto sanebimɔ ko ni okɛbaamu naa lɛ he gbɛjianɔ. No baaye abua kɛtsá kuku ni oto akɛ nyɛbaasusu he yɛ saramɔ ni baanyiɛ sɛɛ lɛ mli lɛ nɔ.
7 Yehowa webii miiná jɔɔmɔi babaoo mli ŋɔɔmɔ yɛ wiemɔ krɔŋŋ ni amɛkase lɛ hewɔ. Eba akɛ wɔkɛ ekãa baaye abua mɛi krokomɛi ni amɛbafata wɔhe yɛ ‘Yehowa gbɛi lɛ tsɛmɔ’ kɛ gbee ‘kome ni wɔkɛsɔmɔɔ lɛ’ lɛ mli.—Zef. 3:9.