Nyɔŋmɔ Wiemɔ lɛ Ji Anɔkwale
1. Mɛɛ sane ni he hiaa waa yɔɔ Biblia lɛ mli?
1 Lalatsɛ lɛ ŋma akɛ: “Owiemɔ tso muu lɛ fɛɛ lɛ, anɔkwale ni.” (Lala 119:160) Yehowa tsɔɔ e-Wiemɔ ni ajɛ mumɔ mli aŋma lɛ nɔ ekɛ hetooi ni haa mɔ tsui nyɔɔ emli haa shihilɛ mli sanebimɔi ni he hiaa waa lɛ. Ekɛ miishɛjemɔ kɛ hiɛnɔkamɔ haa mɛi ni ehao lɛ. Ni etsɔɔ wɔ bɔ ni wɔɔfee wɔtsi wɔbɛŋkɛ lɛ. Yoo ko ni hiɛ sɔɔ nii lɛ kɛɛ akɛ: “Anɔkwale lɛ ni aaakase kɛjɛ Biblia lɛ mli lɛ tamɔ nɔ ni aaje kpo kɛmiijɛ he ko ni ewo duŋ ni yɔɔ sulii kɛmiibote tsu ni mli tse, ni kpɛɔ kaŋkaŋ, ni yɔɔ fɛo mli.” Ani obɔɔ mɔdɛŋ ni ogba mɛi krokomɛi anɔkwale ni jɛ Nyɔŋmɔ Wiemɔ lɛ mli lɛ yɛ hegbɛ fɛɛ hegbɛ ni oooná mli?
2. Mɛɛ gbɛ nɔ Biblia lɛ haa gbɔmɛi ashihilɛi yaa hiɛ yɛ?
2 Hewalɛ ni Haa Mɔ Tsakeɔ kɛ Bɔ ni Asumɔɔ yɛ Jeŋ Muu Fɛɛ: Biblia mli anɔkwale lɛ yɛ hewalɛ ni saa tsuii ahe ni tsakeɔ shihilɛi. (Heb. 4:12) Oblayoo ko ni atsɛɔ lɛ Rosa lɛ kɛ ehe wo ahoshwibɔɔ, dãatɔɔ kɛ tsofai fɔji kɛ nitsumɔ hu mli. Ekɛɛ akɛ: “Gbi ko, beni miyɔɔ haomɔ ni naa wa waa mli lɛ, Odasefoi enyɔ ni ji gbalashihilɛ mli hefatalɔi kɛ mi wie bɔ ni Biblia lɛ baanyɛ aye abua ni wɔná tsabaa wɔha wɔnaagbai lɛ he. Mije Nyɔŋmɔ Wiemɔ lɛ kasemɔ shishi, ni miná he miishɛɛ waa diɛŋtsɛ. Yɛ nyɔŋ kome mli lɛ, miná hewalɛ kɛje shihilɛ hee shishi. Amrɔ nɛɛ ni miná yiŋtoo yɛ shihilɛ mli lɛ, dãa ni wa loo tsofai fɔji ayelikɛbuamɔ he ehiaaa mi dɔŋŋ. Ni akɛni miisumɔ waa ni matsɔ Yehowa shieŋtsɛ hewɔ lɛ, mitswa mifai shi akɛ mahi shi yɛ etaomɔ nii anaa. Eji jeee Nyɔŋmɔ Wiemɔ lɛ ni anyɛɔ atsuɔ he nii lɛ kulɛ, miyɛ nɔmimaa akɛ benɛ mifo miwala sɛɛ momo.”—Lala 119:92.
3. Mɛni hewɔ esaaa akɛ wɔshashaoɔ shi akɛ wɔɔgba mɛi krokomɛi Biblia mli shɛɛ sane lɛ?
3 Akɛ nɔ ni tamɔɔɔ woji krokomɛi lɛ, gbɔmɛi ni jɛ ‘jeŋmaŋ fɛɛ jeŋmaŋ, akutsei, maji, kɛ majianɔ wiemɔi amli’ sumɔɔ Biblia lɛ. (Kpoj. 7:9) Nyɔŋmɔ suɔmɔnaa nii ji “akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) No hewɔ lɛ, esaaa akɛ wɔsusuɔ kɔkɔɔkɔ akɛ mɔ ko boŋ sanekpakpa lɛ toi yɛ shihilɛ mli ni ehi be ko lɛ kɛkɛ hewɔ. Yɛ no najiaŋ lɛ, gbaa mɛi fɛɛ Maŋtsɛyeli shɛɛ sane lɛ, ni ofee nakai kɛjɛ Biblia lɛ mli tɛ̃ɛ be fɛɛ be ni hegbɛ lɛ aaaba.
4. Yɛ mɛɛ gbɛ nɔ wɔbaanyɛ wɔkɛ Biblia lɛ atsu nii yɛ be mli ni wɔyeɔ odase lɛ?
4 Okɛ Ŋmalɛi lɛ Atsu Nii: Hegbɛi babaoo yɛ ni wɔkɛaatsu nii koni wɔkɛ Biblia lɛ atsu nii yɛ sɔɔmɔ nitsumɔ lɛ mli. Kɛji okɛ woji tɛtrɛbii lɛ miiha lɛ, bɔɔ mɔdɛŋ akɛ okɛ Ŋmalɛ ni jeɔ kpo yɛ shiɛmɔ wiemɔ ni akɛha lɛ mli lɛ baafata he. Mɛi komɛi naa akɛ efeɔ nɔ ni mɔɔ shi jogbaŋŋ akɛ amɛkɛ ŋmalɛ ni amɛkwɛ mli jogbaŋŋ ni amɛhala lɛ kanemɔ baafata he yɛ amɛhiɛkpamɔ wiemɔi lɛ amli, kɛji ákɛ amɛkɛ woji ni akɛbaatsu nii yɛ nyɔŋ lɛ mli lɛ miiha. Kɛji akɛ oofee sɛɛkuu kɛ saramɔ lɛ, okɛ shiatsɛ lɛ asusu Biblia mli ŋmalɛ kome loo babaoo he be fɛɛ be koni eye ebua lɛ ni eya hiɛ yɛ anɔkwa nilee namɔ mli. Kɛji akɛ oofee Biblia mli nikasemɔ lɛ, hã sanegbaa lɛ adamɔ ŋmalɛi otii lɛ anɔ. Yɛ be mli ni okɛ ohe wooo shiɛmɔ nitsumɔ ni ato he gbɛjianɔ mli lɛ, hã Biblia lɛ ahi ohe kɛha nitsumɔ kɛji akɛ hegbɛi ba ni okɛaaye trukaa odase.—2 Tim. 2:15.
5. Mɛni hewɔ esa akɛ wɔbɔ mɔdɛŋ akɛ wɔkɛ Biblia lɛ aaatsu nii yɛ wɔsɔɔmɔ nitsumɔ lɛ mli lɛ?
5 Eba akɛ wɔbaaye wɔbua mɛi krokomɛi ni amɛná kanyamɔ hewalɛ ni Nyɔŋmɔ Wiemɔ ni ji anɔkwale lɛ yɔɔ lɛ he sɛɛ kɛtsɔ Biblia lɛ ni wɔkɛaatsu nii yɛ hegbɛ fɛɛ hegbɛ ni sa yɛ wɔsɔɔmɔ nitsumɔ lɛ mli lɛ mli.—1 Tes. 2:13.