Nitsumɔ ni Haa Mɔ Tsui Nyɔɔ Emli
1 Biblia mli shɛɛ sane lɛ hãa mɛi fɛɛ ni kpɛlɛɔ nɔ, ni amɛkɛtsuɔ nii yɛ amɛshihilɛi amli lɛ náa miishɛɛ. (Lala 19:8, 9) Eyeɔ ebuaa ni amɛyeɔ amɛhe kɛjɛɔ apasa tsɔɔmɔi kɛ nifeemɔi ni yeɔ mɔ awui lɛ ahe ni ekɛ hiɛnɔkamɔ ni anyɛɔ akɛ he fɔ̃ɔ nɔ haa kɛha wɔsɛɛ be. Shi kɛlɛ, jeee mɛi ni nine shɛɔ sanekpakpa lɛ nɔ lɛ pɛ ji mɛi ni náa he sɛɛ. Mɛi ni kɛ mɛi krokomɛi jaa Biblia mli anɔkwalei lɛ diɛŋtsɛ hu atsui nyɔɔ amɛmli.—Abɛi 11:25.
2 Sɔɔmɔ Nitsumɔ lɛ Wo Amɛ Hewalɛ: Yesu kɛɛ akɛ mɛi ni kpɛlɛɔ Kristofoi akaselɔfeemɔ apã lɛ nɔ, ni nɔ ni fata he ji shiɛmɔ nitsumɔ lɛ kɛ kaselɔi afeemɔ lɛ, baaná ‘hejɔɔmɔ amɛaaha amɛsusumai lɛ.’ (Mat. 11:29) Lɛ diɛŋtsɛ hu ena akɛ odase ni ayeɔ mɛi krokomɛi lɛ ji hewalɛwoo nɔ. Etamɔ niyenii kɛha lɛ. (Yoh. 4:34) Beni etsu kaselɔi 70 lɛ koni amɛyashiɛ lɛ, amɛmli fili amɛ akɛni amɛna akɛ Yehowa miifi amɛmɔdɛŋbɔɔ lɛ sɛɛ lɛ hewɔ.—Luka 10:17.
3 Kristofoi babaoo náa hewalɛwoo ni tamɔ nakai nɔŋŋ ŋmɛnɛ yɛ amɛhe ni amɛkɛwoɔ shiɛmɔ nitsumɔ lɛ mli lɛ hewɔ. Nyɛmi yoo ko kɛɛ akɛ: “Shiɛmɔ nitsumɔ lɛ hãa mitsui nyɔɔ mimli ejaakɛ ehaa migbalaa mijwɛŋmɔ kɛyaa mishihilɛ kɛ miyiŋtoo nɔ. Naagbai ni miyɔɔ kɛ haomɔi ni baa gbi fɛɛ gbi lɛ bafeɔ nɔ ni he ehiaaa kɛji mikɛ mihe wo sɔɔmɔ nitsumɔ lɛ mli.” Sɔɔlɔ kroko ni yɔɔ ekãa lɛ hu wie akɛ: “Shiɛmɔ nitsumɔ lɛ hãa Yehowa feɔ mɔ ko ni yɔɔ diɛŋtsɛ kɛha mi gbi fɛɛ gbi, ni ehãa mináa toiŋjɔlɛ kɛ mligbɛ miishɛɛ falɛ ko ni anyɛŋ aná kɛtsɔ gbɛ kroko ko nɔ.” Mɛɛ hegbɛ po wɔná nɛkɛ akɛ wɔji “Nyɔŋmɔ hefatalɔi nitsulɔi”!—1 Kor. 3:9.
4 Kristo Apã lɛ Teremɔ Waaa: Yɛ be mli ni Yesu woɔ Kristofoi hewalɛ koni ‘amɛpele amɛhe lɛ,’ ebiii babaoo fe bɔ ni wɔbaanyɛ wɔkɛha. (Luka 13:24) Yɛ anɔkwale mli lɛ, ejɛɔ suɔmɔ mli efɔ̃ɔ wɔ nine koni ‘wɔkɛ lɛ atere epã lɛ.’ (Mat. 11:29) Mɛi ni ebiɔ ni amɛkpee shihilɛi ni mli wawai anaa lɛ baanyɛ aná hekɛnɔfɔɔ akɛ, kɛji amɛsusuma muu fɛɛ sɔɔmɔ lɛ ji nɔ ni faaa po lɛ, esaa Nyɔŋmɔ hiɛ jogbaŋŋ.—Mar. 14:6-8; Kol. 3:23.
5 Kwɛ bɔ ni eji tsui ni nyɔɔ mɔ mli akɛ wɔɔsɔmɔ Nyɔŋmɔ ni hiɛ sɔɔ nɔ fɛɛ nɔ ni wɔfeɔ yɛ egbɛi lɛ hewɔ lɛ nɛkɛ! (Heb. 6:10) Eba akɛ wɔbaabɔ mɔdɛŋ be fɛɛ be koni wɔkɛ wɔnii ni hi fe fɛɛ lɛ aha lɛ.