Anɔkwa Ekomefeemɔ ni Yɔɔ Kristofoi Ateŋ—Yɛ Mɛɛ Gbɛ Nɔ?
1 Mɛni baanyɛ afee gbɔmɛi ni fa fe akpekpei ekpaa ni jɛ shikpɔji 234 nɔ, kɛ wiemɔi akui aaashɛ 380 mli lɛ ekome? Yehowa Nyɔŋmɔ jamɔ pɛ baanyɛ afee amɛ ekome. (Mika 2:12; 4:1-3) Yehowa Odasefoi le kɛjɛ amɛ diɛŋtsɛ amɛniiashikpamɔ mli akɛ anɔkwa ekomefeemɔ ni yɔɔ Kristofoi ateŋ lɛ ji nɔ ni yɔɔ diɛŋtsɛ ŋmɛnɛ. Akɛni wɔji “kuu kome” yɛ “kwɛlɔ kome” shishi hewɔ lɛ, wɔtswa wɔfai shi akɛ wɔbaate shi wɔshi je lɛ mligbálamɔ mumɔ lɛ.—Yoh. 10:16; Efe. 2:2.
2 Nyɔŋmɔ yiŋtoo ni efeee efolo lɛ ji akɛ, adebɔɔ nii ni yɔɔ nilee lɛ fɛɛ afee ekome yɛ anɔkwa jamɔ mli. (Kpoj. 5:13) Akɛni Yesu le bɔ ni enɛ he hiaa hewɔ lɛ, esɔle waa yɛ ekomefeemɔ ni aaahi ekaselɔi lɛ ateŋ lɛ he. (Yoh. 17:20, 21) Mɛɛ gbɛ nɔ wɔteŋ mɔ fɛɛ mɔ baanyɛ aye abua ni eha ekomefeemɔ aya nɔ yɛ Kristofoi asafo lɛ mli?
3 Gbɛ ni Atsɔɔ nɔ Afeɔ Ekome: Kɛji akɛ Nyɔŋmɔ Wiemɔ lɛ kɛ emumɔ lɛ bɛ mli lɛ, Kristofoi nyɛŋ ni amɛfee ekome. Kɛ wɔkɛ nɔ ni wɔkaneɔ yɛ Biblia lɛ mli lɛ tsuɔ nii lɛ, eŋmɛɔ Nyɔŋmɔ mumɔ lɛ gbɛ ni etsuɔ nii waa yɛ wɔshihilɛi amli. Enɛ yeɔ ebuaa wɔ koni ‘wɔto mumɔ ekomefeemɔ lɛ yɛ hejɔlɛ kpãa lɛ mli.’ (Efe. 4:3) Etsirɛɔ wɔ koni wɔkɛ wɔhe aye yɛ suɔmɔ mli. (Kol. 3:13, 14; 1 Pet. 4:8) Ani ohaa ekomefeemɔ yaa nɔ kɛtsɔ Nyɔŋmɔ Wiemɔ lɛ ni osusuɔ he daa gbi lɛ nɔ?
4 Nitsumɔ ni akɛha wɔ akɛ wɔshiɛ ni wɔfee kaselɔi lɛ hu feɔ wɔ ekome. Kɛ wɔkɛ mɛi krokomɛi tsu nii yɛ Kristofoi asɔɔmɔ nitsumɔ lɛ mli, ‘ni wɔkɛ jwɛŋmɔ kome miipele sanekpakpa lɛ hemɔkɛyeli lɛ he lɛ,’ wɔbatsɔmɔɔ “anɔkwale lɛ he nanemɛi nitsulɔi.” (Fil. 1:27; 3 Yoh. 8) Be mli ni wɔyaa nɔ wɔfeɔ nakai lɛ, ewoɔ suɔmɔ ekomefeemɔ kpãa ni yɔɔ asafo lɛ mli lɛ hewalɛ. Mɛni hewɔ ofɔ̃ɔɔ mɔ ko ni okɛ lɛ tsuko nii nyɛsɛɛ nɛɛ lɛ nine koni efata ohe yɛ shiɛmɔ nitsumɔ lɛ mli otsi nɛɛ?
5 Mɛɛ hegbɛ wɔná nɛkɛ akɛ wɔɔfata anɔkwa majimaji ateŋ nyɛmifeemɔ kuu kome pɛ ni yɔɔ shikpɔŋ lɛ nɔ ŋmɛnɛ lɛ ahe! (1 Pet. 5:9) Mɛi akpei abɔ baana jeŋ muu fɛɛ ekomefeemɔ nɛɛ hiɛ kɛ hiɛ yɛ “Okɛ Anunyam Aha Nyɔŋmɔ” Majimaji Ateŋ Kpeei loo Kpokpaa Wulu nɔ Kpeei lɛ ashishi. Eba akɛ wɔteŋ mɔ fɛɛ mɔ baaye abua nɛkɛ ekomefeemɔ ni jara wa nɛɛ, kɛtsɔ kpeei lɛ ashishi ni wɔɔya lɛ nɔ, kɛtsɔ Nyɔŋmɔ Wiemɔ lɛ kanemɔ gbi fɛɛ gbi lɛ nɔ, kɛtsɔ béi ni wɔɔsaa yɛ suɔmɔ mli lɛ nɔ, kɛ agbɛnɛ kɛtsɔ sanekpakpa lɛ ni wɔɔshiɛ ‘kɛ jwɛŋmɔ kome’ lɛ hu nɔ.—Rom. 15:6.