Bɔ ni Ŋwɛi Nilee Jara Wa Waa Ha
1 Mɛi komɛi susuɔ akɛ esa akɛ Yehowa Odasefoi kɛ amɛnyɛmɔi awo yelikɛbuamɔ ni amɛkɛaaha yɛ gbɛ ni yɔɔ tɛ̃ɛ nɔ koni naagbai ni adesai kɛkpeɔ ŋmɛnɛ lɛ abashi lɛ mli. Nakai gbɔmɛi lɛ enaaa bɔ ni wɔ Biblia tsɔsemɔ nitsumɔ lɛ jara wa waa ha lɛ. Etamɔ bɔ pɛ ni bɔfo Paulo ŋma lɛ, akɛ: “Sɛŋmɔtso lɛ he sane lɛ ji kwashiaiasane ha mɛi ni hiɛ kpataa lɛ; shi wɔ mɛi ni ahereɔ wɔyiwala lɛ, eji Nyɔŋmɔ hewalɛ ha wɔ.” (1 Kor. 1:18) Eji anɔkwale akɛ, wɔle akɛ Kristofoi ashiɛmɔ nitsumɔ lɛ ji nitsumɔ ni he hiaa fe fɛɛ ni atsuɔ yɛ shikpɔŋ nɔ ŋmɛnɛ.
2 Shihilɛ Kpakpa Bianɛ: Mɔdɛŋ ni adesai bɔɔ koni amɛtsu naagbai ni adesai aweku lɛ kɛkpeɔ lɛ he nii lɛ ewo yibii fioo ko pɛ. Mlai ni awoɔ lɛ nyɛko atsi awuiyeli ni faa lɛ naa. Toiŋjɔlɛ he kpaŋmɔi kɛ toiŋjɔlɛ yibaamɔ he asraafoi kɛ ta bako naagbee. Shihilɛi ahe gbɛjianɔtoi nyɛko ajie ohia kɛya. (Lala. 146:3, 4; Yer. 8:9) Nɔ ni tamɔɔɔ nakai lɛ, Maŋtsɛyeli shɛɛsane lɛ etsake gbɔmɛi akpekpei abɔ ashihilɛi kɛtsɔ yelikɛbuamɔ ni ekɛha amɛ ni amɛwo gbɔmɔ hee ni Nyɔŋmɔ kpɛlɛɔ nɔ lɛ nɔ. (Rom. 12:2; Kol. 3:9, 10) Yɛ nakai feemɔ mli lɛ, amɛnáa shihilɛ ni etee hiɛ mli ŋɔɔmɔ bianɛ.—1 Tim. 4:8.
3 Wɔsɛɛ Be Kpakpa: Kɛfata yelikɛbuamɔ ni ŋwɛi nilee kɛhaa wɔ koni wɔtsu shihilɛ mli naagbai ni wɔkɛkpeɔ bianɛ lɛ he nii yɛ omanyeyeli mli lɛ he lɛ, ehaa wɔnyɛɔ wɔtoɔ wɔsɛɛ be he gbɛjianɔ jogbaŋŋ. (Lala 119:105) Ehaa wɔyeɔ wɔhe kɛjɛɔ mɔdɛŋ ni wɔɔbɔ yakatswaa akɛ wɔɔtsake ŋmɛnɛ nibii agbɛjianɔtoo nɛɛ hiɛ lɛ he. (Jaj. 1:15; Rom. 8:20) Kwɛ bɔ ni wɔdaa shi akɛ wɔfiteee wɔshihilɛ ni wɔkɛtiu otii ni ji yiŋsusumɔ foji komɛi kɛkɛ lɛ asɛɛ! Yɛ no najiaŋ lɛ, wɔhaa wɔmɔdɛŋbɔi lɛ damɔɔ Yehowa shiwoo ni nɔmimaa yɔɔ he ni ji “ŋwɛi hee kɛ shikpɔŋ hee” ni jalɛ baahi mli lɛ nɔ. Kɛ́ Yehowa kojomɔ gbi lɛ shɛ lɛ, ebaafee faŋŋ ni tɔmɔ ko kwraa bɛ he akɛ mɛi ni kɛ amɛhe fɔ ŋwɛi nilee nɔ lɛ fee nihalamɔ ni ja.—2 Pet. 3:10-13; Lala 37:34.
4 Eyɛ mli akɛ ŋwɛi nilee baanyɛ afee tamɔ nɔ ni sɛɛnamɔ bɛ he kɛha mɛi ni kɛ amɛhe ewo “je nɛŋ nilee” mli vii lɛ moŋ, shi yɛ anɔkwale mli lɛ, no pɛ ji nifeemɔ gbɛ ni nilee yɔɔ mli akɛ aaakɔ. (1 Kor. 1:21; 2:6-8) No hewɔ lɛ, wɔyaa nɔ ni wɔjajeɔ shɛɛsane ni jɛ Nyɔŋmɔ, ni ji “nilelɔ kometoo lɛ” ŋɔɔ lɛ yɛ shikpɔŋ lɛ nɔ fɛɛ.—Rom. 16:27.