Ná Tsi Obɛŋkɛ Yehowa Wolo lɛ Kasemɔ He Sɛɛ
1 Wɔná miishɛɛ waa beni wɔnine shɛ Tsi Obɛŋkɛ Yehowa wolo lɛ nɔ yɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpee lɛ shishi lɛ. Mɛi babaoo kane wolo lɛ amrɔ nɔŋŋ. Ŋwanejee ko bɛ he akɛ afi ŋmalɛ kɛha afi 2003, ni ji “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ” lɛ wo mɛi babaoo diɛŋtsɛ hewalɛ ni amɛkane wolo lɛ.—Yak. 4:8.
2 Wɔbaabɔi Tsi Obɛŋkɛ Yehowa wolo lɛ kasemɔ yɛ Asafo Woloŋ Nikasemɔ lɛ shishi yɛ March mli. Mɛɛ gbɛ nɔ wɔɔtsɔ wɔná wɔnikasemɔ lɛ he sɛɛ babaoo? Hesaamɔ he miihia waa. Akɛ otsii enyɔ baakase yitso fɛɛ yitso, ni ato gbɛjianɔ koni akase kukuji fioo pɛ yɛ otsi fɛɛ otsi mli. Enɛ baaha oná be ni fa koni ojɛ nii ni okase, kɛ saji anɔ ni ojwɛŋ lɛ mli oha saji ahetoo kɛjɛ otsui mli. Kɛfata he lɛ, abaasusu kukuji ni faaa kwraa he yɛ otsii amli ni atiɔ saneyitso ko naagbee fãi amli yɛ mli lɛ mli, bɔni afee ni aná be ni akɛ wolo lɛ fã krɛdɛɛ nɛɛ atsu nii.
3 Kɛjɛ yitso 2 lɛ nɔ kɛyaa lɛ, akrabatsa ko ni hiɛ saneyitso akɛ “Sanebimɔi Kɛha Sane Nɔjwɛŋmɔ” yɛ yitso fɛɛ yitso naagbee gbɛ. Kɛ́ asusu naagbee kuku ni yɔɔ yitso lɛ mli lɛ he agbe naa lɛ, wolo nikasemɔ nɔkwɛlɔ lɛ baaha kuu lɛ asusu nɔ ni yɔɔ akrabatsa lɛ mli lɛ he. Ebaawo ekuu lɛ mlibii lɛ ahewalɛ koni amɛtsɔɔ amɛjwɛŋmɔ, ni ena yibiiwoo kpakpai ni ejɛ Ŋmalɛi lɛ anɔ ni amɛjwɛŋ lɛ mli kɛba. (Abɛi 20:5) Kɛfata sanebimɔi ni yɔɔ akrabatsa lɛ mli lɛ ahe lɛ, bei komɛi lɛ ebaanyɛ ebi saji ni tamɔ nɔ ni nyiɛ sɛɛ nɛɛ akɛ: “Mɛni sane nɛɛ tsɔɔ bo yɛ Yehowa he? Te esaa oshihilɛ he ehaa tɛŋŋ? Mɛɛ gbɛ nɔ obaanyɛ okɛtsu nii ni okɛye obua mɛi krokomɛi?” Oti ni esa akɛ ema ehiɛ ji, ni eha nyɛmimɛi lɛ ajɛ amɛtsui mli amɛha hetoo, jeee ni eka amɛ ekwɛ yɛ saji otii bibii ahe.
4 Tsi Obɛŋkɛ Yehowa wolo lɛ yɛ srɔto yɛ woji krokomɛi ni akaseɔ lɛ ahe. Eyɛ mli akɛ “tsulɔ anɔkwafo kɛ nilelɔ” lɛ woji lɛ fɛɛ woɔ Yehowa hiɛ nyam moŋ, shi yiŋtoo diɛŋtsɛ ni yɔɔ wolo nɛɛ sɛɛ ji ni akɛsusu Yehowa sui lɛ ahe. (Mat. 24:45-47) Mɛɛ hegbɛ ni yɔɔ miishɛɛ po kã wɔhiɛ nɛkɛ! Wɔbaaná Yehowa sui lɛ ahe nikasemɔ ni yaa shɔŋŋ lɛ ahe sɛɛ babaoo diɛŋtsɛ. Eba akɛ nikasemɔ lɛ baaye abua wɔ koni wɔtsi wɔbɛŋkɛ wɔŋwɛi Tsɛ lɛ gbagbalii, ni eba akɛ wɔhe aaasa jogbaŋŋ kɛye abua mɛi krokomɛi koni amɛfee nakai nɔŋŋ.