Mumɔŋ Niyenii yɛ Be ní Sa Mli
1. Ezekiel 36:29 lɛ miiná emlibaa ŋmɛnɛ yɛ mɛɛ gbɛ nɔ?
1 Nuŋtsɔ Maŋtsɛ Yehowa wie akɛ: “Matsɛ́ ŋmãa, ni maha efá, ni mikɛ hɔmɔ eŋmɛŋ nyɛnɔ.” (Ezek. 36:29) Gbalɛ mli wiemɔi nɛɛ kɔɔ Nyɔŋmɔ webii ahe ŋmɛnɛ. Yehowa miiha ŋmãa babaoo ni báa wala yi miikwɛ̃ miiha ewebii lɛ yɛ okadifeemɔ gbɛ nɔ. Mumɔŋ niyenii ni yɔɔ ebe naa ni akɛhaa yɛ wɔ kpokpaa wulu nɔ kpeei ashishi lɛ tsɔɔ anɔkwa sane nɛɛ mli faŋŋ.
2. Yehowa kɛ kpokpaa wulu nɔ kpeei etsu nii ni ekɛ mumɔŋ niyenii eha yɛ be ni sa mli yɛ mɛɛ gbɛ nɔ?
2 Yehowa kɛ gbɛtsɔɔmɔ ha ewebii lɛ koni amɛkɔ gbɛi hee—ni ji Yehowa Odasefoi lɛ amɛfɔ amɛnɔ yɛ kpee ko ni afee yɛ Columbus, Ohio, yɛ afi 1931 mli lɛ shishi. (Yes. 43:10-12) Yɛ afi 1935 lɛ, ayɔse asafo babaoo ni yɔɔ Kpojiemɔ 7:9-17 lɛ yɛ gbɛ ni ja nɔ. Yɛ afi 1942 lɛ, Nyɛminuu Knorr ha wiemɔ ni ji “Toiŋjɔlɛ—Ani Ebaanyɛ Ehi Shi Daa?” Nakai wiemɔ lɛ ha awo jeŋ muu fɛɛ shiɛmɔ nitsumɔ lɛ mli hewalɛ ni ato Buu-Mɔɔ Biblia Gilead Skul lɛ shishi. Eyɛ mli akɛ kpokpaa wulu nɔ kpeei lɛ ekomɛi ebafee nɔ ni hiɛ kpaaa nɔ moŋ, shi eko fɛɛ eko ji okpɔlɔ ni mumɔŋ niyenii kpakpa ni fa babaoo ni akɛha yɛ be ni sa nɔ lɛ yɔɔ nɔ.—Lala 23:5; Mat. 24:45.
3. Kɛ́ wɔmiisumɔ akɛ wɔná mumɔŋ okpɔlɔ ni abaaŋmɛ yɛ wɔ kpokpaa wulu nɔ kpee lɛ shishi lɛ he sɛɛ lɛ, no lɛ mɛni esa akɛ wɔfee?
3 Te Oyeɔ Nii Jogbaŋŋ Ohaa Tɛŋŋ? Kɛ́ wɔyɛ niyenii babaoo, shi kɛlɛ wɔbɔɔɔ mɔdɛŋ akɛ wɔɔye lɛ, ebaanyɛ eha wɔtara loo. (Abɛi 26:15) Nakai nɔŋŋ eji yɛ mumɔŋ gbɛfaŋ. Ayɔse yɛ kpokpaa wulu nɔ kpeei fioo komɛi ashishi akɛ, mɛi babaoo nyiɛɔ kɛkpaa shi loo amɛkɛ mɛi krokomɛi gbaa sane be mli ni nifeemɔ lɛ miiya nɔ. Eyɛ mli akɛ naanyobɔɔ ni tswaa mɔ emaa shi lɛ ji kpee lɛ fã ko ni he hiaa moŋ, shi be ni akɛfeɔ enɛ ji be ni nifeemɔi lɛ ejeko shishi loo be ni agbe naa. (Jaj. 3:1, 7) Kɛji akɛ wɔtaraaa shi ni wɔbo nifeemɔi lɛ atoi jogbaŋŋ lɛ, ekolɛ oti ko ni he hiaa baaŋmɛɛ wɔ. Ekolɛ bei komɛi lɛ kpee shishi nitsumɔi anɔkwɛlɔi loo nyɛmimɛi ni akɛ nifeemɔi ewo amɛdɛŋ lɛ baana akɛ ehe miihia ni amɛkpe kɛsusu kpee lɛ he nibii komɛi ahe be ni kpee lɛ yaa nɔ lɛ. Kɛ́ nɔ ko bɛ nakai lɛ, no lɛ esa akɛ amɛfee nɔkwɛmɔnɔ kpakpa kɛtsɔ nifeemɔ gbɛjianɔtoo lɛ ni amɛaabo toi jogbaŋŋ lɛ nɔ. Esaaa akɛ mumɔŋ niyenii ni akɛhaa lɛ eko kwraa ŋmɛɔ wɔteŋ mɔ ko mɔ ko.—1 Kor. 10:12; Fil. 2:12.
4. Mɛɛ gbɛ nɔ wɔbaanyɛ wɔtsɔɔ yɛ akɛ wɔhiɛ sɔɔ mumɔŋ niyenii babaoo ni Yehowa kɛhaa wɔ lɛ?
4 Kwɛ bɔ ni wɔmii shɛɔ wɔhe yɛ mumɔŋ anɔkwalei ni fa babaoo ni Yehowa kɛhaa ni yɔɔ srɔto yɛ Kristendom amale tsɔɔmɔi ni haa mɔ tãa lòo lɛ he lɛ he! (Yes. 65:13, 14) Gbɛ kome ni wɔɔtsɔ nɔ ‘wɔjie hiɛsɔɔ kpo’ ji ni wɔbu kpee lɛ akɛ hegbɛ ni wɔná ni Yehowa kɛaatsɔɔ wɔ nii. (Kol. 3:15) Gbalamɔ ojwɛŋmɔ kɛya wiemɔ lɛ nɔ shi jeee wielɔ lɛ nɔ, ni obu shɛɛ sane lɛ akɛ ejɛ wɔ ‘Tsɔɔlɔ Kpeteŋkpele’ lɛ ŋɔɔ. (Yes. 30:20, 21; 54:13) Bo sane toi jogbaŋŋ. Ŋmalamɔ saji otii kukuji oshwie shi. Tĩi gbi fɛɛ gbi nifeemɔi lɛ amli saji otii lɛ amli nakai gbi lɛ gbɛkɛ. Okɛ nɔ ni okase lɛ atsu nii.
5. Mɛɛ yiŋtoi ni wɔɔdamɔ nɔ wɔná miishɛɛ kpokpaa wulu nɔ kpeei haa wɔnáa?
5 Kpee fɛɛ kpee ni afeɔ kɛtsɔɔ Harmagedon hiɛ, kɛ́ afee yɛ abobaa ŋsara mli jio, yɛ maŋ ni awuɔ ta yɛ mli jio, loo yɛ he ni toiŋjɔlɛ yɔɔ jio lɛ, etsɔɔ akɛ aye Satan nɔ kunim! Ákɛ nyɛmimɛi ni efee ekome lɛ, wɔhiɛ sɔɔ hegbɛi ní wɔnaa akɛ wɔɔkpe kutuu yɛ kpokpaa wulu nɔ kpeei ashishi lɛ waa. (Ezek. 36:38) Wɔyɛ hekɛnɔfɔɔ akɛ Yehowa baajɛ suɔmɔ mli eha wɔ ‘niyenii yɛ be ní sa mli’ ekoŋŋ.—Luka 12:42.
[Caption on page 4]
Jiemɔ Hiɛsɔɔ Kpo Otsɔɔ Yehowa Okpɔlɔ lɛ Nɔ Nii
◼ Bó sane toi jogbaŋŋ
◼ Ŋmalamɔ saji otii oshwie shi
◼ Tĩi gbi fɛɛ gbi nifeemɔi lɛ amli saji otii lɛ amli nakai gbi lɛ gbɛkɛ
◼ Okɛ nɔ ni okase lɛ atsu nii