Lalai ni Haa Mɔ Tsui Nyɔɔ Emli
1 Lalai ni aláa, kɛ lalatswaa ji nifeemɔ ko ni he hiaa yɛ anɔkwa jamɔ mli. Asaf kɛ enyɛmimɛi hii lɛ lá yɛ blema Israel akɛ: “Nyɛdaa Yehowa shi, . . . Nyɛláa nyɛhaa lɛ! Nyɛláa nyɛjiea eyi! Nyɛsusua enaakpɛɛ nitsumɔi lɛ fiaa he!” (1 Kron. 16:8, 9) Ŋmɛnɛ, wɔwoɔ wɔgbee nɔ wɔláa wɔhaa Yehowa yɛ asafoŋ kpeei ni wɔfeɔ daa otsi lɛ ashishi. (Efe. 5:19) Mɛɛ hegbɛ ni yɔɔ nyam eji nɛkɛ ákɛ akɛ yijiemɔ aaaha egbɛi lɛ!—Lala 69:31.
2 Kingdom Melodies (Maŋtsɛyeli Lalai ni akɛ Saŋku Pɛ Tswa) kɛ Maŋtsɛyeli lalai ni lalɔi akuu tswa lɛ atoiboo baanyɛ aha wɔjwɛŋmɔŋ mli ayi obɔ kɛ mumɔŋ nibii. Nyɛmi yoo ko kɛɛ akɛ: “Be mli ni atswaa lalai lɛ, mikaiɔ amɛmli wiemɔi lɛ yɛ mijwɛŋmɔ mli. Kwɛ bɔ ni ehi jogbaŋŋ akɛ masusu Yehowa he be mli ni miboɔ lala toi kɛ miishɛɛ lɛ!”—Fil. 4:8.
3 Be Mli ni Obaaná Amɛ Toiboo He Miishɛɛ: Kingdom Melodies ni atswaa yɛ shia mli lɛ kɛ mumɔŋ shihilɛ kpakpa baa ni eyeɔ ebuaa ni toiŋjɔlɛ baa weku lɛ mli. Weku ko ŋma akɛ: “Wɔtswaa [lala] nɛɛ shii abɔ yɛ wɔshia kɛ kar mli, ni ejeee wɔ tsine yɛ bɔ ni ato lala lɛ he gbɛjianɔ jogbaŋŋ aha lɛ hewɔ. Bei babaoo lɛ Kingdom Melodies lɛ haa wɔ jwɛŋmɔ ni ja kɛ́ wɔmiisaa wɔhe kɛha Kristofoi akpeei aloo wɔmiifã gbɛ kɛmiiya kpokpaa nɔ kpee.” Nyɛmi yoo ko kɛɛ akɛ: “Eji nɔ ni yɔɔ miishɛɛ akɛ mabo amɛtoi be mli ni mitsuɔ shia nitsumɔ lɛ—namɔ kwraa baasusu akɛ maná miishɛɛ kɛ́ miikota nibii ni afɔ he lɛ? Mito gbɛjianɔ koni matswa lalai nɛɛ be mli ni mikɛ nijiaŋwujee ko miikpe. Lala lɛ ŋɔɔmɔ lɛ náa minɔ hewalɛ waa! . . . Lala lɛ eko fɛɛ eko haa mɔ náa miishɛɛ.” Ani bei komɛi yɛ ni nɛkɛ lalai ni haa mɔ tsui nyɔɔ emli nɛɛ ahe baaba sɛɛnamɔ kɛha bo?
4 Lalai babaoo ni yɔɔ ŋmɛnɛ lɛ jieɔ je lɛ mumɔ lɛ kpo. Fɔlɔi baanyɛ aye abua amɛbii lɛ koni amɛná suɔmɔ amɛha lalai ni sɛɛnamɔ yɔɔ he kɛtsɔ Kingdom Melodies lɛ ni amɛkɛaatsu nii jogbaŋŋ lɛ nɔ. Biblia kaselɔi babaoo kɛ mɛi ni yɔɔ wiemɔ lɛ he miishɛɛ lɛ baasumɔ akɛ amɛbo nɛkɛ mumɔŋ lalai ni ŋɔɔ ni kɛ anunyam haa Yehowa, ni woɔ mɔ mumɔ mli hewalɛ nɛɛ atoi.—Lala 47:2, 3, 7, 8.