“Nyɛhaa Nyɛmli Alɛɛa”
1. Mɛɛ gbɛnaa nii kã wɔteŋ mɔ fɛɛ mɔ nɔ?
1 Yɛ Kristofoi anyɛmifeemɔ lɛ mli lɛ, gbɛnaa nii kã wɔteŋ mɔ fɛɛ mɔ nɔ akɛ eha miishɛɛ ahi asafo lɛ mli. (1 Pet. 1:22; 2:17) Wɔnáa miishɛɛ ni tamɔ nɛkɛ kɛ́ wɔha hedɔɔ ni wɔyɔɔ kɛha wɔhe lɛ ‘mli lɛɛ.’ (2 Kor. 6:12, 13) Mɛni hewɔ ehe hiaa ni wɔle wɔnyɛmimɛi hii kɛ yei lɛ jogbaŋŋ lɛ?
2. Mɛni hewɔ ehe hiaa ni wɔkɛ nanemɛi heyelilɔi abɔ naanyo lɛ?
2 Ehãa Naanyobɔɔ Mli Waa: Kɛ́ wɔná wɔle nanemɛi heyelilɔi jogbaŋŋ lɛ, ehaa wɔnáa bulɛ kɛhaa amɛhemɔkɛyeli, tsuishiŋmɛɛ, kɛ amɛsui kpakpai krokomɛi lɛ waa. Amɛtɔmɔi bafeɔ bibii kwraa kɛhaa wɔ, ni ehãa naanyobɔɔ wekukpãa lɛ mli waa. Kɛ́ wɔná wɔle wɔhe jogbaŋŋ lɛ, esáa wɔ jogbaŋŋ koni wɔwowoo wɔhe hewalɛ ni wɔshɛjeshɛje wɔhe mii. (1 Tes. 5:11) Wɔbaanyɛ wɔtsɔmɔ “tsuiwoo” nɔ̃ wɔha wɔhe koni wɔkɛte shi wɔwo hewalɛ gbonyo ni Satan je lɛ náa yɛ mɛi anɔ lɛ. (Kol. 4:11) Yɛ naagbee gbii ni mli wa nɛɛ hewɔ lɛ, kwɛ bɔ ni wɔdaa shi wɔhaa akɛ wɔyɛ nanemɛi kpakpai yɛ Yehowa webii ateŋ!—Abɛi 18:24.
3. Mɛɛ gbɛ nɔ wɔɔtsɔ wɔtsɔmɔ tsuiwoo nɔ̃ wɔha mɛi krokomɛi?
3 Nanemɛi ni bɛŋkɛ wɔ kpaakpa lɛ baanyɛ afee hewalɛwoo kɛ miishɛjemɔ kpele jɛɛhe kɛha wɔ beni wɔkɛ kaai ni mli wawai kpeɔ lɛ. (Abɛi 17:17) Kristofonyo ko ni henumɔ ni eyɔɔ akɛ ehe bɛ sɛɛnamɔ lɛ hao lɛ lɛ wie akɛ: “Miyɛ nanemɛi ni wieɔ mihe saji kpakpai koni eye ebua mi ni maye susumɔi gbohii ni mihiɛ lɛ anɔ.” Nanemɛi ni tamɔ nɛkɛ lɛ ji nikeenii ni jɛ Yehowa ŋɔɔ.—Abɛi 27:9.
4. Mɛɛ gbɛ nɔ wɔɔtsɔ wɔle mɛi krokomɛi jogbaŋŋ yɛ asafo lɛ mli?
4 Ná Mɛi Krokomɛi Ahe Miishɛɛ: Mɛɛ gbɛ nɔ wɔɔtsɔ wɔha hedɔɔ ni wɔyɔɔ kɛha wɔnanemɛi heyelilɔi lɛ mli alɛɛ? Kɛfata ŋamɔ ni oooŋa amɛ yɛ Kristofoi akpeei ashishi lɛ he lɛ, bɔɔ mɔdɛŋ ni okɛ amɛ agba sane ni shishinumɔ yɔɔ mli. Ná amɛhe miishɛɛ, shi kaafee ohe mɔ ni kɛ ehe woɔ amɛteemɔŋ saji amli. (Fil. 2:4; 1 Pet. 4:15) Gbɛ kroko ni wɔɔtsɔ nɔ wɔbɛŋkɛ mɛi krokomɛi ji ni wɔfɔ̃ amɛnine kɛba wɔshia ni wɔkɛ amɛ aye nii. (Luka 14:12-14) Aloo obaanyɛ oto gbɛjianɔ koni okɛ amɛ atsu nii yɛ shiɛmɔ nitsumɔ lɛ mli. (Luka 10:1) Kɛ́ wɔtsɔ hiɛ koni wɔle wɔnyɛmimɛi lɛ jogbaŋŋ lɛ, wɔhaa ekomefeemɔ ni yɔɔ asafo lɛ mli lɛ yaa hiɛ.—Kol. 3:14.
5. Mɛni ji gbɛ kome ni wɔɔtsɔ nɔ wɔlɛɛ wɔ naanyobɔɔ lɛ mli?
5 Ani wɔhalaa wɔtipɛŋfoi loo mɛi ni nyaa nibii ni wɔnyaa he lɛ ahe lɛ pɛ akɛ wɔnanemɛi ni bɛŋkɛ wɔ kpaakpa? Esaaa akɛ wɔhaa nibii ni tamɔ enɛɛmɛi haa husu hiɔ naanyo ni wɔbɔɔ yɛ asafo lɛ mli lɛ he. David kɛ Yonatan, kɛ agbɛnɛ hu Rut kɛ Naomi ná naanyobɔɔ wekukpaa ni mli wa yɛ srɔtofeemɔ ni yɔɔ afii ni amɛye kɛ shihilɛ mli ni amɛjɛ lɛ fɛɛ sɛɛ. (Rut 4:15; 1 Sam. 18:1) Ani obaanyɛ oha onaanyobɔɔ lɛ mli alɛɛ? Nakai feemɔ baanyɛ aha aná jɔɔmɔi ni akpaaa gbɛ.
6. Mɛni ji sɛɛnamɔi komɛi ni yɔɔ hedɔɔ ni wɔyɔɔ kɛha wɔnyɛmimɛi lɛ mli ni wɔɔlɛɛ lɛ he?
6 Kɛ́ wɔha hedɔɔ ni wɔyɔɔ kɛha mɛi krokomɛi lɛ mli lɛɛ lɛ, wɔkɛwoɔ wɔhe hewalɛ ni ehaa toiŋjɔlɛ ni yɔɔ asafo lɛ mli lɛ yaa hiɛ. Kɛfata he lɛ, Yehowa diɛŋtsɛ jɔɔ wɔ yɛ suɔmɔ kpo ni wɔjieɔ wɔtsɔɔ wɔnyɛmimɛi lɛ hewɔ. (Lala 41:2, 3; Heb. 6:10) Mɛni hewɔ okɛfeee oti ni ma ohiɛ akɛ obaale mɛi babaoo jogbaŋŋ bɔ ni ooonyɛ?