Awoɔ Tsuishiŋmɛɛ He Nyɔmɔ
1 “Tsuishiŋmɛɛ nyɛkɛaahere nyɛsusumai lɛ.” (Luka 21:19) Nakai wiemɔi ni fata Yesu gbalɛ ni kɔɔ ‘nibii agbɛjianɔtoo lɛ naagbee’ lɛ he lɛ feɔ lɛ faŋŋ akɛ, kɛ́ wɔɔhiɛ wɔ emuuyeli lɛ mli lɛ, no lɛ esa akɛ wɔfee klalo akɛ wɔkɛ kaai babaoo baakpe. Shi yɛ Yehowa hewalɛ naa lɛ, wɔteŋ mɔ fɛɛ mɔ baanyɛ ‘ahiɛ mli kɛyawulaa shi’ ni ‘ahere eyiwala.’—Mat. 24:3, 13; Fil. 4:13.
2 Yiwaa, gbɔmɔtsoŋ hewalɛnamɔ mli naagbai, shika he naagbai, kɛ henumɔŋ nɔnyɛɛ baanyɛ aha gbi fɛɛ gbi afee nɔ ni kaa mɔ. Shi kɛlɛ, esaaa akɛ wɔhiɛ kpaa nɔ kɔkɔɔkɔ akɛ Satan miibɔ mɔdɛŋ koni efite emuuyeli mli ni wɔhiɛ wɔha Yehowa lɛ. Gbi fɛɛ gbi ni wɔyeɔ wɔ-Tsɛ lɛ anɔkwa lɛ, ebafeɔ gbi kroko ni wɔfataa he kɛhaa Ahorabɔlɔ lɛ mpoatswaa lɛ hetoo. Kwɛ jɔɔmɔ ni eji akɛ wɔɔle akɛ hiɛ kpaaa ‘wɔyaafonui’ lɛ anɔ be mli ni wɔkɛ kaai miikpe! Wɔyaafonui lɛ ajara wa yɛ Yehowa hiɛ, ni anɔkwa ni wɔyeɔ lɛ lɛ haa etsui nyaa!—Lala 56:9; Abɛi 27:11.
3 Kaai Tsuuɔ Wɔhe: Nɔnaa baanyɛ ajie hemɔkɛyeli mli gbɔjɔmɔ loo su fɔŋ ko, tamɔ henɔwomɔ loo tsuishiŋmɛɛ ni abɛ lɛ kpo. Yɛ nɔ najiaŋ ni wɔɔtsɔ gbɛ̀i ni kɛ ŋmalɛ kpãaa gbee anɔ wɔjo kaai anaa foi loo wɔha amɛba naagbee lɛ, esa akɛ wɔbo ŋaawoo ni jɛ Nyɔŋmɔ Wiemɔ lɛ mli akɛ ‘wɔha tsuishiŋmɛɛ lɛ agbe enitsumɔ naa kɛwula shi’ lɛ toi. Mɛni hewɔ? Ejaakɛ anɔkwayeli ni wɔkɛŋmɛɔ wɔtsui shi yɛ kaai amli lɛ yeɔ ebuaa wɔ koni ‘wɔhi kɛwula shi, ni wɔye emuu.’ (Yak. 1:2-4) Tsuishiŋmɛɛ hu baanyɛ aye abua wɔ koni wɔná sui kpakpai tamɔ hiɛshikamɔ, musuŋtsɔlɛ kɛ mɔbɔnalɛ.—Rom. 12:15.
4 Hemɔkɛyeli ni Aka Akwɛ: Kɛ́ wɔŋmɛ wɔtsui shi yɛ kaa mli lɛ, wɔnáa hemɔkɛyeli ni aka akwɛ ni jara wa waa yɛ Nyɔŋmɔ hiɛ. (1 Pet. 1:6, 7) Hemɔkɛyeli ni tamɔ nɛkɛ lɛ wajeɔ wɔ koni wɔfĩ shi yɛ kaai ni baaba wɔnɔ wɔsɛɛ lɛ amli. Kɛfata he lɛ, wɔbaanyɛ wɔnu he akɛ Nyɔŋmɔ kpɛlɛɔ wɔnɔ, ni enɛ woɔ hiɛnɔkamɔ ni wɔyɔɔ lɛ mli hewalɛ ni ebafeɔ nɔ ni yɔɔ diɛŋtsɛ kɛha wɔ.—Rom. 5:3-5.
5 Yakobo 1:12 lɛ maa nyɔmɔwoo ni fe fɛɛ ni yɔɔ tsuishiŋmɛɛ he lɛ nɔ mi akɛ: “Ajɔɔ nuu ni ŋmɛɔ etsui shi yɛ kaa mli lɛ, ejaakɛ, kɛ aka lɛ ni esa lɛ, eeená wala akekere.” No hewɔ lɛ, nyɛhaa wɔfĩa shi shiŋŋ yɛ wɔhe ni wɔtuu wɔha Yehowa lɛ mli, ni wɔná nɔmimaa akɛ ebaawo “mɛi ni sumɔɔ lɛ lɛ” nyɔmɔ babaoo.