Fã 2—Ní Wɔɔfee Biblia Mli Nikasemɔi ni Yaa Hiɛ
Hesaamɔ Kɛha Nikasemɔ lɛ Feemɔ
1 Ní wɔɔtsɔɔ nii yɛ gbɛ ni mɔɔ shi nɔ yɛ Biblia nikasemɔ feemɔ mli lɛ biɔ babaoo fe sane ni akaseɔ lɛ he ni wɔɔwie kɛ ŋmalɛi ni aŋmalako amɛmli wiemɔi lɛ ni wɔɔkane lɛ kɛkɛ. Ehe miihia ni wɔkɛ sane lɛ aha yɛ gbɛ ni baasa nikaselɔ lɛ tsui he lɛ nɔ. Enɛ biɔ ni wɔsusu nikaselɔ lɛ he ni wɔkɛsaa wɔhe jogbaŋŋ.—Abɛi 15:28.
2 Gbɛ Nɔ ni Oootsɔ Osaa Ohe: Okɛ sɔlemɔ ni ooosɔle oha Yehowa yɛ nikaselɔ lɛ kɛ ehiamɔ nii ahe lɛ aje ohesaamɔ lɛ shishi. Bi Yehowa ni eye ebua bo ni oshɛ nikaselɔ lɛ tsui he. (Kol. 1:9, 10) Bɔni afee ni onu sane oti ni yɔɔ nikasemɔ lɛ mli lɛ shishi jogbaŋŋ lɛ, ŋɔɔ be fioo ni okɛsusu nikasemɔ lɛ saneyitso lɛ, emli saneyitsei bibii lɛ kɛ mfonirii lɛ ahe. Bi ohe akɛ, ‘Mɛni ji yiŋtoo titri ni yɔɔ nikasemɔ lɛ sɛɛ?’ Enɛ baaye abua bo ni omamɔ saji otii lɛ anɔ mi be mli ni ofeɔ nikasemɔ lɛ.
3 Too otsui shi ni osusu nikasemɔ lɛ kuku fɛɛ kuku he jogbaŋŋ. Taomɔ sanebimɔi ni akala lɛ ahetooi, ni ofɔlɔ wiemɔi loo wiemɔi kukuji ni ji otii lɛ pɛ ashishi. Pɛimɔ bɔ ni ŋmalɛi ni aŋmalako amɛmli wiemɔi lɛ kɔɔ sane oti ni yɔɔ kuku lɛ mli lɛ he ehaa lɛ mli, ni ohala amɛmli nɔ ni nyɛbaakane beni nyɛkaseɔ nii lɛ. Saji otii fioo komɛi ni kɔɔ ŋmalɛi lɛ ahe ni oooŋmala yɛ wolo lɛ baafai lɛ anaabugbɛ lɛ baanyɛ aye abua bo. Esa akɛ nikaselɔ lɛ ana faŋŋ akɛ nɔ ni ekaseɔ lɛ jɛ Nyɔŋmɔ Wiemɔ lɛ mli.—1 Tes. 2:13.
4 Ha Nikasemɔ lɛ Akɔ Mɔ lɛ He: No sɛɛ lɛ, ha nikaselɔ lɛ ahi ojwɛŋmɔ mli be mli ni osusuɔ nikasemɔ lɛ he lɛ. Bɔɔ mɔdɛŋ ni otsɔ hiɛ osusu saji ni ebaanyɛ ebi kɛ saji ni amɛ shishinumɔ loo amɛ nɔkpɛlɛmɔ baawa kɛha lɛ lɛ ahe. Bi ohe akɛ: ‘Mɛni ehe hiaa ni enu shishi loo etsu he nii koni enyɛ eya ehiɛ yɛ mumɔŋ? Mɛɛ gbɛ nɔ matsɔ mashɛ etsui he?’ No sɛɛ lɛ, ha onitsɔɔmɔ lɛ akɔ mɔ lɛ he yɛ gbɛ ni ja nɔ. Bei komɛi lɛ, ekolɛ obaana akɛ ehe baahia ni oto nɔkwɛmɔnɔ ko, sane mlitsɔɔmɔ loo sanebimɔi srɔtoi ahe gbɛjianɔ koni eye ebua nikaselɔ lɛ ni enu sane oti ko loo ŋmalɛ ko shishi. (Neh. 8:8) Shi okɛ saji krokomɛi ni kɔɔɔ saneyitso lɛ he lɛ akafata he. Saji lɛ ni nyɛaatĩ mli kuku yɛ nikasemɔ lɛ naagbee lɛ baaye abua ni saji otii lɛ aka ejwɛŋmɔ mli.
5 Kwɛ miishɛɛ ni wɔnáa kɛ́ mɛi heei wo jalɛ yibii kɛjie Yehowa yi! (Fil. 1:11) Bɔni afee ni oye obua amɛ ni amɛshɛ nakai oti lɛ he lɛ, saamɔ ohe jogbaŋŋ be fɛɛ be ni ooofee Biblia mli nikasemɔ lɛ.