Kpokpaa nɔ Kpee He Gbɛjianɔtoo Hee

Kɛ́ Yehowa aaakpɛlɛ wɔnɔ bianɛ kɛ daa yɛ “naagbee gbii” nɛɛ amli lɛ, no lɛ ehe miihia ni wɔná Nyɔŋmɔ he nilee. (2 Tim. 3:1) Abaatsɔ kpokpaa nɔ kpee he gbɛjianɔtoo kɛha afi 2005 sɔɔmɔ afi lɛ saneyitso ni ji “Ha ‘Nilee ni Jɛ Ŋwɛi’ lɛ Akudɔ Bo” lɛ he wiemɔ nɔ aha wɔ hewalɛwoo kɛ ŋaawoo ni anyɛɔ atsuɔ he nii.—Yak. 3:17.

Klɛŋklɛŋ wiemɔ ni ahaa kɛtsaraa nɔ, ni yitso ji “Ní Wɔkɛ ‘Nilee ni Jɛ Ŋwɛi lɛ’ Aaatsu Nii yɛ Wɔshihilɛ Mli” lɛ baaye abua wɔ koni wɔnu nɔ ni mɔ he ni aaatse, toiŋjɔlɛ sɛɛgbɛ ni aaatao, hiɛ ni aaaka shi, kɛ klalo ni aaafee kɛfee toiboo lɛ tsɔɔ lɛ shishi. No sɛɛ lɛ kpokpaa nɔkwɛlɔ lɛ baawie nilee ni jɛ ŋwɛi lɛ fãi etɛ ni eshwɛ lɛ ahe. Kpokpaa wulu nɔkwɛlɔ lɛ baatsɔɔ bɔ ni eyɛ mli akɛ mɛi buɔ Kristofoi sɔɔlɔi akɛ ‘mɛi ni jeee woloŋlelɔi kɛ nilelɔi’ moŋ, shi awula amɛ koni amɛjaje Nyɔŋmɔ he nilee lɛ mli kɛmu gbi lɛ kpee lɛ naa.—Bɔf. 4:13.

Yɛ gbi ni ji enyɔ lɛ nɔ lɛ, wiemɔ ni ahaa kɛtsaraa nɔ ni yitso ji “Tiumɔ Nibii ni Tswaa Mɔ Emaa Shi lɛ Asɛɛ” lɛ baaye abua wɔ koni wɔyɔse nibii ni baanyɛ agbɔjɔ wɔ yɛ mumɔŋ lɛ ni wɔkwa amɛ. Ebaatsɔɔ wɔ gbɛ nɔ ni wɔbaatsɔ wɔwo mɛi krokomɛi hewalɛ yɛ asafoŋ kpeei ashishi, yɛ shiɛmɔ nitsumɔ lɛ mli, kɛ yɛ weku kɔkrɔɔ lɛ mli hu. Maŋshiɛmɔ ni yitso ji “Bɔ ni Nyɔŋmɔ He Nilee He Baa Sɛɛnamɔ Kɛhaa Wɔ” lɛ baaha hiɛsɔɔ ni wɔyɔɔ kɛha sɛɛnamɔi ni jɛɔ Nyɔŋmɔ shishitoo mlai lɛ ni wɔkɛtsuɔ nii yɛ wɔshihilɛ mli kɛbaa lɛ mli akwɔ. Naagbee wiemɔ ni ji “Nyɔŋmɔ He Nilee ni Wɔkɛaatsu Nii lɛ Buɔ Wɔhe” lɛ baawo wɔfai shi ni wɔtswa akɛ wɔbaatao nilee kɛjɛ Yehowa ŋɔɔ yɛ naagbee gbii nɛɛ amli lɛ mli hewalɛ.

Kpee fɛɛ kpee mli nifeemɔ titri ji kaselɔi heei abaptisimɔ. Abaatsu Teokrase Sɔɔmɔ Skul lɛ kɛ Buu-Mɔɔ Nikasemɔ kɛha otsi lɛ hu he nii yɛ kpee lɛ shishi. Yehowa suɔmɔnaa nii ji akɛ wɔ fɛɛ wɔná nilee ni ekɛhaa lɛ he sɛɛ. Ŋaawoo kɛ hewalɛwoo ni akɛbaaha wɔ yɛ kpokpaa nɔ kpee ni kã wɔhiɛ lɛ mli lɛ baaha wɔya hiɛ yɛ mumɔŋ.—Abɛi 3:13-18.