Jiemɔ Yehowa Yi yɛ Emlihilɛ lɛ Hewɔ
Abaakai Kristo Gbele lɛ yɛ March 24
1. Yehowa jie mlihilɛ kpo etsɔɔ wɔ yɛ mɛɛ gbɛ nɔ?
1 Lalatsɛ lɛ bo akɛ: “Esa akɛ amɛjie Yehowa yi yɛ emlihilɛ kɛ enaakpɛɛ nii ni etsuɔ ehaa gbɔmɛi abii lɛ ahewɔ.” (Lala 107:8) Nyɔŋmɔ mlihilɛ lɛ fe musuŋtsɔlɛ henumɔ ko kɛkɛ ni eyɔɔ kɛha gbɔmɛi. Afee enɛ faŋŋ yɛ yijiemɔ wiemɔ ko ni ajɛ mumɔŋ aŋma lɛ mli akɛ: ‘Yehowa, omlihilɛ lɛ hiɛ mimli.’ (Lala 94:18) Mɛɛ mlihilɛ ni ekaaa po Yehowa jie lɛ kpo nɛkɛ be ni ekɛ e-Bi koome lɛ ha yɛ wɔ hewɔ lɛ!—1 Yoh. 4:9, 10.
2. Mɛɛ gbɛ nɔ wɔɔtsɔ wɔjie hiɛsɔɔ ni wɔyɔɔ kɛha Yehowa lɛ kpo?
2 Mɛɛ gbɛ nɔ wɔbaanyɛ wɔtsɔ wɔda ‘mlihilɛ Nyɔŋmɔ’ lɛ shi be ni Kristo gbele lɛ Kaimɔ lɛ bɛŋkɛɔ lɛ? (Lala 59:18) Esa akɛ wɔteŋ mɔ fɛɛ mɔ atao be koni ekɛjwɛŋ naagbee gbii ni Yesu ye yɛ shikpɔŋ lɛ nɔ lɛ he. (Lala 143:5) Ehe baaba sɛɛnamɔ kɛha wɔ akɛ wɔɔnyiɛ Biblia kanemɔ he gbɛjianɔ krɛdɛɛ ni ato kɛha Kaimɔ lɛ sɛɛ, taakɛ ato he gbɛjianɔ yɛ Ŋmalɛi lɛ Amli ni Wɔɔkwɛ Daa—2005 lɛ mli lɛ, ni kɛ́ eeehi lɛ wɔkane, ni wɔtao saji krokomɛi amli yɛ Gbɔmɔ ni Fe Mɔ Fɛɛ Mɔ wolo lɛ yitso 112-116 lɛ kɛ Biblia kasemɔ woji krokomɛi amli. Jwɛŋmɔ saji ni okaneɔ lɛ anɔ, koni onu shishi jogbaŋŋ. (1 Tim. 4:15) Sɔlemɔ ni wɔkɛjwɛŋɔ Nyɔŋmɔ Wiemɔ lɛ nɔ lɛ wooo wɔtsui hewalɛ pɛ kɛkɛ, shi moŋ etsɔɔ suɔmɔ ni wɔyɔɔ kɛha Yehowa hu.—Mat. 22:37.
3, 4. (a) Mɛɛ gbɛ nɔ wɔbaanyɛ wɔtsɔ wɔkase su ni wɔnyɛmimɛi ni yɔɔ Liberia lɛ jie lɛ kpo lɛ? (b) Namɔ okpɛ oyiŋ okɛ obaafɔ̃ lɛ nine kɛba Kaimɔ lɛ?
3 Wó Mɛi Krokomɛi Hewalɛ Koni Amɛjie Nyɔŋmɔ Yi: Nyɛsɛɛ afi lɛ mɛi 16,760,607 tee Kaimɔ lɛ yɛ jeŋ fɛɛ. Yɛ Liberia akrowa ko mli lɛ, nyɛmimɛi lɛ ŋma wolo kɛyaha akrowa lɛ mli maŋtsɛ lɛ, ni amɛkɛɛ lɛ akɛ amɛmiisumɔ ni amɛye Nuŋtsɔ lɛ Gbɛkɛnaashi Niyenii lɛ he gbi jurɔ yɛ emaŋ lɛ mli. Maŋtsɛ lɛ kɛ bɔɔlutswaahe ko ha nyɛmimɛi lɛ kɛha nifeemɔ lɛ, ni eha atswa adafi kɛfɔ̃ mɛi fɛɛ ni yɔɔ maŋ lɛ mli lɛ anine koni amɛba. Eyɛ mli akɛ shiɛlɔi enumɔ pɛ yɔɔ nakai akrowa lɛ mli moŋ, shi mɛi 636 ba Kaimɔ lɛ!
4 Nakai nɔŋŋ esa akɛ wɔ hu wɔye wɔbua mɛi babaoo bɔ ni wɔɔnyɛ koni amɛbafata wɔhe kɛye Kaimɔ lɛ he gbi jurɔ lɛ. Mɛni hewɔ oŋmalaaa mɛi ni obaasumɔ ni ofɔ̃ amɛ nine lɛ agbɛi? Abaanyɛ akɛ mfonirii ni yɔɔ March 8 Awake! lɛ kɛ March 15 Buu-Mɔɔ lɛ sɛɛ lɛ afɔ̃ mɛi anine. Abaanyɛ akɛ Kaimɔ lɛ he ninefɔɔ woji ni akala lɛ hu afɔ̃ mɛi anine. Taipimɔ loo ŋmaa be, kɛ he ni abaaye kaimɔ lɛ yɛ wolo lɛ nɔ jogbaŋŋ, koni oha mɔ fɛɛ mɔ ni ofɔ̃ɔ lɛ nine lɛ ekome. Kɛ́ March 24 miihe abɛŋkɛ lɛ, kuu osɛɛ oya ni oyakai mɛi fɛɛ ni ofɔ̃ amɛ nine lɛ, koni oma gbɛjianɔi fɛɛ ni okɛ amɛ eto lɛ nɔ mi.
5. Mɛɛ gbɛ nɔ wɔbaanyɛ wɔtsɔ wɔwo Biblia mli nikaselɔi ahewalɛ koni amɛba?
5 Mɛɛ gbɛ nɔ wɔbaanyɛ wɔtsɔ wɔye wɔbua wɔ Biblia mli nikaselɔi ni ejeko kpeei baa shishi lɛ koni amɛba nifeemɔ lɛ shishi ni amɛná he sɛɛ jogbaŋŋ kɛmɔ shi? Okɛ minitii fioo ko atsu nii ni oha amɛnu bɔ ni Kaimɔ lɛ yeli he hiaa ha lɛ shishi yɛ nikasemɔ fɛɛ nikasemɔ mli. Abaanyɛ aná saji ni hi jogbaŋŋ yɛ March 15, 2004, Buu-Mɔɔ lɛ baafa 3-7, kɛ Reasoning wolo lɛ baafa 266-269 lɛ mli.
6. Mɛni hewɔ ehe hiaa akɛ wɔhere gbɔi atuu yɛ Kaimɔ lɛ shishi lɛ?
6 Heremɔ Gbɔi ni Baa lɛ Atuu: Heremɔ gbɔi ni baaba lɛ atuu, ni okɛ amɛ agba sane yɛ Kaimɔ lɛ shishi. (Rom. 12:13) Too gbɛjianɔ koni okɛ mɛi ni ofɔ̃ amɛ nine lɛ ata hekome, ní okwɛ ni amɛhiɛ Biblia kɛ lala wolo. Ehe miihia titri ni wɔ klɛŋklɛŋ wɔŋã nyɛmimɛi hii kɛ yei ni ekpa shiɛmɔyaa, shi amɛbɔ mɔdɛŋ amɛba lɛ. Ekolɛ suɔmɔ mli ni wɔɔjɛ wɔná amɛhe miishɛɛ lɛ baaye abua amɛ koni amɛkɛ asafo lɛ abɔ̃i bɔɔ daa ekoŋŋ. (Luka 15:3-7) Yɛ nifeemɔ ni yɔɔ krɔŋkrɔŋ fe fɛɛ nɛɛ shishi lɛ, eba akɛ wɔɔfee bɔ fɛɛ bɔ ni wɔɔnyɛ koni wɔkɛwo mɛi krokomɛi hewalɛ ni amɛfata wɔhe kɛjie Yehowa yi yɛ “emlihilɛ ni yɔɔ naakpɛɛ” lɛ hewɔ.—Lala 31:22.