Tsɔɔmɔ Heshibalɔi Anii Koni Amɛnyiɛ Nyɔŋmɔ Gbɛ lɛ Nɔ
1. Mɛni kaselɔi ni aaafee lɛ biɔ?
1 Awie Kristo kaselɔi ni hi shi yɛ klɛŋklɛŋ afii 100 lɛ mli lɛ ahe akɛ amɛfata “Gbɛ Lɛ” he. (Bɔf. 9:2, NW) Anɔkwa Kristofonyo ni mɔ ko ji lɛ kɔɔ eshihilɛ gbɛ fɛɛ he. (Abɛi 3:5, 6) No hewɔ lɛ, kɛ́ wɔmiifee Biblia mli nikasemɔi lɛ, ehe miihia ni wɔfee babaoo fe nɔ ni wɔɔha mɛi aná Biblia mli tsɔɔmɔi lɛ ahe anɔkwa nilee kɛkɛ. Esa akɛ wɔye wɔbua Biblia mli nikaselɔi lɛ hu koni amɛnyiɛ Yehowa gbɛ lɛ nɔ.—Lala 25:8, 9.
2. Mɛni baanyɛ akanya Biblia mli nikaselɔ ko ni eye Nyɔŋmɔ kitãi lɛ anɔ?
2 Suɔmɔ Kɛha Yehowa kɛ Yesu: Kwɛ bɔ ni ewa kɛha adesai ni yeee emuu lɛ akɛ amɛaaha amɛjwɛŋmɔ, amɛnifeemɔi, amɛwiemɔi, kɛ amɛjeŋba kɛ Nyɔŋmɔ suɔmɔnaa nifeemɔ akpã gbee! (Rom. 7:21-23; Efe. 4:22-24) Shi kɛlɛ, suɔmɔ kɛha Nyɔŋmɔ kɛ e-Bi lɛ kanyaa heshibalɔi koni amɛtsu nifeemɔ ni wa nɛɛ he nii. (Yoh. 14:15; 1 Yoh. 5:3) Te wɔɔfee tɛŋŋ wɔye wɔbua wɔ-Biblia mli nikaselɔi lɛ ni amɛná suɔmɔ nɛɛ?
3. Te wɔɔfee tɛŋŋ wɔye wɔbua nikaselɔi lɛ koni amɛná suɔmɔ kɛha Yehowa kɛ Yesu?
3 Ye obua onikaselɔ lɛ koni ebale nɔ̃ mɔ ni Yehowa ji. Nyɛmi nuu ko tsɔɔ mli akɛ, “Gbɔmɛi nyɛŋ asumɔ mɔ ko ni amɛleee lɛ, no hewɔ lɛ yɛ nikasemɔ lɛ shishijee tɔ̃ɔ lɛ, mitsɔɔ amɛ Nyɔŋmɔ gbɛi yɛ Biblia lɛ mli, ni mitaoɔ hegbɛi ni mikɛma Yehowa sui lɛ anɔ mi.” Gbɛ ni hi fe fɛɛ ni aaatsɔ nɔ afee enɛ ji ní ama nɔkwɛmɔnɔ ni Yesu fee efɔ̃ shi lɛ nɔ mi. (Yoh. 1:14; 14:9) Kɛfata he lɛ, okɛ akrabatsa ni akɛtĩɔ saji amli ni yɔɔ Biblia lɛ Tsɔɔ wolo lɛ yitso fɛɛ yitso naagbee lɛ atsu nii ni okɛye obua nikaselɔ lɛ koni esusu Nyɔŋmɔ kɛ e-Bi lɛ sui ni yɔɔ naakpɛɛ lɛ ahe.
4. (a) Mɛni hewɔ ewa kɛha nikaselɔi babaoo akɛ amɛaashiɛ lɛ? (b) Te wɔɔfee tɛŋŋ wɔye wɔbua wɔnikaselɔi lɛ ni amɛkɛ amɛhe awo Kristofoi asɔɔmɔ nitsumɔ lɛ mli klɛŋklɛŋ kwraa?
4 Tsɔɔmɔ Nii Kɛtsɔ Nɔkwɛmɔnɔ ní Ooofee lɛ Nɔ: Ákɛ tsɔɔlɔi kɛ gbɛtsɔɔlɔi lɛ, wɔkɛ wɔnifeemɔi haa mɛi krokomɛi leɔ nɔ ni Nyɔŋmɔ gbɛ lɛ nɔ ní aaanyiɛ lɛ tsɔɔ. (1 Kor. 11:1) Ákɛ nɔkwɛmɔnɔ lɛ, ejeee Biblia mli nikaselɔi lɛ ateŋ mɛi pii asu akɛ amɛaabɛŋkɛ mɛi kpɔ̃ji bɔni afee ni amɛkɛ amɛ agba amɛhemɔkɛyelii lɛ ahe sane. No hewɔ lɛ, ebaabi ni aná tsuishitoo kɛ hesaa ni akɛye abua amɛ koni amɛná suɔmɔ, hemɔkɛyeli, kɛ ekãa ni he baahia bɔni afee ni anyɛ akɛ he awo shiɛmɔ kɛ kaselɔi afeemɔ nitsumɔ lɛ mli lɛ. (2 Kor. 4:13; 1 Tes. 2:2) Kɛ wɔnikaselɔi lɛ kɛ amɛhe wo Kristofoi asɔɔmɔ nitsumɔ lɛ mli klɛŋklɛŋ kwraa lɛ, shwelɛ ni wɔyɔɔ akɛ wɔɔtsɔɔ amɛ gbɛ lɛ baatsirɛ wɔ koni wɔfi amɛsɛɛ.
5. Nɔkwɛmɔnɔ kpakpa ni afeɔ lɛ yeɔ ebuaa nikaselɔi koni amɛyɔse nɔ ni Nyɔŋmɔ famɔi ni akɛaatsu nii lɛ biɔ yɛ mɛɛ gbɛ nɔ?
5 Nɔkwɛmɔnɔ ni ofeɔ lɛ baanyɛ atsɔɔ nikaselɔi lɛ anii koni amɛle Kristofoi ashihilɛ mli nifeemɔi krokomɛi ni he hiaa lɛ. Kɛ oyasara mɛi ni he yeɔ loo okɛ miishɛɛ ŋa mɛi krokomɛi yɛ asafoŋ kpeei ashishi lɛ, amɛnaa akɛ oojie suɔmɔ kpo. (Yoh. 15:12) Kɛ okɛ ohe wo Maŋtsɛyeli Asa lɛ nɔ saamɔ mli loo ofee nii kɛye obua mɛi krokomɛi lɛ, belɛ ootsɔɔ amɛ bɔ ni asɔmɔɔ ahaa. (Yoh. 13:12-15) Kɛ amɛyɔse akɛ ohaa oshihilɛ feɔ mlɛo lɛ, no haa amɛnuɔ nɔ ni ‘maŋtsɛyeli lɛ ní amɛaatao tsutsu’ lɛ tsɔɔ lɛ shishi.—Mat. 6:33.
6. Mɛni jɛɔ yelikɛbuamɔ ni akɛhaa heshibalɔi koni amɛsɔmɔ Yehowa lɛ mli kɛbaa?
6 Nyɔŋmɔ Wiemɔ lɛ ní wɔɔtsɔɔ mɛi krokomɛi ni wɔfee mɛi kaselɔi lɛ ji nitsumɔ ni biɔ mɔdɛŋbɔɔ babaoo diɛŋtsɛ. Shi kwɛ bɔ ni eji miishɛɛ sane akɛ aaana ni heshibalɔi ‘miinyiɛ yɛ anɔkwale lɛ mli’!—3 Yoh. 4.