Gbɛ ni Aaatsɔ Nɔ Afee Ekãa Be Fɛɛ Be
1 Ekolɛ ekãa ni Apolo kɛtsu esɔɔmɔ nitsumɔ lɛ baaha wɔkai nanemɛi Kristofoi ni yɔɔ ŋmɛnɛŋmɛnɛ ni kɛ ekãa babaoo tsuɔ shiɛmɔ nitsumɔ lɛ. (Bɔf. 18:24-28) Ni kɛlɛ, awoɔ wɔ fɛɛ hewalɛ akɛ: “Nyɛmɔdɛŋbɔɔ lɛ naa akabaa shi; nyɛmumɔ lɛ he adɔa la.” (Rom. 12:11) Mɛni baanyɛ aye abua wɔ koni wɔná ekãafeemɔ kɛha Kristofoi asɔɔmɔ nitsumɔ lɛ ní wɔya nɔ wɔfee nakai daa?
2 Nilee Ji Nɔ ni Haa Emli Waa: Beni Yesu jie ehe kpo etsɔɔ ekaselɔi lɛ ateŋ mɛi enyɔ ni “etsɔɔ amɛ nibii ni yɔɔ ŋmalɛi lɛ fɛɛ mli yɛ ehewɔ lɛ ashishi” lɛ, amɛkɛɛ akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ . . . lɛ?” (Luka 24:27, 32) Yɛ nakai gbɛ nɔ nɔŋŋ lɛ, kɛji shishinumɔ ni wɔyɔɔ yɛ Nyɔŋmɔ Wiemɔ lɛ mli lɛ tee hiɛ babaoo lɛ, ani wɔtsui he edɔɔɔ la kɛ mlifilimɔ? Eji anɔkwale akɛ, nilee ji nɔ ni haa hemɔkɛyeli mli waa. Romabii 10:17 lɛ tsɔɔ mli akɛ: “Hemɔkɛyeli lɛ sane toiboo mli jɛɔ.” Kɛ́ Yehowa shiwoi lɛ amli hekɛnɔfɔɔ yimɔ wɔtsuii amli obɔbɔ lɛ, wɔnyɛŋ wɔfɔ̃ɔ nibii ni wɔkase lɛ ahe wiemɔ kɔkɔɔkɔ!—Lala 145:7; Bɔf. 4:20.
3 Nilee ni wɔná kɛjɛ nii ni wɔkase be ko ni eho lɛ mli lɛ pɛ nyɛŋ aha suɔmɔ ni wɔyɔɔ kɛha Nyɔŋmɔ lɛ mli aya nɔ awa, ní eha ekãa ni wɔfeɔ yɛ esɔɔmɔ lɛ mli lɛ mli awa kɛya hiɛ be fɛɛ be. Esa akɛ wɔya nɔ wɔha anɔkwale lɛ he shishinumɔ ni wɔyɔɔ lɛ aya hiɛ, ni wɔha suɔmɔ ni wɔyɔɔ kɛha Yehowa lɛ hu mli awa. Kɛ jeee nakai lɛ, fiofio lɛ, sɔɔmɔ ni wɔkɛhaa lɛ lɛ baanyɛ atsɔ nɔ ko ni atsuɔ he nii kɛkɛ. (Kpoj. 2:4) Nyɔŋmɔ Wiemɔ lɛ woɔ wɔ hewalɛ ni ‘wɔya nɔ wɔshwere yɛ Nyɔŋmɔ he anɔkwa nilee lɛ mli.’—Kol. 1:9-11a.
4 Wɔnikasemɔ Sui: No hewɔ lɛ, ehi jogbaŋŋ akɛ wɔɔpɛi wɔnikasemɔ sui lɛ amli wɔkwɛ. Ákɛ nɔkwɛmɔnɔ lɛ, ekolɛ wɔbaanyɛ wɔkadi hetooi lɛ ni yɔɔ Buu-Mɔɔ nikasemɔ ko mli lɛ ni wɔha hetooi ni ja. Shi ani wɔkaneɔ ŋmalɛi ni aŋmalako amɛmli wiemɔi lɛ ni wɔsusuɔ bɔ ni wɔɔfee wɔkɛ sane lɛ atsu nii yɛ wɔshihilɛ mli lɛ he? Yɛ daa otsi Biblia kanemɔ lɛ gbɛfaŋ lɛ, ani wɔbɔɔ mɔdɛŋ koni wɔtao saji amli kɛfata he kɛ́ wɔshihilɛi ŋmɛɔ gbɛ, ni wɔjwɛŋ nikasemɔi ni yɔɔ mli lɛ hu anɔ? (Lala 77:12, 13; Abɛi 2:1-5) Kwɛ bɔ ni sɛɛnamɔ yɔɔ he akɛ wɔɔjwɛŋ Nyɔŋmɔ Wiemɔ lɛ nɔ ní wɔkɛ wɔhe awo ekasemɔ mli vii! (1 Tim. 4:15, 16) Nikasemɔ ni he baa sɛɛnamɔ tamɔ nɛkɛ lɛ baaye ebua wɔ ni ebaakanya wɔ ni wɔfee ekãa loo ni ‘wɔhiɛ adɔ nitsumɔi kpakpai ahe.’—Tito 2:14.