‘Nyɛnyiɛa Misɛɛ Daa’
1 Mɛi babaoo kɛ amɛshihilɛ fɛɛ damɔɔ nibii ni amɛbaafee kɛsa amɛ diɛŋtsɛ amɛhiɛ lɛ nɔ, ni kɛlɛ bei pii lɛ amɛnáaa miishɛɛ. Nɔ ni tamɔɔɔ nakai lɛ, Yesu tsɔɔ akɛ esa akɛ aná nɔ̃ hamɔ su ni ŋkomeŋfa su bɛ mli ni kɛ miishɛɛ diɛŋtsɛ baa lɛ. (Bɔf. 20:35) Ekɛɛ akɛ: “Kɛji mɔ ko miisumɔ akɛ enyiɛ misɛɛ lɛ, ha ni etso ehe naa, . . . ni enyiɛ misɛɛ.” (Mar. 8:34) Enɛ biɔ babaoo fe nɔ ni mɔ lɛ aaatsi ehe kɛjɛ miishɛɛnamɔi komɛi ahe yɛ be kɛ bei amli pɛ kɛkɛ. Etsɔɔ akɛ esa akɛ wɔhi shi bɔ ni baasa Yehowa hiɛ gbi fɛɛ gbi, shi jeee bɔ ni baasa wɔ diɛŋtsɛ wɔhiɛ.—Rom. 14:8; 15:3.
2 Susumɔ bɔfo Paulo nɔkwɛmɔnɔ lɛ he okwɛ. Yɛ “Kristo Yesu, . . . he nilee ni fe fɛɛ lɛ hewɔ” lɛ, Paulo fɔ̃ɔ nibii ni ekɛmamɔ ehiɛ lɛ asɛɛtiumɔ, ni ekɛ ehe ha babaoo koni ekɛha Maŋtsɛyeli lɛ he nibii aya hiɛ. (Fil. 3:7, 8) Ekɛɛ akɛ: “Shi miisumɔ babaoo akɛ mafite nii ni asaŋ afite mi kwraa” yɛ mɛi krokomɛi asɔɔmɔ mli. (2 Kor. 12:15) Ebaafee nɔ ni hi jogbaŋŋ akɛ wɔteŋ mɔ fɛɛ mɔ aaabi ehe akɛ: ‘Te mikɛ mibe, mihewalɛ, minyɛmɔi kɛ minibii tsuɔ nii mihaa tɛŋŋ? Ani mikɛ mijwɛŋmɔ ema nibii ni mi diɛŋtsɛ mináa he miishɛɛ lɛ anɔ, loo miisumɔ ni masa Yehowa hiɛ?’
3 Hegbɛi Kɛha Nɔ̃ Hamɔ: Daa afi lɛ, Nyɔŋmɔ webii lɛ kɛ nɔ ni fa fe ŋmɛlɛtswai akpekpei akpe kome tsuɔ nii yɛ Maŋtsɛyeli shiɛmɔ nitsumɔ ni hereɔ mɛi ayiwala lɛ mli. Gbekɛbii kɛ onukpai fɛɛ tsuɔ nitsumɔi srɔtoisrɔtoi yɛ asafo lɛ mli, ni enɛɛmɛi ahe baa sɛɛnamɔ kɛhaa mɛi krokomɛi. Nitsumɔi babaoo hu yɛ ni atsuɔ kɛtoɔ kpokpaa nɔ kpeei kɛ kpokpaa wulu nɔ kpeei ahe gbɛjianɔ, ni atsuɔ nitsumɔi babaoo hu yɛ tsũi amaamɔ kɛ amɛsaamɔ ní akɛhaa anɔkwa jamɔ yaa hiɛ lɛ mli. Ni susumɔ yelikɛbuamɔ ni suɔmɔ yɔɔ mli ni nyɛmimɛi hii ni sɔmɔɔ akɛ Hospital Liaison Committee (Ajinafoi Akuu ni Kɛ Helatsamɔhei Shãraa) kɛ Patient Visitation Groups (Helatsɛmɛi Asaramɔ Kui) srɔtoi lɛ amli bii lɛ kɛhaa lɛ he okwɛ. He-kɛ-afɔleshaa nifeemɔi ni tamɔ enɛɛmɛi fɛɛ he yɛ sɛɛnamɔ waa kɛha wɔ-Kristofoi nyɛmimɛi akuu lɛ!—Lala 110:3.
4 Hegbɛi ni wɔɔná ni wɔkɛ wɔhe aha yɛ gbɛ̀i srɔtoi anɔ lɛ baanyɛ aba yɛ be mli ni oshara ko loo hiamɔ shihilɛ ko eba trukaa lɛ. Shi bei pii lɛ, ekolɛ wɔbaayɔse akɛ yelikɛbuamɔ loo hewalɛwoo ko he miihia naanyo Kristofonyo ko. (Abɛi 17:17) Kɛ wɔkɛ wɔhe ha amrɔ nɔŋŋ kɛsɔmɔ mɛi krokomɛi ni wɔha Maŋtsɛyeli lɛ he nibii tee hiɛ lɛ, belɛ wɔmiinyiɛ Yesu nɔkwɛmɔnɔ lɛ sɛɛ. (Fil. 2:5-8) Eba akɛ wɔbaabɔ mɔdɛŋ ni wɔfee nakai daa.