Fó Mɛi Krokomɛi Anɔ̃ Mli—Kɛtsɔ Amɛyijiemɔ Nɔ
1 Yijiemɔ ni jɛ tsui mli woɔ mɛi hewalɛ, ekanyaa amɛ koni amɛtsu nɔ ni akɛɔ amɛ lɛ he nii, ni ehaa amɛnáa miishɛɛ hu. Shiɛlɔi babaoo eyoo akɛ bei pii kɛ́ ajɛ tsuiŋ ajie mɛi ayi lɛ, no haa amɛboɔ wiemɔ lɛ toi. Mɛɛ gbɛ nɔ wɔɔtsɔ wɔjie mɛi ayi yɛ be mli ni wɔbɔɔ mɔdɛŋ koni wɔshiɛ sanekpakpa lɛ wɔtsɔɔ amɛ?
2 Okɛ Ohiɛ Afɔ̃ Shi: Yesu Kristo ni awo ehiɛ nyam lɛ kadi nibii kpakpa ni asafoi kpawo ni hi Asia Bibioo lɛ fee lɛ. (Kpoj. 2:2, 3, 13, 19; 3:8) Nakai nɔŋŋ wɔ hu kɛ́ wɔyɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ ahe miishɛɛ diɛŋtsɛ lɛ no baatsirɛ wɔ koni wɔkwɛ nibii amli ni wɔbaanyɛ wɔjie amɛyi yɛ. Ákɛ nɔkwɛmɔnɔ lɛ, shĩa ni akwra mli jogbaŋŋ, fɔlɔ ko ni kɛ ebii miiye yɛ mlihilɛ mli, aloo shiatsɛ ko ni kɛ hiɛ ŋmɔlɔŋmɔlɔ ŋaa wɔ lɛ fata nibii ni wɔbaanyɛ wɔjie mɛi ayi yɛ he lɛ ahe. Ani okadiɔ nibii ni tamɔ enɛɛmɛi oya ni ojieɔ mɛi ayi yɛ he?
3 Bó Mɔ Toi Jogbaŋŋ: Kɛ́ ooshiɛ ootsɔɔ mɛi krokomɛi lɛ, ha amɛ hu amɛtsɔɔ amɛjwɛŋmɔ kɛtsɔ saji ni sa ní ooobi amɛ lɛ nɔ. Bó amɛ toi jogbaŋŋ ní okɛtsɔɔ akɛ obuɔ amɛ. (Rom. 12:10) Ekolɛ hetoo ni amɛbaaha lɛ baaha oná nɔ ko ni obaanyɛ okɛ yijiemɔ ni sa aha amɛ yɛ he, kɛkɛ lɛ no baaha oná hegbɛ ni okɛ amɛ asusu saji ni nyɛkpãa gbee yɛ he lɛ ahe kɛya shɔŋŋ.
4 Okɛ Sanesɛɛkɔmɔ Atsu Nii: Kɛ́ shiatsɛ ko kɛɛ nɔ ko ni kɛ Biblia lɛ mli anɔkwale lɛ kpãaa gbee lɛ, mɛni ebaabi ni wɔfee? Esaaa akɛ wɔkɛmaa shiatsɛ lɛ hiɛ akɛ nɔ ni ekɛɛ lɛ ejaaa. Yɛ no najiaŋ lɛ, daa lɛ shi akɛ etsɔɔ ejwɛŋmɔ, koni otsa nɔ kɛ wiemɔ tamɔ “mina akɛ osusuɔ sane nɛɛ he waa.” (Kol. 4:6) Kɛ́ mɔ lɛ ji ŋwanejelɔ po lɛ, bei pii lɛ wɔbaanyɛ wɔjie eyi yɛ sane ni wɔkɛ lɛ susuɔ he lɛ he miishɛɛ diɛŋtsɛ ni eyɔɔ lɛ he. Kɛ́ wɔkɛ mɔ ko ni etamɔ nɔ ni eehi sanekpakpa lɛ kwraa lɛ ye yɛ mlihilɛ gbɛ ni tamɔ nɛkɛ nɔ lɛ, no haa etsui baa shi ni eboɔ wɔ toi.—Abɛi 25:15.
5 Kɛ́ mɛi ayi ni wɔjieɔ lɛ jɛɛɛ wɔtsuiŋ lɛ, no lɛ ewoŋ amɛ hewalɛ. Yijiemɔ wiemɔi ni tamɔ nɛkɛ ni woɔ mɔ hewalɛ ni wɔkɛaatsu nii lɛ kɛ woo haa Yehowa ni ebaanyɛ eha mɛi abo Maŋtsɛyeli shɛɛ sane lɛ toi.