Ha Amɛná Hiɛsɔɔ ni Mli Kwɔ Amɛha Yehowa Sui ni Nɔ Bɛ Lɛ
1 Jeee Biblia mli anɔkwalei ni he hiaa lɛ kɛkɛ wɔtsɔɔ mɛi yɛ wɔshiɛmɔ nitsumɔ lɛ mli. Shi moŋ wɔyeɔ wɔbuaa amɛ koni amɛle Yehowa ákɛ mɔ ni yɔɔ diɛŋtsɛ, ni amɛná hiɛsɔɔ ni mli kwɔ amɛha esui ni nɔ bɛ lɛ. Kɛ́ mɛi ni hiɛ tsuijurɔ lɛ kase anɔkwalei ni kɔɔ Nyɔŋmɔ he lɛ, enáa amɛnɔ hewalɛ diɛŋtsɛ, ni ekanyaa amɛ ni amɛfeɔ tsakemɔi yɛ amɛshihilɛ mli “koni [amɛ]nyiɛ bɔ ni sa Nuŋtsɔ lɛ ni a[mɛ]sa ehiɛ kwraa.”—Kol. 1:9, 10; 3:9, 10.
2 Wɔwolo Hee ni Wɔkɛ Mɛi Kaseɔ: Biblia lɛ Tsɔɔ wolo lɛ gbalaa jwɛŋmɔ kɛyaa Yehowa sui lɛ anɔ yɛ eshishijee baafai lɛ amli tɔ̃ɔ. Eklɛŋklɛŋ yitso lɛ haa sanebimɔi ni ji: Ani Nyɔŋmɔ susuɔ ohe lɛɛlɛŋ?, Te Nyɔŋmɔ su yɔɔ ha tɛŋŋ?, kɛ Ani abaanyɛ abɛŋkɛ Nyɔŋmɔ? lɛ ahetoo. Kɛfata he lɛ, nakai yitso lɛ maa krɔŋkrɔŋ ni Yehowa yɔɔ (kk. 10), jalɛsane ni eyeɔ kɛ musuŋtsɔlɛ ni eyɔɔ (kk. 11), suɔmɔ ni eyɔɔ (kk. 13), hewalɛ ni eyɔɔ (kk. 16), mɔbɔnalɛ ni eyɔɔ, durolɔ ni eji, bɔ ni eŋɔfaa mra, bɔ ni etoɔ etsui shi, kɛ anɔkwafo ni eji (kk. 19) lɛ anɔ mi. Kuku 20 lɛ mu sane lɛ fɛɛ naa akɛ: “Babaoo ni okaseɔ Yehowa he nii lɛ, babaoo ni obaleɔ mɔ ni eji diɛŋtsɛ, ni enɛ baaha oná yiŋtoo babaoo ni ooodamɔ nɔ osumɔ lɛ, ni onu he akɛ obɛŋkɛ lɛ kpaakpa.”
3 Mɛɛ gbɛ nɔ wɔɔtsɔ wɔkɛ Biblia Tsɔɔ wolo lɛ aye abua mɛi ni wɔkɛkaseɔ Biblia lɛ koni amɛtsi amɛbɛŋkɛ Yehowa? Kɛ́ wɔkɛ amɛ susu kuku ko ni maa Nyɔŋmɔ sui lɛ eko nɔ mi lɛ he lɛ, wɔbaanyɛ wɔbi amɛ akɛ, “Mɛni enɛ kɛɔ bo yɛ nɔ̃ mɔ ni Yehowa ji lɛ he?” aloo “Mɛɛ gbɛ nɔ enɛ tsɔɔ akɛ Nyɔŋmɔ yɛ ohe miishɛɛ ákɛ aŋkro?” Kɛ́ wɔkɛ wɔ-Biblia nikaselɔi lɛ miikase nii ni wɔbibii amɛ saji tamɔ enɛɛmɛi yɛ be kɛ bei amli lɛ, wɔtsɔɔ nakai feemɔ nɔ wɔtsɔɔ amɛ koni amɛjwɛŋ nii ni amɛkaseɔ lɛ anɔ, ni wɔyeɔ wɔbuaa amɛ hu ni amɛnáa hiɛsɔɔ ni mli kwɔ amɛhaa Yehowa sui ni nɔ bɛ lɛ.
4 Okɛ Akrabatsa ni Akɛtĩɔ Nikasemɔ lɛ Mli lɛ Atsu Nii: Kɛ́ nyɛgbe yitso fɛɛ yitso kasemɔ naa lɛ, ha nikaselɔ lɛ ajɛ lɛ diɛŋtsɛ ewiemɔ mli etsɔɔ saji otii srɔtoi ni yɔɔ akrabatsa ni yitso ji “Nɔ ni Biblia lɛ Tsɔɔ” lɛ mli lɛ amli. Nyɛsusua ŋmalɛi ni atsɛ́ shi aŋmalako amɛmli wiemɔi lɛ ahe. Bɔni afee ni onyɛ owo nikaselɔ lɛ hewalɛ ni etsɔɔ nɔ ni yɔɔ etsui mli lɛ, obaanyɛ ni yɛ bei komɛi amli lɛ obi lɛ akɛ, “Mɛni ji ojwɛŋmɔ yɛ nɔ ni Biblia lɛ tsɔɔ yɛ sane oti nɛɛ he?” Jeee saji otii ni yɔɔ yitso ni nyɛsusuɔ he lɛ anɔ mi kɛkɛ okɛ nakai feemɔ baama, shi moŋ obaaná ole nɔ̃ diɛŋtsɛ hu ni nikaselɔ lɛ heɔ eyeɔ. Enɛ baaye abua nikaselɔ lɛ koni ekɛ Yehowa abɔ naanyo.