Fó Mɛi Krokomɛi Anɔ̃ Mli—Kɛtsɔ ni Oooshiɛ Otsɔɔ Mɛi Fɛɛ ni Hiɛaŋkwɛmɔ Bɛ Mli Nɔ
1 Yɛ ninaa ko ni ajie atsɔɔ bɔfo Yohane lɛ mli lɛ, ena ŋwɛibɔfo ko miifiliki yɛ ŋwɛi teŋ eejaje naanɔ sanekpakpa eetsɔɔ gbɔmɛi ni yɔɔ “jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ.” (Kpoj. 14:6) Ani wɔshiɛɔ ni wɔkwɛɛɛ hiɛaŋ taakɛ ŋwɛibɔfo lɛ fee lɛ? Wɔbaanyɛ wɔná mɛi ahe jwɛŋmɔ fɔŋ aloo wɔhe atsɛ̃ amɛ ni wɔleee. Susumɔ ni wɔhiɛ yɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ ahe lɛ baanyɛ asa gbɛ ni wɔtsɔɔ nɔ wɔkɛ sanekpakpa lɛ haa amɛ lɛ he. No hewɔ lɛ, kɛ́ wɔmiishiɛ wɔmiiha mɛi ni jɛ maji krokomɛi anɔ aloo mɛi ni wieɔ wiemɔi krokomɛi lɛ, esa akɛ wɔha amɛna akɛ wɔsumɔɔ amɛ ni wɔsusuɔ amɛ he.
2 Susumɔ Nyɛshikpɔŋkuku lɛ He: Ani mɛi ni jɛ maji krokomɛi anɔ aloo abobalɔi yɛ nyɛshikpɔŋkuku lɛ mli? Ewaaa kwraa akɛ aaaku hiɛ ashwie amɛnɔ. Bo tsutsu yaa ni oyatao mɛi nɛɛ ni obɔ mɔdɛŋ ole amɛ jogbaŋŋ. Mɛni ji amɛhiamɔ nii kɛ nibii ni gbáa amɛnaa, mɛni ji nibii ni amɛsumɔɔ kɛ nibii ni amɛhiɔ, ani gbeyeishemɔ ko yɛ amɛmli, aloo amɛhiɛ mɛi komɛi ahe susumɔ ni ejaaa? Kɛ́ oná ole saji ni tamɔ enɛɛmɛi yɛ mɔ lɛ he lɛ, no lɛ ha Maŋtsɛyeli shɛɛ sane lɛ akɔ nomɛi ahe. (1 Kor. 9:19-23) Taakɛ bɔ ni bɔfo Paulo nu he lɛ, esa akɛ wɔnu he akɛ sɔ̃ kã wɔnɔ akɛ wɔshiɛ sanekpakpa lɛ wɔtsɔɔ mɛi fɛɛ, ni gbɔmɛi ni jɛ maji krokomɛi anɔ, mɛi ni esoro amɛkusum nifeemɔ, mɛi ni wieɔ wiemɔi krokomɛi, kɛ niiatsɛmɛi ni yɔɔ wɔshikpɔŋkuku lɛ mli lɛ hu fata he.—Rom. 1:14.
3 Shi, mɛɛ gbɛ nɔ oootsɔ oye mɔ ko ni wieɔ wiemɔ kroko lɛ odase? Okɛ wolo bibioo ni ji Good News for People of All Nations lɛ atsu nii. Obaanyɛ hu ni kɛ́ fee lɛ, ohiɛ dɛhiɛmɔ woji loo woji bibii ni aŋmala yɛ wiemɔi srɔtoi ni gbɔmɛi ni yɔɔ nyɛshikpɔŋkuku lɛ mli lɛ fɔɔ wiemɔ lɛ mli lɛ ekomɛi yɛ obaagi lɛ mli ni okɛtsu nii. (Kwɛmɔ July 2003 Wɔ Maŋtsɛyeli Sɔɔmɔ lɛ bf. 8, kk. 2-3 lɛ mli.) Kɛfata he lɛ, shiɛlɔi komɛi ebɔ mɔdɛŋ amɛkase ŋamɔi kɛ shiɛmɔ wiemɔ kukuji yɛ wiemɔi krokomɛi amli. Bei pii lɛ, mɛi náa he miishɛɛ waa kɛ́ amɛna akɛ mɔ ko miibɔ mɔdɛŋ koni ekɛ amɛ awie yɛ amɛ diɛŋtsɛ amɛwiemɔ enyɔoo ko ni enuɔ lɛ mli, ni enɛ baanyɛ aha amɛbo sanekpakpa lɛ toi.
4 Kasemɔ Yehowa: Wɔtsɔɔ gbɔmɛi srɔtoi fɛɛ ni wɔshiɛɔ wɔhaa amɛ lɛ nɔ wɔkaseɔ Yehowa ni ji wɔ-Nyɔŋmɔ ni kwɛɛɛ hiɛaŋ ‘ní sumɔɔ akɛ ehere gbɔmɛi srɔtoi fɛɛ yiwala, koni amɛshɛ anɔkwale lɛ lee mli’ lɛ.—1 Tim. 2:3, 4.