Ye Obua Mɛi Krokomɛi ni Amɛbatsɔmɔ Nyɔŋmɔ Nanemɛi
1 Ŋmɛnɛ lɛ, aatsɔɔ gbɔmɛi ni jɛ maji fɛɛ amli Yehowa gbɛ̀i lɛ. (Yes. 2:2, 3) Kɛlɛ, ja mɛi sumɔɔ Yehowa dani amɛbaanyɛ ‘amɛkɛ tsuishiŋmɛɛ awo yibii.’ (Luka 8:15; Mar. 12:30) Kɛ́ amɛbɛ suɔmɔ ni tamɔ nakai lɛ, amɛnáŋ ekãa amɛkɛfee nii ni ja aloo amɛkɛdamɔ nibii gbohii ni baanyɛ aha amɛje amɛŋɛlɛ nɔ lɛ anaa. Gbɛ kome ni wɔɔtsɔ nɔ wɔye wɔbua mɛi koni wekukpãa kpakpa ahi amɛkɛ Yehowa teŋ ji ní wɔɔha amɛná hiɛsɔɔ ni mli kwɔ amɛha sui ni eyɔɔ lɛ. Wó amɛ hewalɛ koni amɛkɛ hiɛdɔɔ ajwɛŋ sane ni yɔɔ wolo ni ji Tsi Obɛŋkɛ Yehowa lɛ mli lɛ nɔ.
2 Feemɔ Nɔkwɛmɔnɔ Kpakpa: Onifeemɔ baanyɛ aná mɛi ni okɛkaseɔ Biblia lɛ anɔ hewalɛ kpakpa yɛ gbɛ ni da nɔ. Kɛ́ amɛna akɛ okɛ Yehowa naanyobɔɔ lɛ shwɛɛɛ, ni asaŋ ohiɔ shi akɛ enaanyo lɛ, no baatsirɛ amɛ koni amɛ hu amɛkɛ lɛ aná naanyobɔɔ ni tamɔ nakai. (Luka 6:40) Yɛ anɔkwale mli lɛ, nɔkwɛmɔnɔ kpakpa ni wɔfeɔ lɛ náa mɛi anɔ hewalɛ jogbaŋŋ fe nɔ ni wɔkɛɔ amɛ lɛ.
3 Nɔkwɛmɔnɔ kpakpa ni fɔlɔi feɔ lɛ ji gbɛ titri ni amɛtsɔɔ nɔ amɛtsɔɔ amɛbii lɛ koni amɛsumɔ Yehowa. (5 Mose 6:4-9) Mɔ kɛ eŋa ko ni amɛmiisumɔ koni amɛtsɔse amɛbii lɛ yɛ anɔkwale lɛ mli lɛ bibii fɔlɔi ni eye omanye yɛ nakai feemɔ mli lɛ aŋaawoo. Wu lɛ kɛɛ akɛ: “Nɔ ni amɛteŋ mɔ fɛɛ mɔ ni mikɛgba sane lɛ kɛɛ mi ji akɛ, titri damɔ nɔkwɛmɔnɔ kpakpa ni fɔlɔi lɛ feɔ lɛ nɔ.” No hewɔ lɛ, fɔlɔi baanyɛ atsɔ bɔ ni amɛhiɔ shi amɛhaa lɛ nɔ amɛha amɛbii lɛ ana nɔ ni “Nyɔŋmɔ shieŋtsɛ” loo naanyo ni mɔ aaatsɔ lɛ biɔ.—Yak. 2:23.
4 Sɔlemɔ Kɛjɛ Otsuiŋ: Obaanyɛ hu ni oye obua mɛi koni amɛkɛ Yehowa abɔ kɛtsɔ ni oootsɔɔ amɛ koni amɛsɔle kɛjɛ amɛtsuiŋ lɛ nɔ. Obaanyɛ ogbala amɛjwɛŋmɔ kɛya sɔlemɔ he nɔkwɛmɔnɔ ni Yesu fee lɛ kɛ agbɛnɛ sɔlemɔi krokomɛi ni mɛi jɛ amɛtsuiŋ amɛsɔle ni aŋmala he saji yɛ Ŋmalɛ lɛ mli lɛ anɔ. (Mat. 6:9, 10) Obaanyɛ otsɔ bɔ ni osɔleɔ lɛ nɔ otsɔɔ obii kɛ mɛi ni okɛkaseɔ Biblia lɛ bɔ ni asɔleɔ. Kɛ́ amɛnu wiemɔi ni jɛɔ otsuiŋ lɛ, no haa amɛnaa bɔ ni obuɔ Yehowa ohaa. Wó amɛ hewalɛ koni ‘amɛhiɛ sɔlemɔ mli’ kɛ́ amɛkɛ kaai kpe. (Rom. 12:12) Yɛ be mli ni amɛnaa bɔ ni Yehowa yeɔ buaa amɛ yɛ hiamɔ beaŋ lɛ, amɛbaaná hekɛnɔfɔɔ yɛ emli ní amɛsumɔ lɛ akɛ naanyo kpakpa.—Lala 34:8; Fil. 4:6, 7.