Wɔ Fɛɛ Wɔbaanyɛ Wɔye Wɔbua Kɛfee Mɛi Yesu Kaselɔi Heei
1 Jeee mɔ kome mɔdɛŋbɔɔ pɛ haa mɔ ko batsɔɔ kaselɔ hee. Yehowa baanyɛ ekɛ ‘ehefatalɔi nitsulɔi’ lɛ fɛɛ atsu nii ni ekɛye ebua Biblia mli nikaselɔi koni amɛya amɛhiɛ yɛ ehe nilee kɛ emli hemɔkɛyeli námɔ mli. (1 Kor. 3:6-9) Ákɛ aŋkroaŋkroi lɛ, jeee saji ahetooi ni jɛ tsuiŋ ni wɔhaa yɛ Kristofoi akpeei ashishi lɛ pɛ yeɔ ebuaa mɛi heei lɛ, shi moŋ wɔjeŋba kpakpa ni tsɔɔ faŋŋ akɛ Nyɔŋmɔ mumɔ lɛ náa wɔshihilɛi anɔ hewalɛ lɛ hu yeɔ ebuaa. (Yoh. 13:35; Gal. 5:22, 23; Efe. 4:22, 23) Mɛɛ nibii krokomɛi hu wɔbaanyɛ wɔfee kɛye abua mɛi heei lɛ?
2 Ákɛ Asafo: Wɔ fɛɛ wɔbaanyɛ wɔtsɔɔ akɛ wɔyɛ mɛi ni ebɔi kpeeibaa lɛ ahe miishɛɛ kɛtsɔ hegbɛ ni wɔɔŋɔ ni wɔkɛ miishɛɛ aŋa amɛ ni wɔkɛ amɛ agba sane dani aje kpee lɛ shishi kɛ beni akpa lɛ. Nuu ko wie be ni etee asafoŋ kpee klɛŋklɛŋ kwraa lɛ he akɛ: “Nakai gbi lɛ mɛi kpɔji ni yɔɔ anɔkwa suɔmɔ ni mikɛkpe lɛ fa kwraa fe mɛi ni yɔɔ su nɛɛ ni mikɛkpe pɛŋ yɛ jamɔ ni afɔ mi awo mli lɛ mli lɛ. Miyɔse faŋŋ akɛ mina anɔkwale lɛ.” Yɛ klɛŋklɛŋ asafoŋ kpee ni etee lɛ sɛɛ nyɔji kpawo lɛ, abaptisi lɛ.
3 Jɛɛ otsuiŋ ojie Biblia mli nikaselɔ ni yaa ehiɛ yɛ Nyɔŋmɔ he nilee kɛ emli hemɔkɛyeli mli lɛ yi. Ani eedamɔ shitee-kɛwoo naa? Ani ebaa kpeei daa? Ani efeɔ ekãa kɛhaa saji ahetoo? Ani ekɛ ehe ewo Teokrase Sɔɔmɔ Skul lɛ mli loo ebɔi shiɛmɔyaa? Jiemɔ eyi yɛ ehiɛyaa lɛ he. Enɛ baaha ená miishɛɛ ni ebaawaje lɛ.—Abɛi 25:11.
4 Ákɛ Biblia Mli Nikasemɔ Nɔkwɛlɔ: Shiɛlɔi komɛi kɛ shiɛlɔi krokomɛi yaa amɛ-Biblia mli nikaselɔi aŋɔɔ kɛha nikasemɔ, ni amɛkɛ enɛ feemɔ eha amɛnikaselɔi lɛ ele asafo lɛ mli bii. Fɔ̃ɔ nikaselɔ lɛ nine kɛba asafoŋ kpeei amrɔ nɔŋŋ. Kɛ́ ebɔi kpeeibaa nɔŋŋ lɛ, bɔɔ mɔdɛŋ ni okɛ lɛ aŋa mɛi krokomɛi. Ani enáaa lɛ mlɛo akɛ eeeye su gbonyo tamɔ zigaret shɛremɔ nɔ? Ani eshiabii lɛ ateŋ mɔ ko teɔ shi woɔ lɛ akɛ ekakase Biblia lɛ? Shiɛlɔ ko ni kɛ naagba ni tamɔ nɛkɛ ekpe ni enyɛ etsu he nii ni ekɛ lɛ aaagba sane lɛ baanyɛ aye abua lɛ.—1 Pet. 5:9.
5 Ehe miihia ni asafoŋbii lɛ aye abua mɛi heei lɛ koni amɛná amɛkɛ Nyɔŋmɔ teŋ wekukpaa. Wɔ fɛɛ wɔbaanyɛ wɔye wɔbua amɛ koni amɛya amɛhiɛ kɛtsɔ anɔkwayeli mli ni wɔɔjɛ wɔfó amɛnɔ mli lɛ nɔ.