Tsakemɔi ni Yɔɔ Miishɛɛ ní Afee yɛ Buu-Mɔɔ lɛ He!
1 Mra mli yɛ afi nɛɛ mli lɛ, akɛ adafitswaa ko ni yɔɔ miishɛɛ ha asafoi lɛ akɛ: Kɛjɛ January afi 2008 lɛ, abaafee Buu-Mɔɔ srɔtoi enyɔ, ekome kɛha maŋbii kɛ ekome hu kɛha Yehowa Odasefoi! Ekolɛ obi akɛ: ‘Mɛɛ srɔtofeemɔ baahi enyɔ lɛ teŋ? Mɛɛ sɛɛnamɔi yɔɔ he akɛ aaaná Buu-Mɔɔ srɔtoi enyɔ? Ani akɛ nibii heei baafata he?’
2 Srɔtofeemɔi ni Yɔɔ Teŋ: Abaafee nɔ ni daa nyɔɔŋ nɔ klɛŋklɛŋ gbi yɔɔ nɔ lɛ aha mɛi ni jeee Odasefoi. Abaato saji ni yɔɔ enɛ mli lɛ he gbɛjianɔ aha mɛi ni jeee Odasefoi. Abaafee nɔ ni daa nyɔɔŋ nɔ gbi 15 yɔɔ nɔ lɛ aha Yehowa Odasefoi, ni akɛhaŋ yɛ shiɛmɔ nitsumɔ lɛ mli. Akɛ nyɔɔŋ muu lɛ fɛɛ mli Buu-Mɔɔ mli nikasemɔi ni abaakase yɛ asafoŋ kpeei ashishi lɛ kɛ saji krokomɛi ní Kristofoi ni ejɔɔ amɛhe nɔ lɛ baaná he miishɛɛ waa lɛ baawo mli. Eyɛ mli akɛ Odasefoi baaná Buu-Mɔɔ ni abaafee aha mɛi ni jeee Odasefoi lɛ he miishɛɛ moŋ, shi mɛi ni baaná he miishɛɛ titri ji mɛi ni ekolɛ amɛkpɛlɛɔ Biblia lɛ nɔ shi amɛjeee Odasefoi lɛ. Shi kɛlɛ, abaaya nɔ afee Awake! lɛ bɔ ni mɛi babaoo baaná he miishɛɛ, ni ŋwanejelɔi kɛ mɛi ni yɔɔ jamɔi krokomɛi ni jeee Kristojamɔ lɛ amli hu baaná he miishɛɛ.
3 Sɛɛnamɔi ni Yɔɔ He: Yɛ nɔ ni abaafee aha Odasefoi lɛ mli lɛ, ehe ebahiaŋ ni atsɔɔ wiemɔi tamɔ “gbɛgbalɔ” lɛ shishi yɛ gbɛ̀i ni baaha mɛi ni jeee Odasefoi lɛ anu shishi lɛ nɔ. Abaanyɛ akɛ saji ni he hiaa waa ni ato he gbɛjianɔ titri aha Yehowa Odasefoi kɛ Biblia mli nikaselɔi ni miiya amɛhiɛ yɛ mumɔŋ lɛ awo enɛ mli. Ni nɔ ni abaafee aha mɛi ni jeee Odasefoi lɛ hu? Akɛni saji ahe ni abaawie kɛ gbɛ̀i anɔ ni abaatsɔ aŋmala saji lɛ baakɔ mɛi ni jeee Odasefoi lɛ ahe hewɔ lɛ, amɛbaaná wolo tɛtrɛɛ muu lɛ fɛɛ kanemɔ he miishɛɛ waa. Yɛ anɔkwale mli lɛ, Yehowa Odasefoi fɛɛ baaná Buu-Mɔɔ srɔtoi enyɔ lɛ eko fɛɛ eko kanemɔ he sɛɛ. Akɛni daa nyɔɔŋ nɔ lɛ, wɔkɛ Buu-Mɔɔ kome kɛ Awake! kome baaha yɛ shiɛmɔ nitsumɔ lɛ mli hewɔ lɛ, wɔbaanyɛ wɔná be ni wɔkɛ shiɛmɔ wiemɔi ni sa jogbaŋŋ asaa wɔhe yɛ nyɔɔŋ muu lɛ fɛɛ mli.
4 Nibii Heei: Akɛ nibii heei ni yɔɔ miishɛɛ baawo Buu-Mɔɔ ni abaafee aha mɛi ni jeee Odasefoi lɛ mli. Abaatsɔ gbɛ ni yɔɔ mlɛo kwraa nɔ awie shishijee Biblia mli tsɔɔmɔi lɛ ahe yɛ mli. Abaatsɔɔ bɔ ni Biblia lɛ baanyɛ aye abua wekui hu. Akɛ saji ni oblahii kɛ oblayei kɛbaafee amɛ diɛŋtsɛ amɛ-Biblia mli nikasemɔ lɛ baawo mli. Akɛ sane ko ni baama Biblia mli saji pɔtɛɛi komɛi anɔ mi, ní baaha wɔle akɛ Yehowa ji mɔ ko ni yɔɔ diɛŋtsɛ lɛ hu baawo eko fɛɛ eko mli.
5 Wɔsɔlemɔ ji akɛ Yehowa ajɔɔ Buu-Mɔɔ he gbɛjianɔtoo hee nɛɛ nɔ. Eba akɛ wɔɔtsɔ Buu-Mɔɔ kɛ Awake! lɛ nɔ wɔha mɛi babaoo ni sa lɛ anu sanekpakpa lɛ.—Mat. 10:11.