Shɛjemɔ Mɛi ni Tsuii Ekumɔ lɛ Amii

¹ Yɛ yinɔsane mli fɛɛ lɛ, miishɛjemɔ he ehiako adesai yɛ shihilɛ mli tamɔ eji ŋmɛnɛ lɛ dã. Kɛ́ wɔnyiɛ nɔkwɛmɔnɔ ni Kristo Yesu, ni ji wɔ-Maŋtsɛ lɛ fee lɛ sɛɛ lɛ, wɔ hu ‘wɔbaatsá mɛi ni amɛtsuii ekumɔ lɛ.’—Yes. 61:1.

² Gbɛ Nɔ ní Wɔɔtsɔ Wɔshɛje Mɛi Amii: Esa akɛ wiemɔi ni wɔkɛtsuɔ nii yɛ shiɛmɔ nitsumɔ lɛ mli lɛ afee nɔ ni woɔ mɔ hewalɛ, ni no baashɛje mɛi amii. Kɛ́ wɔwieee nibii gbohii ni yaa nɔ yɛ je lɛŋ kɛ amale tsɔɔmɔi ahe tsɔ̃ yɛ wɔshiɛmɔ nitsumɔ lɛ mli lɛ, Ŋmalɛ mli anɔkwalei kɛ Nyɔŋmɔ shiwoi ni yɔɔ miishɛɛ lɛ ahe hiɛnɔkamɔ lɛ baafee oti yɛ wɔsanegbaa mli. Enɛ etsɔɔɔ akɛ wɔkawie Harmagedon he. Nitsumɔ ni atuu awo wɔdɛŋ ni wɔtsu lɛ ji ni wɔjaje “Yehowa duromɔ afi kɛ wɔ-Nyɔŋmɔ lɛ oweletɔɔ gbi” lɛ, ní ‘wɔwie wɔtsɔɔ efɔŋfeelɔ lɛ ní eje egbɛ fɔŋ lɛ nɔ.’ Shi kɛ̃lɛ, esaaa akɛ wɔjajeɔ kɔkɔbɔɔ ni kɔɔ Harmagedon he kɛ bɔ ni ebaafite nii eha lɛ yɛ gbɛ ni baagbala mɛi ajwɛŋmɔ kɛjɛ Nyɔŋmɔ Maŋtsɛyeli lɛ he sanekpakpa ní ji sane titri ni wɔshiɛɔ lɛ nɔ.—Yes. 61:2; Ezek. 3:18; Mat. 24:14.

³ Yɛ Shĩa kɛ Shĩa: Efɔɔ kaa akɛ anaa mɛi ni ehao yɛ hela, suɔlɔ ko gbele, jalɛsane ni ayeee, aloo shika he naagbai ni amɛkɛkpeɔ lɛ ahewɔ. Ákɛ mɛi ni miikase Kristo lɛ, ‘wɔmusuŋ tsɔɔ wɔ’ ni wɔjieɔ mlihilɛ kpo wɔtsɔɔ mɛi ni wɔkɛkpeɔ yɛ shiɛmɔ nitsumɔ lɛ mli lɛ. (Luka 7:13; Rom. 12:15) Eyɛ mli akɛ wɔkaneɔ ŋmalɛ kome loo enyɔ ko ní kɔɔ naagba lɛ he moŋ, shi esa akɛ wɔhe “afee oya kɛ ninumɔ,” ni tsɔɔ akɛ wɔbaaŋmɛ mɔ lɛ gbɛ ni etsɔɔ bɔ ni enuɔ he ehaa. (Yak. 1:19) Kɛ́ wɔbo mɔ lɛ toi tsutsu lɛ, ehaa wɔnaa nɔ diɛŋtsɛ ni esa akɛ wɔfee ní wɔkɛshɛje mɔ lɛ mii.

⁴ Beni sanegbaa lɛ yaa nɔ lɛ, wɔbaanyɛ wɔkɛɛ yɛ be ní sa mli akɛ, “Masumɔ ni mi kɛ bo asusu sane ko ni yɔɔ miishɛɛ ni yɔɔ Biblia lɛ mli lɛ he.” Esa akɛ wɔkɛ hiɛshikamɔ atsu nii bɔni afee ni wɔkakpoo susumɔ ni ejaaa fɛɛ ni ekolɛ mɔ lɛ baajie lɛ kpo lɛ. Yɛ no najiaŋ lɛ, oti ni esa akɛ ema wɔhiɛ ji ni wɔwo mɛi hewalɛ, ní wɔkɛ Ŋmalɛi lɛ atsu nii kɛwaje amɛtsuii. Obaanyɛ okwɛ Reasoning From the Scriptures wolo lɛ baafa 117-121 saneyitso ni ji “Encouragement” (Hewalɛwoo) lɛ mli kɛha enɛ feemɔ. Aloo obaanyɛ oha shiatsɛ lɛ dɛhiɛmɔ wolo ni ji Miishɛjemɔ Kɛha Mɛi ni Ehao Lɛ eko ní okɛ lɛ asusu hewalɛwoo wiemɔ ni yɔɔ mli lɛ he amrɔ nɔŋŋ.

⁵ Taomɔ Hegbɛi ní Okɛshɛje Mɛi Krokomɛi Amii: Ani ole okutsoŋnyo, onaanyo nitsulɔ, onaanyo skulnyo, loo owekunyo ko ni miishɛjemɔ he miihia lɛ? Mɛni hewɔ otooo gbɛjianɔ ni oyasara mɛi nɛɛ yɛ amɛshĩai amli ní ojɛ Ŋmalɛi lɛ amli oshɛje amɛmii? Kɛ́ ole nɔ̃ hewɔ ni miishɛjemɔ he hiaa amɛ lɛ, obaanyɛ osaa ohe kɛha nakai shihilɛ lɛ. Yɛ enɛ feemɔ gbɛfaŋ lɛ, mɛi komɛi eŋmala woji, loo amɛtswa mɛi lɛ tɛlifoŋ. Anɔkwa suɔmɔ ni wɔyɔɔ kɛha wɔnaanyo gbɔmɔ lɛ baatsirɛ wɔ ní wɔna mli wɔha amɛ, ni ebaaha wɔjɛ Ŋmalɛi lɛ amli wɔkɛ miishɛjemɔ ni he hiaa amɛ lɛ aha amɛ.—Luka 10:25-37.

⁶ Hɛɛ, afã wɔ ní wɔshɛje mɛi ni yeɔ awerɛho lɛ amii, wɔha mɛi ni tsui ekumɔ lɛ aná miishɛɛ, ní wɔha mɛi aná wɔsɛɛ shihilɛ ni yɔɔ miishɛɛ he hiɛnɔkamɔ. Enɛ ji miishɛjemɔ ní he hiaa mɛi ni yɔɔ je lɛŋ fɛɛ lɛ. Kɛ́ wɔkɛ mɛi ni hiɛ tsui ni ja lɛ gba nibii kpakpai babaoo ni Nyɔŋmɔ ewo he shi lɛ he sane kɛ miishɛɛ lɛ, ebaashɛje amɛmii, ni amɛbaaná hiɛnɔkamɔ. Eba akɛ wɔbaakai be fɛɛ be akɛ ehe miihia ni wɔtsá mɛi ni amɛtsuii ekumɔ lɛ.