Wɔ Fɛɛ Wɔyɛ Nɔ ko ní Wɔbaanyɛ Wɔkɛha Yehowa
1 Ani ole akɛ adesai yɛ nɔ ko ni amɛbaanyɛ amɛkɛha Nyɔŋmɔ? Abel kɛ ekooloi ni hi fe fɛɛ lɛ eko shã afɔle eha Yehowa, ni Noa kɛ Hiob hu shã afɔle ni tamɔ nakai. (1 Mose 4:4; 8:20; Hiob 1:5) Afɔleshaai nɛɛ haaa Bɔlɔ lɛ atsɔ niiatsɛ fe bɔ ni eji tsutsu lɛ yɛ gbɛ ko kwraa nɔ, ejaakɛ eyɛ nɔ fɛɛ nɔ. Shi afɔlei ni hii anɔkwafoi nɛɛ shã lɛ tsɔɔ akɛ amɛyɛ suɔmɔ ni mli wa kɛha Nyɔŋmɔ. Ŋmɛnɛ, wɔbaanyɛ wɔkɛ wɔbe, wɔhewalɛ, kɛ nibii ni wɔyɔɔ lɛ atsu nii kɛshã “yijiemɔ afɔle” wɔha Yehowa.—Heb. 13:15.
2 Wɔbe: Kwɛ bɔ ni ehi jogbaŋŋ akɛ ‘wɔɔhe be’ yɛ nibii ni he ehiaaa tsɔ lɛ amli bɔni afee ni wɔkɛ wɔhe awo shiɛmɔ nitsumɔ lɛ mli kɛmɔ shi jogbaŋŋ! (Efe. 5:15, 16, NW) Ekolɛ wɔbaanyɛ wɔto gbɛjianɔ koni wɔkɛ wɔhe awo gbɛgbalɔi awamɔ nitsumɔ lɛ mli nyɔɔŋ kome loo nɔ ni fe nakai yɛ afi lɛ mli. Ekolɛ wɔbaanyɛ wɔha be ni wɔkɛtsuɔ nii yɛ shiɛmɔ nitsumɔ lɛ mli lɛ aya hiɛ. Kɛ́ wɔkɛ minitii 30 fata be ni wɔkɛtsuɔ nii yɛ shiɛmɔ nitsumɔ lɛ mli daa otsi lɛ he lɛ, kɛhoo kwraa lɛ wɔbaanyɛ wɔkɛ ŋmɛlɛtswai enyɔ afata ŋmɛlɛtswai ni wɔkɛtsuɔ nii daa nyɔɔŋ lɛ he!
3 Wɔhewalɛ: Kɛ́ wɔbaaná hewalɛ ni sa ní wɔkɛtsu shiɛmɔ nitsumɔ lɛ, no lɛ ebiɔ ni wɔkwa hiɛtserɛjiemɔ kɛ nitsumɔ ni baaha etɔ wɔ bɔ ni wɔnyɛŋ wɔkɛ wɔnii ni hi fe fɛɛ lɛ aha Yehowa. Esaaa akɛ wɔfeɔ yeyeeye yɛ nibii ni baanyɛ aha ‘wɔdɔ kɔmɔɔ,’ ni baanyɛ aha wɔfite hewalɛ ni kulɛ wɔbaanyɛ wɔkɛtsu nii yɛ shiɛmɔ nitsumɔ lɛ mli lɛ ahe. (Abɛi 12:25) Kɛ́ nɔ ko miigba wɔnaa po lɛ, ebaahi jogbaŋŋ akɛ ‘wɔɔshɛ wɔjatsu lɛ wɔfɔ̃ Yehowa nɔ’!—Lala 55:23; Fil. 4:6, 7.
4 Nibii ni Wɔyɔɔ: Wɔbaanyɛ wɔkɛ heloonaa nibii ni wɔyɔɔ lɛ hu aha kɛfi shiɛmɔ nitsumɔ lɛ sɛɛ. Paulo wo enanemɛi Kristofoi lɛ hewalɛ ni ‘amɛtĩa nɔ ko naa’ yɛ be kɛ beaŋ, bɔni afee ni amɛná nɔ ko ni amɛkɛye amɛbua mɛi ni ehia amɛ lɛ. (1 Kor. 16:1, 2) Yɛ nakai gbɛ nɔ nɔŋŋ lɛ, wɔ hu wɔbaanyɛ wɔkɛ shika ko ato ni wɔkɛha ni akɛtsu wɔsafo lɛ hiamɔ nii lɛ ahe nii, kɛ agbɛnɛ hu lɛ kɛha jeŋ muu fɛɛ nitsumɔ lɛ. Yehowa hiɛ sɔɔ nɔ ni wɔjɛɔ wɔtsui mli wɔkɛhaa lɛ lɛ, ekɔɔɔ he eko kɛ́ eji nɔ ko bibioo po.—Luka 21:1-4.
5 Yehowa kɛ nibii babaoo eduro wɔ. (Yak. 1:17) Wɔjieɔ hiɛsɔɔ kpo kɛtsɔ wɔbe, wɔhewalɛ, kɛ nibii krokomɛi ni wɔyɔɔ ni wɔjɛɔ wɔtsui mli wɔkɛsɔmɔɔ lɛ lɛ nɔ. Nakai ni wɔfeɔ lɛ saa Yehowa hiɛ, “ejaakɛ tsuijurɔnaa halɔ Nyɔŋmɔ sumɔɔ.”—2 Kor. 9:7.