Tsɔɔmɔ Mɛi Krokomɛi Anii ní Amɛsumɔ Yehowa
1. Mɛni ji nɔ ni gbalaa mɛi komɛi kɛbɛŋkɛɔ Yehowa?
1 Ani okaiɔ be klɛŋklɛŋ kwraa ni onu nɔ ko ni kɔɔ Yehowa he lɛ? Mɛni ji nɔ ni ha otsi obɛŋkɛ lɛ? Mɛi babaoo ni hiɛ tsui ni ja lɛ baakɛɛ bo akɛ, wɔ-Bɔlɔ lɛ sui ni nɔ bɛ lɛ ahe nilee ni amɛná, titri lɛ musuŋtsɔlɛ kɛ suɔmɔ ni eyɔɔ lɛ ha amɛtsi amɛbɛŋkɛ lɛ.—1 Yoh. 4:8.
2, 3. Mɛɛ gbɛ nɔ wɔbaanyɛ wɔtsɔ wɔkɛ Biblia lɛ Tsɔɔ wolo lɛ aye abua Biblia kaselɔi lɛ koni eha amɛná suɔmɔ babaoo amɛha Yehowa?
2 ‘Wɔ-Nyɔŋmɔ lɛ Nɛ’: Biblia lɛ Tsɔɔ wolo lɛ maa Yehowa suɔmɔ lɛ, kɛ nɔ hewɔ ni ehe hiaa akɛ wɔná wɔkɛ lɛ teŋ wekukpãa lɛ nɔ mi. Mɛɛ gbɛ nɔ wɔbaanyɛ wɔkɛ wolo nɛɛ atsɔɔ mɛi krokomɛi anii koni eha amɛná suɔmɔ babaoo amɛha Nyɔŋmɔ? Kɛ́ wɔmiiwie oti hee ko he lɛ, wɔbaanyɛ wɔbi saji ni baaha mɔ lɛ asusu nii ahe, tamɔ: “Mɛni anɔkwale nɛɛ tsɔɔ bo yɛ Yehowa he?” loo “Mɛɛ gbɛ nɔ sane nɛɛ tsɔɔ akɛ Yehowa ji Tsɛ ni fe fɛɛ ni mɔ ko baanyɛ ená?” Kɛ́ wɔtsɔɔ nii yɛ nɛkɛ gbɛ nɔ lɛ, ebaanyɛ eye ebua nikaselɔ lɛ ní eje shishi ená ekɛ Yehowa teŋ wekukpãa ewala beaŋ fɛɛ.
3 Kɛ́ wɔye wɔbua Biblia kaselɔi ni amɛna akɛ anɔkwa Nyɔŋmɔ koome pɛ, ni ji Nyɔŋmɔ hiɛkalɔ lɛ he nilee ni amɛaaná lɛ ji hegbɛ ni nɔ bɛ lɛ, amɛbaayɔse nɔ ni Yesaia wie lɛ akɛ; ‘wɔ-Nyɔŋmɔ lɛ nɛ.’ (Yes. 25:9) Kɛ́ wɔmiigbála Nyɔŋmɔ Wiemɔ lɛ mli lɛ, esa akɛ wɔma bɔ ni Yehowa baatsɔ odehei anɔyeli ní eto ni yɔɔ Kristo Yesu shishi lɛ nɔ ejɔɔ adesai ni eha eyiŋtoi lɛ aba mli lɛ nɔ mi wɔha amɛ.—Yes. 9:5, 6.
4, 5. Mɛni suɔmɔ ni wɔyɔɔ kɛha Yehowa lɛ tsɔɔ?
4 Nibii ni Tsɔɔ Suɔmɔ ni Wɔyɔɔ Kɛha Yehowa: Wɔle akɛ Yehowa ni aaasumɔ lɛ kɛ tsui muu fɛɛ, kɛ susuma muu fɛɛ, kɛ jwɛŋmɔ fɛɛ lɛ, yaa shɔŋŋ kwraa fe henumɔ kɛkɛ ni aaaná aha Nyɔŋmɔ. Esa akɛ wɔkase esusumɔi lɛ ni wɔkɛtsu nii. (Lala 97:10) Suɔmɔ ni wɔyɔɔ kɛha Nyɔŋmɔ lɛ jeɔ kpo faŋŋ kɛtsɔ emlai lɛ anɔ ni wɔyeɔ, kɛ wɔhe ni wɔkɛwoɔ “jeŋbai krɔŋkrɔŋi kɛ Nyɔŋmɔjamɔi amli” yɛ kaai kɛ shitee-kɛwoo beaŋ po lɛ mli.—2 Pet. 3:11; 2 Yoh. 6.
5 Kɛ́ wɔfee Nyɔŋmɔ suɔmɔnaa nii yɛ suɔmɔ ni wɔyɔɔ kɛha lɛ lɛ hewɔ lɛ, wɔnáa miishɛɛ. (Lala 40:9) Esa akɛ wɔha Biblia nikaselɔ lɛ ayɔse akɛ Nyɔŋmɔ akpɔi lɛ fɛɛ yɛ kɛha E-tsuji anaanɔ hilɛ-kɛhamɔ. (5 Mose 10:12, 13) Kɛ́ mɔ ko ba ejeŋ yɛ Yehowa gbɛtsɔɔmɔ naa lɛ, ekɛ nakai feemɔ tsɔɔ akɛ ehiɛ sɔɔ E-naakpɛɛ nitsumɔi lɛ. Ye obua nikaselɔ lɛ ni eyɔse akɛ Yehowa jalɛ gbɛ̀i lɛ anɔ nyiɛmɔ haa mɔ yeɔ ehe kɛjɛɔ naagbai ni baa kɛ́ wɔhiii shi yɛ emlai lɛ anaa lɛ he.
6. Mɛɛ jɔɔmɔi mɛi ni sumɔɔ Yehowa lɛ anine baanyɛ ashɛ nɔ?
6 Jɔɔmɔi Kɛha Mɛi ni Sumɔɔ Nyɔŋmɔ Lɛ: Yehowa susuɔ heshibalɔi ni sumɔɔ lɛ lɛ ahe waa, ni ejieɔ ‘enibii ni mli kwɔlɔ’ lɛ kpo etsɔɔ amɛ. (1 Kor. 2:9, 10) Kɛ́ amɛná Yehowa yiŋtoi lɛ ahe nilee lɛ, ehaa amɛnáa wɔsɛɛ be he jwɛŋmɔ ni ja kɛ hiɛnɔkamɔ ni ma shi shiŋŋ. (Yer. 29:11) Mɛi ni sumɔɔ Yehowa lɛ anine shɛɔ emlihilɛ ni ekaaa lɛ nɔ. (2 Mose 20:6) Yɛ suɔmɔ kpele ni Nyɔŋmɔ yɔɔ kɛha amɛ hewɔ lɛ, amɛnáa naanɔ wala he hiɛnɔkamɔ lɛ he miishɛɛ.—Yoh. 3:16.
7. Kɛ́ ootsɔɔ mɛi krokomɛi anii ni amɛsumɔ Yehowa lɛ, te onuɔ he tɛŋŋ?
7 Babaoo ni wɔleɔ wɔŋwɛi Tsɛ lɛ he nii lɛ, babaoo ni esa akɛ wɔkɛ mɛi krokomɛi agba ehe sane. (Mat. 13:52) Mɛɛ hegbɛ ni nɔ bɛ po nɛ, akɛ wɔɔtsɔɔ mɛi krokomɛi, titri lɛ wɔbii lɛ anii koni amɛsumɔ Yehowa! (5 Mose 6:5-7) Eba akɛ, wɔ kɛ wɔ-Biblia kaselɔi lɛ fɛɛ baaya nɔ wɔjie Yehowa yi yɛ ‘emlihilɛ kpeteŋkpele’ ni wɔnine shɛɔ nɔ lɛ hewɔ.—Lala 145:7.