Aŋkro Biblia Mli Nikasemɔ kɛ Weku Biblia Mli Nikasemɔ He Miihia!
1. Nɔyeli Kuu lɛ susuɔ wɔhe yɛ gbɛ krɛdɛɛ nɔ yɛ be nɛɛ mli yɛ mɛɛ gbɛ nɔ, ni mɛni hewɔ?
1 Nɔyeli Kuu lɛ susuɔ Yehowa webii lɛ ahilɛkɛhamɔ he waa taakɛ eji yɛ klɛŋklɛŋ afii 100 lɛ mli lɛ. (Bɔf. 15:6, 28) Beni amanehulu kpeteŋkpele lɛ he duŋ kpii lɛ bɛŋkɛɔ kpaakpa nɛɛ, ehe miihia ni Maŋtsɛyeli shiɛlɔi fɛɛ aha wekukpãa ni kã amɛkɛ Yehowa teŋ lɛ mli awa. Te okɛ be ni kulɛ akɛfeɔ Asafo Woloŋ Nikasemɔ lɛ baatsu nii oha tɛŋŋ? Aawo mɛi fɛɛ hewalɛ ni amɛkɛ be nɛɛ afee weku nikasemɔ. Kɛ́ wɔkɛ be nɛɛ tsu nii yɛ nilee mli lɛ, ebaaha wɔpɛi Nyɔŋmɔ Wiemɔ ni ajɛ mumɔŋ aŋma lɛ mli jogbaŋŋ, ni wɔbaaná wala nu ni yɔɔ mli lɛ he sɛɛ.—Lala 1:1-3; Rom. 11:33, 34.
2. Te wɔbaanyɛ wɔto wɔ-gbɛkɛ weku nikasemɔ lɛ he gbɛjianɔ wɔha tɛŋŋ?
2 Gbɛkɛ Weku Nikasemɔ: Aawo wekuyitsei hewalɛ ni amɛtsu sɔ̃ ni Yehowa kɛfɔ̃ amɛnɔ akɛ amɛto weku Biblia nikasemɔ ni mɔ̃ɔ shi, ni afeɔ kɛtsaraa nɔ lɛ he gbɛjianɔ lɛ he nii. (5 Mose 6:6, 7) Nyɛmimɛi hii kɛ yei ni ji oshijafoi ní weku he sɔ̃ ko jwereee amɛnɔ lɛ hu baanyɛ amɛkɛ be nɛɛ afee aŋkro Biblia mli nikasemɔ kɛ niiamlitaomɔ. Ehe miihia ni wɔ fɛɛ ‘wɔhé be’ kɛkase nii, ní wɔkɛjwɛŋ nibii ni wɔkaseɔ lɛ nɔ bɔni afee ni eha wekukpãa ni kã wɔ kɛ Yehowa teŋ lɛ mli awa, ní wɔnyɛ wɔkpee “gbii fɔ̃ji” nɛɛ anaa.—Efe. 5:15, 16.
3, 4. Mɛɛ nibii atsɔɔ akɛ wɔbaanyɛ wɔkɛtsu nii kɛfee nikasemɔ lɛ, ni mɛni esa akɛ efee oti ni ma wɔhiɛ?
3 Nɔ ni Nyɛbaanyɛ Nyɛkase: Watch Tower Publications Index loo Watchtower Library ni yɔɔ CD-ROM nɔ lɛ baanyɛ aye abua nyɛ koni nyɛna nibii ni baaha nyɛ-Biblia mli nikasemɔ bei lɛ afee nɔ ni yɔɔ miishɛɛ diɛŋtsɛ. Wekui baanyɛ amɛsusu saneyitsei ni jeɔ kpo yɛ Buu-Mɔɔ lɛ mli, tamɔ “Nibii ni Haa Miishɛɛ Hiɔ Weku Mli,” “Tsɔɔmɔ Obii lɛ Anii,” kɛ “Kɛha Oblahii kɛ Oblayei” ni fɔɔ kpojee lɛ ahe. Kɛfata he lɛ, Awake! wolo tɛtrɛɛ lɛ hu hiɛ saneyitso ni ji “Young People Ask” kɛ saneyitsei krokomɛi ni yɔɔ miishɛɛ ni wieɔ adebɔɔ nibii ni yɔɔ naakpɛɛ lɛ ahe.
4 Kɛ́ weku lɛ fee ekome ni amɛŋmɛ amɛtsui shi kɛkane Biblia lɛ, ebaaha Biblia mli shishitoo mlai lɛ aka weku lɛ mlibii lɛ fɛɛ ajwɛŋmɔ mli, ni amɛkɛbaatsu nii yɛ amɛshihilɛ mli. (Heb. 4:12) Yɛ bei krokomɛi amli hu lɛ, nyɛbaanyɛ nyɛto gbɛjianɔ ni nyɛkwɛ vidio ni asafo lɛ efee lɛ eko, ni nyɛsusu he. Nyɛbaanyɛ nyɛhala nɔ ni nyɛbaakase kɛ gbɛ nɔ ni nyɛaatsɔ nyɛkase lɛ nyɛha. Mɛni hewɔ obiii oweku lɛ mlibii lɛ ni amɛtsɔɔ bo nɔ ni amɛbaanya he akɛ akase kɛ bɔ ni amɛbaasumɔ ni afee lɛ aha?
5. Mɛni hewɔ aŋkro Biblia mli nikasemɔ kɛ weku Biblia mli nikasemɔ he hiaa waa yɛ wɔshihilɛ mli lɛ?
5 Nɔ Hewɔ ni Ehe Hiaa Bianɛ: Kɛ́ wɔwaje wekukpãa ni kã wɔ kɛ Yehowa teŋ lɛ, ebaasaa wɔ koni ‘wɔdamɔ shi shiŋŋ, ni wɔbaana wɔyiwala ni Yehowa baahere’ lɛ. (2 Mose 14:13) Nyɔŋmɔ gbɛtsɔɔmɔ he miihia fɔlɔi kɛha amɛbii lɛ atsɔsemɔ “yɛ yinɔ kɔ̃ɔdɔ̃ŋ ni bɛ eŋɛlɛ nɔ nɛɛ teŋ.” (Fil. 2:15) Yelikɛbuamɔ he miihia gbekɛbii bɔni afee ni amɛnyɛ amɛkpee jeŋba shara ni yaa nɔ yɛ skul ŋmɛnɛ lɛ naa. (Abɛi 22:3, 6) Esa akɛ gbalashihilɛ mli hefatalɔi abɔ mɔdɛŋ ni amɛwaje wekukpãa ni kã amɛ kɛ Yehowa teŋ, ni ji “kpãa ni akɛbɔ he etɛ” lɛ. (Jaj. 4:12) Belɛ, nyɛhaa wɔkɛ be ni eshwɛ lɛ atsua nii jogbaŋŋ kɛtswaa wɔhe wɔmaa shi yɛ ‘wɔhemɔkɛyeli ni yɔɔ krɔŋkrɔŋ’ lɛ mli!—Yuda 20.