Sanebimɔ He

◼ Kɛ́ mɛi enyɔ komɛi ní baabote gbalashihilɛ mli lɛ miisumɔ ni amɛkpee amɛhe yɛ Maŋtsɛyeli Asa ko nɔ lɛ, mɛɛ saji ehe baahia ni amɛkɛ asafoŋ onukpai lɛ asusu he?

Yookpeemɔ ni atoɔ he gbɛjianɔ yɛ Biblia shishitoo mla naa lɛ woɔ Yehowa hiɛ nyam. Sane nɛɛ ji anɔkwale, titri lɛ yɛ yookpeemɔ ni atoɔ he gbɛjianɔ yɛ Maŋtsɛyeli Asa lɛ nɔ lɛ he, akɛni maŋbii lɛ buɔ nifeemɔi ni yaa nɔ yɛ jɛmɛ lɛ akɛ asafo lɛ gbɛjianɔtoo lɛ hewɔ. Bɔni afee ni “afee nii fɛɛ bɔ ni yɔɔ fɛo kɛ gbɛnaa gbɛnaa” hewɔ lɛ, esa akɛ onukpai lɛ kɛ mɛi ni miitao abote gbalashihilɛ mli lɛ asusu saji komɛi ni kɔɔ yookpeemɔ yɛ Maŋtsɛyeli Asa lɛ nɔ lɛ he.—1 Kor. 14:40.

Esa akɛ mɛi ni miisumɔ ni amɛto amɛyookpeemɔ lɛ he gbɛjianɔ yɛ Maŋtsɛyeli Asa ko nɔ lɛ aŋma wolo ayaha asafoi ni kpeɔ yɛ nakai asa lɛ nɔ lɛ eko mli sɔɔmɔ ajinafoi akuu lɛ kɛbi amɛ gbɛ. Esa akɛ amɛtsɔ hiɛ kwraa amɛkɛ wolo ni amɛbaaŋma lɛ aha, ni esa akɛ amɛtsɔɔ gbi kɛ be ni amɛbaasumɔ ni amɛkpee amɛhe yɛ asa lɛ nɔ. Esa akɛ amɛha ehi amɛjwɛŋmɔ mli akɛ, onukpai lɛ tsakeŋ be ni asafo lɛ kɛfeɔ nikasemɔ lɛ yɛ yookpeemɔ lɛ hewɔ. Kɛfata he lɛ, esa akɛ mɛi ni yaabote gbalashihilɛ mli nɛɛ afee mɛi ni feɔ nɔkwɛmɔnɔ kpakpa, ni hiɔ shi yɛ Biblia mli shishitoo mlai kɛ jalɛ tɛi ni Yehowa efolɔ eshwie shi lɛ anaa.

Bɔni afee ni yookpeemɔ lɛ awo wɔ-Nyɔŋmɔ lɛ hiɛ nyam lɛ, esa akɛ mɛi ni yaabote gbalashihilɛ mli lɛ kɛ sɔɔmɔ ajinafoi akuu lɛ asusu gbɛjianɔ ní amɛto lɛ he dani amɛmu gbɛjianɔtoo lɛ naa. Eyɛ mli akɛ onukpai lɛ ebɔŋ mɔdɛŋ akɛ amɛkɛ nibii ni amɛ diɛŋtsɛ amɛsumɔɔ lɛ aaanyɛ mɛi ni boteɔ gbalashihilɛ mli lɛ anɔ moŋ, shi kɛ́ mɛi ni boteɔ gbalashihilɛ mli lɛ miito nɔ ko ni esaaa he gbɛjianɔ lɛ, esa akɛ amɛbo tsakemɔi ni onukpai lɛ kɛ amɛ baasusu he lɛ atoi. Lalai pɛ ni abaanyɛ atswa lɛ ji nɔ ni ahala kɛjɛ Kingdom Melodies lɛ mli, loo nɔ ni yɔɔ wɔlalawolo lɛ mli. Kɛ́ akɛ nibii komɛi baasaa Maŋtsɛyeli Asa lɛ nɔ loo abaato sɛi lɛ yɛ gbɛ kroko nɔ lɛ, esa akɛ abi ajinafoi akuu lɛ dã. Kɛ́ aashá mfonirii loo vidio lɛ, esaaa akɛ afeɔ lɛ bɔ ni baatsɔɔ akɛ abɛ bulɛ kɛha nifeemɔ lɛ. Kɛ́ amɛmiitao amɛba Maŋtsɛyeli Asa lɛ nɔ amɛbakase bɔ ni amɛbaafee amɛnii amɛha yɛ yookpeemɔ gbi lɛ nɔ, ni efiteŋ asafoŋ gbɛjianɔtoo ko lɛ, onukpai lɛ baanyɛ aŋmɛ amɛ gbɛ. Esaaa ákɛ akɛ yookpeemɔ lɛ he ninefɔ̃ɔ wolo ko kpɛtɛɔ adafitswaa tao lɛ nɔ. Shi kɛlɛ, onukpai ni yɔɔ Maŋtsɛyeli Asa ni abaafee yookpeemɔ lɛ yɛ nɔ lɛ baaha atswa adafi kuku yɛ Sɔɔmɔ Kpee lɛ mli koni akɛha asafoŋbii lɛ ale akɛ yookpeemɔ ko baaya nɔ yɛ Maŋtsɛyeli Asa lɛ nɔ.

Eyɛ mli akɛ ejeee taomɔnii akɛ yookpeemɔ lɛ he bialɔi lɛ afee mɛi ni abaptisi amɛ moŋ, shi ebafeŋ nɔ ni sa ákɛ abaaha mɛi ni shihilɛ gbɛ teɔ shi ewoɔ Biblia mli shishitoo mlai, loo jeŋba mli ni amɛyɔɔ lɛ baaha mɛi ni afɔ̃ amɛ nine lɛ aná jwɛŋmɔ enyɔnyɔɔnyɔ yɛ gbɛjianɔtoo lɛ he lɛ afata he. Kɛ́ asafoŋ onukpa ko yɛ lɛ, lɛ esa akɛ eha wiemɔ lɛ. Onukpai lɛ ji Nyɔŋmɔ Wiemɔ lɛ tsɔɔlɔi ni he esa, no hewɔ lɛ, amɛ ji mɛi ni baanyɛ agbála Ŋmalɛ mli shishitoo mlai ni he hiaa kɛha nifeemɔ nɛɛ mli lɛ amli jogbaŋŋ.—1 Tim. 3:2.

Akɛni nyɛmi nuu ni baaha wiemɔ lɛ hu he baa sane lɛ mli hewɔ lɛ, esa akɛ atsɔ hiɛ aha ele nibii ni kɔɔ gbɛjianɔ lɛ he lɛ mli fitsofitso. Ekɛ mɛi ni baabote gbalashihilɛ mli lɛ baakpe koni ebi amɛ ni amɛtsɔɔ lɛ bɔ ni amɛba amɛjeŋ amɛha beni amɛnyiɛɔ kɛtsɔɔ gbalashihilɛ lɛ hiɛ lɛ; esa akɛ amɛgba lɛ nɔ fɛɛ nɔ ni tee nɔ, ní amɛkɛ nɔ ko eteee lɛ. Kɛ́ nuu lɛ loo yoo lɛ ebote gbalashihilɛ mli pɛŋ lɛ, esa akɛ ekɛ odaseyeli ni tsɔɔ akɛ eyɛ hegbɛ yɛ Ŋmalɛ kɛ mla naa akɛ eboteɔ gbalashihilɛ mli ekoŋŋ lɛ atsɔɔ. (Mat. 19:9) Nɔ ni baafata enɛ he ji ní ekɛ wolo ni tsɔɔ akɛ etse gbala mli lɛ atsɔɔ onukpa lɛ.

Ni kɛ́ ato gbɛjianɔ akɛ abaaha Biblia mli wiemɔ yɛ kusum naa gbalashihilɛ ko sɛɛ hu? Kɛ́ ahaaa bei pii ashwie mli dani aha wiemɔ lɛ, ekolɛ yɛ nakai gbi lɛ nɔ nɔŋŋ lɛ, ehaa bulɛ baa Kristofoi agbalashihilɛ lɛ he yɛ akutso lɛ mli. Kɛfata he lɛ, esaaa akɛ ahaa hesaamɔ kɛ gbɛjianɔtoi krokomɛi kɛha wiemɔ ni abaaha lɛ haa mɛi náa jwɛŋmɔ lɛ akɛ kpaako aboteɔ gbalashihilɛ lɛ mli yɛ mla naa. Yɛ anɔkwale mli lɛ, kɛ́ mɛi ni boteɔ gbalashihilɛ mli lɛ kpɛ amɛyiŋ akɛ amɛkɛ amɛwaonaa gbɛi baayawo mla naa gbalashihilɛ wolo ko shishi yɛ yiŋtoo ko hewɔ lɛ, esaaa akɛ afeɔ yeli-kɛ-numɔ nɔ ko, ahaŋ Biblia mli wiemɔ, ni asafo lɛ kɛ ehe woŋ mli yɛ gbɛ ko kwraa nɔ.—km-GA 4/06 bf. 3-5.

Kɛ́ mɛi ni yaabote gbalashihilɛ mli lɛ jɛ amɛtsui mli amɛkɛ onukpai lɛ gba nibii nɛɛ ahe sane ni amɛkɛ amɛ fee ekome lɛ, ebaaha yookpeemɔ gbi lɛ afee nɔ ni yɔɔ miishɛɛ kɛha amɛfɛɛ.—Abɛi 15:22; Heb. 13:17.