Be ni Nyɔŋmɔ bɔɔ nii lɛ fɛɛ yɔɔ enɔyeli shishi lɛ, ekomefeemɔ kɛ toiŋjɔlɛ hi amɛteŋ

Mɛni Hewɔ Nyɔŋmɔ Maŋtsɛyeli Lɛ He Hiaa Wɔ Lɛ?

Be ni Yehowa, wɔ-Bɔlɔ lɛ, bɔ adesai lɛ, no mli lɛ, lɛ pɛ ji Nɔyelɔ. Ejɛ suɔmɔ mli eye amɛnɔ. Efee shihilɛhe fɛfɛo ko, ni ji Eden abɔɔ lɛ, ehã adesai koni amɛhi jɛmɛ. Ehã amɛ niyenii srɔtoisrɔtoi babaoo hu. Agbɛnɛ hu, ekɛ nitsumɔ ni hãa mɔ tsui nyɔɔ emli wo amɛdɛŋ. (1 Mose 1:28, 29; 2:8, 15) Akɛni Nyɔŋmɔ ji nɔyelɔ ni yɔɔ suɔmɔ hewɔ lɛ, eji adesai tee nɔ amɛhi enɔyeli lɛ shishi kulɛ amɛbaaná toiŋjɔlɛ.

Adam hiɛ aduawa ni agu eyeli ni Hawa kɛhã lɛ lɛ. — Klɛŋklɛŋ adesai lɛ kpoo Nyɔŋmɔ akɛ amɛ-Nɔyelɔ

Biblia lɛ hãa wɔleɔ akɛ, ŋwɛibɔfo atuatselɔ ko ni sɛɛ mli lɛ abale lɛ akɛ Satan Abonsam lɛ, wie eshi hegbɛ ni Nyɔŋmɔ yɔɔ akɛ eyeɔ nɔ lɛ. Ekɛɛ adesai baanyɛ aná miishɛɛ waa kɛji Nyɔŋmɔ etsɔɔɔ amɛ gbɛ, ni eyeee amɛnɔ po. Mɔbɔ sane ji akɛ, Adam kɛ Hawa, wɔklɛŋklɛŋ fɔlɔi lɛ, he Satan amale lɛ amɛye, ni amɛyafata ehe kɛtse Nyɔŋmɔ hiɛ atua.—1 Mose 3:1-6; Kpojiemɔ 12:9.

Akɛni Adam kɛ Hawa kpoo Nyɔŋmɔ akɛ amɛ-Nɔyelɔ hewɔ lɛ, amɛshĩa lɛ, ni ji Paradeiso lɛ, kɛ hiɛnɔkamɔ ni amɛyɔɔ akɛ amɛbaahi shi kɛya naanɔ akɛ mɛi ni yɔɔ gbɔmɔtsoŋ hewalɛ kpakpa lɛ, ŋmɛɛ amɛ. (1 Mose 3:17-19) Yiŋ ni amɛkpɛ lɛ sa bii ni amɛfɔ sɛɛ mli lɛ hu ahe. Biblia lɛ kɛɔ akɛ, akɛni Adam fee esha hewɔ lɛ, ‘esha ba je lɛ mli, ni gbele tsɔ esha nɔ kɛba.’ (Romabii 5:12) Esha kɛ naagba wulu kroko hu eba, no ji: “Gbɔmɔ yeɔ gbɔmɔ nɔ kɛyeɔ lɛ awui.” (Jajelɔ 8:9) Enɛ tsɔɔ akɛ, kɛ́ adesai ye amɛ diɛŋtsɛ amɛhe nɔ lɛ, bɔ fɛɛ bɔ ni fee lɛ, naagbai baaba.

ADESAI BƆI NƆYELI

Nimrod efu kɔntɔŋŋ kɛdamɔ shi. Mɛi miima tsu yɛ esɛɛgbɛ. — Nimrod tse Yehowa hiɛ atua

Klɛŋklɛŋ nɔyelɔ ni ji adesa ni Biblia lɛ tsĩ etã ji Nimrod. Ni etse Yehowa nɔyeli lɛ hiɛ atua. Kɛjɛ Nimrod beiaŋ kɛbaa nɛɛ, mɛi ni yɔɔ hegbɛ lɛ kɛ amɛhegbɛ lɛ etsu nii yɛ gbɛ gbonyo nɔ. Aaafee afii 3,000 ni eho nɛ lɛ, Maŋtsɛ Solomon ŋma akɛ: “Mina mɛi ni awaa amɛ yi lɛ ayaafonui lɛ, ni mɔ ko bɛ ni baashɛje amɛmii. Mɛi ni waa amɛ yi lɛ ahe wa.”—Jajelɔ 4:1.

Ŋmɛnɛ lɛ, nibii tsakeko. Yɛ afi 2009 mli lɛ, United Nations lɛ wolo ko tsɔɔ mli akɛ, eefee faŋŋ akɛ, gbɛ gbonyo ni atsɔɔ nɔ ayeɔ mɛi anɔ lɛ ji yiŋtoo kome hewɔ ni “adesai kɛ naagbai babaoo kpeɔ lɛ.”

ETSƐŊ, NYƆŊMƆ BAAFEE HE NƆ KO!

Ehe miihia ni adesai aná nɔyelɔi kpakpai kɛ nɔyeli kpakpa. Ni no ji nɔ ni wɔ-Bɔlɔ lɛ ewo shi akɛ ebaahã wɔ!

Mfonirii ni ato naa: Yibii ni adesai anɔyeli woɔ. 1. Asia yoo ko hiɛ ebi ni miifo kɛta gbɛjegbɛ ko ni nɔ ewo muji nɔ. 2. Nuu onukpa ko ni bɛ hewalɛ ni kã helatsamɔhe. 3. Asraafoi etee ta, ni amɛmiitswara tui. 4. Asafoku ko mli efu, amɛmiibolɔ, ni amɛhiɛ taoi ni aŋmala nɔ nii. 5. Yoo ko kɛ ebiyoo damɔ amɛshia lɛ hiɛ, ni amɛna akɛ ajwa amɛshinaa lɛ glase lɛ. 6. Maŋtiase ko kɛ emli lasu kɛ ilɛtrik kpai pii. — Adesai anɔyelii ni hi fe fɛɛ lɛ po nyɛko atsu adesai anaagbai wuji lɛ ahe nii

Nyɔŋmɔ eto Maŋtsɛyeli, loo nɔyeli ko, ní baabaye adesai anɔyelii fɛɛ anajiaŋ, ni “lɛ pɛ ebaadamɔ shi kɛya naanɔ.” (Daniel 2:44) No ji Maŋtsɛyeli ni mɛi akpekpei abɔ sɔleɔ ni eba lɛ. (Mateo 6:9, 10) Shi jeee Nyɔŋmɔ diɛŋtsɛ baafee nɔyeli nɛɛ nɔyelɔ. Moŋ lɛ, ehala mɔ ko ni ehi shi pɛŋ akɛ adesa lɛ akɛ nɔyeli nɛɛ Nɔyelɔ. Namɔ Nyɔŋmɔ ehala?