Gbɛ nɔ ni Aaatsɔ Akɛ ‘Nyɔŋmɔ Suɔmɔ’ Wolo lɛ Afee Biblia Mli Nikasemɔ
1. Mɛɛ yiŋtoo hewɔ afee ‘Nyɔŋmɔ Suɔmɔ’ wolo lɛ?
1 Kwɛ miishɛɛ ni wɔná beni wɔnine shɛ wolo hee ni ji ‘Nyɛhia Nyɔŋmɔ Suɔmɔ lɛ Mli’ lɛ nɔ yɛ “Nyɔŋmɔ Mumɔ lɛ Tsɔɔ Wɔ Gbɛ” Kpokpaa Wulu nɔ Kpee lɛ shishi lɛ! Taakɛ atswa adafi lɛ, ato wolo nɛɛ he gbɛjianɔ koni eye ebua wɔ ni wɔle, ni wɔsumɔ jeŋba he mlai ni Yehowa kɛha lɛ, shi jeee ni wɔkɛtsɔɔ Biblia mli shishijee tsɔɔmɔi. Wɔkɛ wolo nɛɛ haŋ yɛ shĩa kɛ shĩa shiɛmɔ nitsumɔ lɛ mli.
2. Mɛɛ gbɛ nɔ abaatsɔ akɛ wolo nɛɛ atsu nii, ni namɛi akɛbaakase?
2 Akɛ wolo nɛɛ baatsu nii akɛ wolo ni ji enyɔ ní akɛ Biblia kaselɔi baakase kɛ́ akɛ amɛ gbe Biblia lɛ Tsɔɔ wolo lɛ kasemɔ naa. Ha ehi ojwɛŋmɔ mli akɛ esoro nyɛmɔ ni mɔ fɛɛ mɔ kɛkaseɔ anɔkwale lɛ kɛ bɔ ni ekɛtsuɔ nii yɛ eshihilɛ mli. Esa akɛ afee nikasemɔ lɛ yɛ nikaselɔ lɛ nyɛmɔ naa. Bɔɔ mɔdɛŋ ni oha nikaselɔ lɛ anu nikasemɔ lɛ shishi jogbaŋŋ. Yɛ shihilɛi babaoo mli lɛ, esaaa ákɛ akɛ mɛi ni akɛ amɛ ekase woji srɔtoi momo yɛ be ni eho lɛ mli, shi amɛyaaa asafoŋ kpeei, ni eyɛ faŋŋ hu akɛ amɛsumɔɔɔ ni amɛhaa amɛshihilɛ gbɛ kɛ Biblia mli anɔkwalei ni atsɔɔ amɛ lɛ kpãa gbee lɛ kaseɔ wolo nɛɛ.
3. Kɛ́ wɔkɛ mɔ ko miikase nii yɛ Já Nyɔŋmɔ wolo lɛ mli amrɔ nɛɛ, mɛni esa akɛ wɔfee?
3 Kɛ́ amrɔ nɛɛ okɛ mɔ ko miikase Já Nyɔŋmɔ wolo lɛ, ni nyɛshɛ naagbee yitsei lɛ anɔ lɛ, no lɛ obaanyɛ okpɛ oyiŋ akɛ nyɛbaagbe nakai wolo lɛ kasemɔ naa, koni owo nikaselɔ lɛ hewalɛ ni lɛ diɛŋtsɛ ekane ‘Nyɔŋmɔ Suɔmɔ’ wolo lɛ. Kɛ́ jeee nakai lɛ, ebaahi akɛ nyɛtsake kɛba wolo hee lɛ mli, ni nyɛje shishi. Taakɛ eji yɛ Biblia lɛ Tsɔɔ wolo lɛ he lɛ, nyɛbaanyɛ nyɛsusu saji krokomɛi ni fata he ni yɔɔ wolo lɛ naagbee gbɛ lɛ he kɛ́ nyɛmiisumɔ.
4. Kɛ́ abaptisi wɔ-Biblia kaselɔ lɛ beni egbeko Biblia lɛ Tsɔɔ wolo lɛ loo ‘Nyɔŋmɔ Suɔmɔ’ wolo lɛ naa lɛ, mɛni esa akɛ wɔfee?
4 Kɛ́ abaptisi nikaselɔ ko beni egbeko Biblia lɛ Tsɔɔ wolo lɛ loo ‘Nyɔŋmɔ Suɔmɔ’ wolo lɛ kasemɔ naa lɛ, no lɛ esa akɛ nyɛtsa nikasemɔ lɛ nɔ kɛyashi ebaagbe ‘Nyɔŋmɔ Suɔmɔ’ wolo lɛ naa. Eyɛ mli akɛ abaptisi nikaselɔ lɛ moŋ, shi obaanyɛ obu be, sɛɛkuu-kɛsaramɔ, kɛ nikasemɔ lɛ he akɔntaa. Kɛ́ shiɛlɔ ko fata ohe kɛtee ni ekɛ ehe wo nikasemɔ lɛ mli lɛ, lɛ hu ebaanyɛ ebu be lɛ he akɔntaa.
5. Mɛɛ gbɛ nɔ abaanyɛ akɛ ‘Nyɔŋmɔ Suɔmɔ’ wolo lɛ aye abua shiɛlɔi ni ekpa shiɛmɔ yaa be saŋŋ nɛ lɛ?
5 Kɛ́ Asafoŋ Sɔɔmɔ Ajinafoi Akuu lɛ mlinyo ko kɛɛ okɛ mɔ ko ni ekpa shiɛmɔyaa afee Biblia mli nikasemɔ lɛ, ekolɛ ebaaha okɛ lɛ asusu saneyitsei pɔtɛɛ komɛi ni yɔɔ ‘Nyɔŋmɔ Suɔmɔ’ wolo lɛ mli lɛ ahe. Esaaa akɛ nikasemɔ nɛɛ yaa nɔ be kpalaŋŋ. Kwɛ nibii kpakpai ni ato he gbɛjianɔ yɛ wolo nɛɛ mli aha wɔ ní baaye abua wɔ koni wɔhi “Nyɔŋmɔ suɔmɔ lɛ mli”!—Yuda 21.