Shiɛmɔ Haa Wɔhe Waa Yɛ Mumɔŋ
1. Mɛɛ sɛɛnamɔ shiɛmɔ nitsumɔ lɛ haa wɔnine shɛɔ nɔ?
1 Kɛ́ wɔkɛ ekãa tsu shiɛmɔ nitsumɔ lɛ, ebaanyɛ ewo wɔ hewalɛ, ni ebaanyɛ eha miishɛɛ ni wɔyɔɔ hu aya hiɛ. Ekã shi faŋŋ akɛ, yiŋtoo titri hewɔ ni wɔkɛ wɔhe woɔ shiɛmɔ nitsumɔ lɛ mli ji ni wɔsa Yehowa hiɛ. Shi kɛ́ wɔbo famɔ akɛ “shiɛmɔ wiemɔ lɛ” toi lɛ, ehaa Yehowa jɔ́ɔ wɔ, ni wɔnáa he sɛɛ yɛ gbɛi krokomɛi anɔ. (2 Tim. 4:2; Yes. 48:17, 18) Kɛlɛ, mɛɛ gbɛ nɔ shiɛmɔ baanyɛ awo wɔ hewalɛ ni eha wɔná miishɛɛ?
2. Mɛɛ gbɛi anɔ shiɛmɔ nitsumɔ lɛ woɔ wɔ hewalɛ?
2 Wɔnáa Hewalɛwoo kɛ Jɔɔmɔ: Shiɛmɔ woɔ wɔ hewalɛ ni wɔkɛ wɔhiɛ fɔ̃ɔ Maŋtsɛyeli jɔɔmɔi lɛ anɔ moŋ fe naagbai ni wɔkɛ kpeɔ amrɔ nɛɛ. (2 Kor. 4:18) Biblia tsɔɔmɔi amli ni wɔɔgbála lɛ woɔ hemɔkɛyeli ni wɔyɔɔ yɛ Yehowa shiwoi lɛ amli lɛ mli hewalɛ, ni ehaa hiɛsɔɔ ni wɔyɔɔ kɛha anɔkwale lɛ mli waa. (Yes. 65:13, 14) Beni wɔyeɔ wɔbuaa mɛi krokomɛi koni amɛya amɛhiɛ yɛ mumɔŋ, ni ‘amɛkatsɔmɔ je lɛ fã’ lɛ, belɛ wɔmiiwo wɔfai shi ni wɔtswa akɛ wɔfeŋ je lɛ fã lɛ mli hewalɛ.—Yoh. 17:14, 16; Rom. 12:2.
3. Mɛɛ gbɛ nɔ wɔsɔɔmɔ nitsumɔ lɛ yeɔ ebuaa ni wɔná Kristofoi asui?
3 Kɛ́ wɔkɛ wɔhe wo shiɛmɔ nitsumɔ lɛ mli lɛ, eyeɔ ebuaa wɔ ni wɔnáa Kristofoi asui. Ákɛ nɔkwɛmɔnɔ lɛ, mɔdɛŋ ni wɔbɔɔ koni ‘wɔtsɔmɔ wɔhe nɔ fɛɛ nɔ wɔha mɛi fɛɛ’ lɛ yeɔ ebuaa wɔ ni wɔnáa heshibaa su. (1 Kor. 9:19-23) Beni wɔkɛ mɛi ni ‘efee yuyaa tamɔ tooi ni bɛ kwɛlɔi’ lɛ gbaa sane lɛ, ehaa wɔkaseɔ musuŋtsɔlɛ kɛ bɔ ni anuɔ nii ahe ahaa mɛi. (Mat. 9:36) Kɛ́ abooo wɔ toi loo ate shi awo wɔ, ni fɛɛ sɛɛ lɛ wɔmia wɔhiɛ lɛ, wɔkaseɔ tsuishitoo. Kɛ́ wɔkɛ wɔhe ha kɛye wɔbua mɛi krokomɛi lɛ, wɔmiishɛɛ lɛ faa babaoo.—Bɔf. 20:35.
4. Te oshiɛmɔ nitsumɔ lɛ haa onuɔ he ohaa tɛŋŋ?
4 Mɛɛ jɔɔmɔ eji nɛkɛ, akɛ wɔná sɔɔmɔ ni kɛ yijiemɔ haa Mɔ pɛ ni sa wɔjamɔ lɛ! Sɔɔmɔ nitsumɔ lɛ woɔ wɔ hewalɛ. Mɛi ni tuɔ amɛhe fɛɛ ‘kɛyeɔ sanekpakpa lɛ he odase yɛ faŋŋ mli’ lɛ náa jɔɔmɔi babaoo.—Bɔf. 20:24.