Wɔshiɛmɔ Nitsumɔ Lɛ—Etsɔɔ Suɔmɔ ni Wɔyɔɔ Kɛha Nyɔŋmɔ
1. Mɛni suɔmɔ ni Yesu yɔɔ kɛha Nyɔŋmɔ lɛ tsirɛ lɛ ni efee?
1 Suɔmɔ tsirɛ Yesu ni etsu eshiɛmɔ nitsumɔ lɛ. Yesu sɔɔmɔ nitsumɔ lɛ fãi srɔtoi lɛ fɛɛ ji odaseyeli ni tsɔɔ faŋŋ akɛ esumɔɔ Yehowa. Yesu kɛɛ: “Beni afee ni je lɛ aná ale akɛ misumɔɔ Tsɛ lɛ ni bɔ ni Tsɛ lɛ wo mi kita lɛ nakai mifeɔ.” (Yoh. 14:31) Ákɛ mɛi ni nyiɛɔ Yesu nanemaahei lɛ asɛɛ lɛ, wɔ hu wɔná hegbɛ ni wɔkɛaatsɔɔ suɔmɔ ni mli kwɔ ni wɔyɔɔ kɛha Nyɔŋmɔ yɛ wɔshiɛmɔ nitsumɔ lɛ mli.—Mat. 22:37; Efe. 5:1, 2.
2. Mɛɛ gbɛ nɔ suɔmɔ ni wɔyɔɔ kɛha Yehowa lɛ saa wɔshiɛmɔ nitsumɔ lɛ he?
2 “Ogbɛi lɛ He Atse”: Kɛ́ wɔkɛ hegbɛi fɛɛ ni wɔnáa lɛ wie Yehowa kɛ e-Maŋtsɛyeli lɛ he wɔtsɔɔ mɛi krokomɛi lɛ, etsɔɔ suɔmɔ ni wɔyɔɔ kɛha Nyɔŋmɔ, ni wɔkɛ nakai feemɔ hu tseɔ egbɛi lɛ he. (Lala 83:19; Ezek. 36:23; Mat. 6:9) Taakɛ eji yɛ Yesu gbɛfaŋ lɛ, wɔshiɛmɔ nitsumɔ lɛ haa anaa bɔ ni wɔshweɔ ni Yehowa gbɛi lɛ he atse, ni afee esuɔmɔnaa nii.—Mat. 26:39.
3. Mɛɛ gbɛ nɔ suɔmɔ ni wɔyɔɔ kɛha Yehowa lɛ yeɔ ebuaa wɔ ni wɔyeɔ gbɛtsiinii anɔ?
3 Suɔmɔ Tsirɛɔ Wɔ ni Wɔyeɔ Gbɛtsiinii Anɔ: Suɔmɔ ni wɔyɔɔ kɛha Yehowa lɛ yeɔ gbɛtsiinii fɛɛ nɔ. (1 Kor. 13:4, 7) Yesu kɛ shihilɛi srɔtoi ni kulɛ ebaanyɛ eje enijiaŋ wui koni efɔ̃ɔ eshiɛmɔ nitsumɔ lɛ kpe. Shi beni ekɛ gbɛtsiinii kpe lɛ, suɔmɔ ni mli wa ni eyɔɔ kɛha Yehowa kɛ shwelɛ ni eyɔɔ akɛ efee esuɔmɔnaa nii lɛ ye ebua lɛ ni eye gbɛtsiinii lɛ anɔ. (Mar. 3:21; 1 Pet. 2:18-23) Wɔ hu wɔkɛ naagbai babaoo kpeɔ, shi suɔmɔ ni wɔyɔɔ kɛha Nyɔŋmɔ lɛ baanyɛ aye abua wɔ ni wɔye nɔ. Kɛ́ wɔnyiɛ nɔkwɛmɔnɔ ni Kristo fee efɔ̃ shi lɛ sɛɛ kpaakpa lɛ, wɔkɛ ekãa baatsu wɔshiɛmɔ nitsumɔ lɛ ní wɔsheee gbeyei. Eyɛ mli akɛ shiteekɛwoo ni wekumɛi kɛbaa, gbɔmɔtsoŋ hewalɛnamɔ he naagba, afii ni yaa hiɛ, loo mɛi ni booo wɔsane lɛ toi lɛ baanyɛ aje wɔnijiaŋ wui moŋ, shi no etsĩii wɔnaa koni wɔkajie suɔmɔ ni wɔyɔɔ kɛha Yehowa lɛ kpo kɛtsɔ wɔshiɛmɔ nitsumɔ ni wɔɔtsu yɛ gbɛ ni mɔɔ shi lɛ nɔ.
4. Mɛɛ hegbɛ suɔmɔ ni wɔyɔɔ kɛha Yehowa lɛ haa wɔnáa?
4 Suɔmɔ yɛ hewalɛ waa, ni eji hegbɛ ni wɔná akɛ wɔjɛ wɔsusuma muu fɛɛ mli wɔha suɔmɔ ni wɔyɔɔ kɛha Nyɔŋmɔ lɛ miije kpo faŋŋ yɛ wɔshiɛmɔ nitsumɔ lɛ mli. (1 Kor. 13:13) Beni wɔbɛŋkɛɔ be ní abaatse Yehowa gbɛi lɛ he shikome nyɔŋlo lɛ nɛɛ, eba akɛ ‘wɔsuɔmɔ lɛ aaafá kɛya nɔ, ni eteke nɔ.’—Fil. 1:9; Mat. 22:36-38.