Te Obaaha Hetoo Oha Tɛŋŋ?
1. Mɛni hewɔ esa akɛ wɔkase gbɛ nɔ ni Yesu tsɔ eha sanebimɔi ahetoo lɛ?
1 Gbɛ ni Yesu tsɔ nɔ eha sanebimɔi ahetoo lɛ mɔ̃ shi jogbaŋŋ, ni enɛ feɔ mɛi naakpɛɛ kɛbashi ŋmɛnɛ. Kɛ́ mɛi bi wɔ saji srɔtoi yɛ shiɛmɔ nitsumɔ lɛ mli lɛ, ebaafee nɔ ni hi akɛ wɔɔkase gbɛ nɔ ni Yesu tsɔ eha sanebimɔi ahetoo lɛ.—1 Pet. 2:21.
2. Mɛni baanyɛ aye abua wɔ ní wɔha sane hetoo jogbaŋŋ lɛ?
2 Klɛŋklɛŋ lɛ, Bo Toi: Yesu susuɔ yiŋtoo hewɔ ni mɔ ko biɔ lɛ sane lɛ he. Bei komɛi lɛ, enɛ baabi ni ebi mɔ lɛ saji kɛle nɔ̃ diɛŋtsɛ ni mɔ lɛ susuɔ. Ekolɛ mɔ ko ni biɔ akɛ, “Ani nyɛheɔ Yesu nɔ nyɛyeɔ?” lɛ miisusu nɔ̃ hewɔ ni nyɛyeee Blonya lɛ he. Kɛ́ oyɔse nɔ̃ hewɔ ni mɔ lɛ biɔ sane lɛ, obaanyɛ okɛ lɛ asusu nibii ahe jogbaŋŋ.—Luka 10:25-37.
3. Mɛni baaye abua wɔ koni wɔjɛ Ŋmalɛi lɛ amli kɛha sanebimɔi ahetoo jogbaŋŋ?
3 Okɛ Nyɔŋmɔ Wiemɔ lɛ Aha Hetoo: Bei pii lɛ, gbɛ ni hi fe fɛɛ ji ní okɛ Biblia lɛ aaaha sanebimɔ ko hetoo. (2 Tim. 3:16, 17; Heb. 4:12) Reasoning wolo lɛ kɛ “Bible Topics for Discussion” ni yɔɔ New World Translation of the Holy Scriptures lɛ mli lɛ yeɔ ebuaa ni akɛ hetoo ni sa lɛ haa pɛpɛɛpɛ. Kɛ́ mɔ ni biɔ sane lɛ heee Biblia lɛ nɔ eyeee po lɛ, obaanyɛ otsɔ ŋaa gbɛ nɔ otsɔɔ lɛ nɔ ni Ŋmalɛi lɛ tsɔɔ. Wo lɛ hewalɛ ni ekɛ hiɛdɔɔ asusu nilee ni yɔɔ Biblia lɛ mli ni ana akɛ ehi jogbaŋŋ lɛ he. Kɛ́ okase Yesu lɛ, hetoo ni obaaha lɛ baafee tamɔ “shika akutui yɛ jwiɛtɛi kpanyai amli”—nɔ ni bulɛ yɔɔ he, ni sa, ní sɛɛnamɔ yɔɔ he.—Abɛi 25:11.
4. Mɛɛ bei amli esaaa akɛ wɔhaa sane fɛɛ sane ni abiɔ wɔ lɛ hetoo?
4 Ani Esa akɛ Wɔha Sane Fɛɛ Sane ni Abiɔ Wɔ lɛ Hetoo? Kɛ́ obɛ hetoo kɛha sanebimɔ ko lɛ, kaaha efee bo hiɛgbele akɛ oookɛɛ akɛ: “Mileee, shi masumɔ mayatao nibii amli ni mabaha bo hetoo.” Ekolɛ heshibaa kɛ mɔhesusumɔ ni tamɔ nɛkɛ ni ooojie lɛ kpo lɛ baaha shiatsɛ lɛ afɔ̃ bo nine koni obasara lɛ ekoŋŋ. Kɛ́ oyɔse akɛ mɛi ni biɔ sane lɛ ji shiteekɛwolɔi ni ekolɛ amɛmiitao amɛtee ŋwanejee shi lɛ, no lɛ kasemɔ Yesu kɛtsɔ bulɛ mli ni ooojɛ ofo sanegbaa lɛ nɔ lɛ nɔ. (Luka 20:1-8) Nakai nɔŋŋ hu kɛ́ mɔ ko ni bɛ anɔkwale lɛ he miishɛɛ miibɔ mɔdɛŋ ní ekɛ bo ataa saji anaa lɛ, esa akɛ ojɛ bulɛ mli ofo sanegbaa lɛ nɔ, ni okɛ be ni oyɔɔ lɛ atao mɛi ni yɔɔ wiemɔ lɛ he miishɛɛ lɛ.—Mat. 7:6.
5. Mɛni wɔbaanyɛ wɔkase kɛjɛ gbɛ nɔ ni Yesu tsɔ eha sanebimɔi ahetoo lɛ mli?
5 Yesu le akɛ ehe ni ekɛaafɔ̃ Yehowa nɔ lɛ he miihia koni enyɛ etsu enitsumɔ akɛ ‘eye anɔkwale lɛ he odase,’ ni eha mɛi ni jɛɔ anɔkwayeli mli amɛbiɔ saji lɛ hetoo lɛ. (Yoh. 18:37) Eji hegbɛ ni wɔná akɛ wɔɔkase Yesu kɛ́ wɔmiiha mɛi ni “ajie ato naanɔ wala” lɛ sanebimɔi ahetoo.—Bɔf. 13:48.