Okɛ Hiɛdɔɔ Ashiɛ!
1. Mɛɛ ŋaawoo ni Paulo kɛha ehe baahia ni wɔbo toi yɛ wɔgbii nɛɛ amli?
1 “Shiɛmɔ wiemɔ lɛ, kã he.” (2 Tim. 4:2) Mɛni hewɔ Paulo ŋaawoo lɛ he hiaa waa yɛ wɔgbii nɛɛ amli lɛ? Mɛɛ gbɛ nɔ wiemɔi nɛɛ baanyɛ aná wɔ kɛ mɛi krokomɛi ashihilɛ nɔ hewalɛ?
2. Mɛni hewɔ wɔkɛ hiɛdɔɔ taoɔ mɛi ni nuko sanekpakpa lɛ?
2 Mɛi Awala yɛ Oshara Mli: Gbɔmɛi akpekpei abɔ yɛ je lɛ mli lolo ní nuko sanekpakpa ni baanyɛ ahere amɛyiwala lɛ he. (Rom. 10:13-15; 1 Tim. 4:16) Wɔnine miishɛ mɛi babaoo ni hiɛ tsui kpakpa yɛ shikpɔŋkuku ni afɔɔ mli nitsumɔ lɛ mli lɛ anɔ. Kɛ́ wɔtsake gbii loo bei ni wɔkɛyaa mɛi lɛ aŋɔɔ lɛ mli lɛ, ekolɛ wɔkɛ mɔ kroko baakpe. Kɛ́ wɔkɛ hiɛdɔɔ tao mɛi nɛkɛ lɛ, ehaŋ wɔhenilee agbá wɔnaa, ni wɔyeŋ mɔ ko lá yi sɔ̃ hu.—Bɔf. 20:26.
3. Te wɔɔfee tɛŋŋ wɔkɛ wɔbe atsu nii jogbaŋŋ yɛ shiɛmɔ nitsumɔ lɛ mli?
3 Yɛ shiteekɛwoo ni naa wa ní klɛŋklɛŋ afii 100 lɛ mli Kristofoi lɛ kɛkpe lɛ fɛɛ sɛɛ lɛ, amɛha ‘amɛtsɔɔmɔ lɛ yi Yerusalem fɛɛ.’ (Bɔf. 5:28) Ani wɔ hu wɔtswa wɔfai shi akɛ ‘wɔbaaye odase kɛmɔ shi’ nakai nɔŋŋ? (Bɔf. 10:42) Ani wɔkɛ be tsuɔ nii jogbaŋŋ yɛ shiɛmɔ nitsumɔ lɛ mli? Kɛ́ mɛi krokomɛi miifee sɛɛkuu-kɛsaramɔ ni wɔmiimɛ yɛ sɛɛ lɛ, ani wɔŋɔɔ hegbɛ lɛ kɛyeɔ mɛi ni hoɔ lɛ odase?
4. Mɛɛ gbɛ nɔ hiɛdɔɔ ni wɔkɛshiɛɔ lɛ yeɔ ebuaa wɔ koni wɔya nɔ wɔsara?
4 Ehaa Wɔhiɛ Hiɔ Wɔhe Nɔ Waa: Akɛni nibii agbɛjianɔtoo nɛɛ ebɛŋkɛ enaagbee hewɔ lɛ, esa akɛ wɔha wɔhiɛ ahi wɔhe nɔ ni wɔya nɔ wɔsara. (1 Tes. 5:1-6) Kɛ́ wɔfɔɔ Maŋtsɛyeli hiɛnɔkamɔ ni wɔyɔɔ lɛ he wiemɔ lɛ, ehaaa wɔye wɔtsui yɛ nibii agbɛjianɔtoo nɛɛ he. (Luka 21:34-36) Beni wɔyaa nɔ ‘wɔkwɛɔ’ Yehowa gbi lɛ ‘gbɛ’ lɛ, no tsirɛɔ wɔ ni wɔkɛ wɔhe woɔ shiɛmɔ nitsumɔ ni abaatsɔ nɔ ahere mɛi ayiwala lɛ mli babaoo.—2 Pet. 3:11, 12.
5. Mɛɛ gbɛ nɔ bulɛ ni wɔyɔɔ kɛha wala lɛ kanyaa wɔ yɛ shiɛmɔ nitsumɔ lɛ mli?
5 Kɛ́ wɔkɛ hiɛdɔɔ shiɛ lɛ, no tsɔɔ akɛ wɔbuɔ wala taakɛ Yehowa buɔ wala lɛ: “Esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Pet. 3:9; Ezek. 33:11) Nyɛhaa wɔtswaa wɔfai shi akɛ, wɔnine baashɛ mɛi babaoo ni wɔɔnyɛ lɛ anɔ yɛ wɔshikpɔŋkuku lɛ mli kɛjie Yehowa yi!—Lala 109:30.