Bɔ ni Wɔɔfee Wɔjie Hiɛsɔɔ Kpo yɛ Nyɔŋmɔ Nikeenii ni Fe Fɛɛ lɛ He
1. Mɛni hewɔ wɔhiɛ sɔɔ nɔ ni Yehowa efee eha wɔ lɛ waa lɛ?
1 Yɛ “duromɔ nii kpakpai” babaoo ni Yehowa kɛduro wɔ lɛ fɛɛ mli lɛ, kpɔ̃mɔnɔ lɛ ni esuɔmɔ Bi lɛ kɛha lɛ ji nɔ ni fe fɛɛ. (Yak. 1:17) Ehaa wɔnáa jɔɔmɔi babaoo, ni wɔhe eshaifaa hu fata he. (Efe. 1:7) Wɔhiɛ sɔɔ enɛ be fɛɛ be. Yɛ Kaimɔ be lɛ mli lɛ, wɔheɔ be kɛsusuɔ nikeenii ni jara wa nɛɛ he.
2. Mɛɛ gbɛ nɔ wɔbaanyɛ wɔtsɔ wɔkɛ wɔweku lɛ ajie hiɛsɔɔ kpo yɛ kpɔ̃mɔnɔ lɛ he?
2 Nyɛjiea Hiɛsɔɔ Kpo: Bɔni afee ni oye obua oweku lɛ koni amɛjie hiɛsɔɔ kpo lɛ, mɛni hewɔ nyɛsusuuu saji ni kɔɔ kpɔ̃mɔnɔ lɛ he beni nyɛfeɔ nyɛgbɛkɛ Weku Jamɔ lɛ yɛ otsii ni baatsɔ Kaimɔ lɛ ní abaafee March 30 lɛ hiɛ lɛ mli? Agbɛnɛ hu ákɛ weku lɛ, nyɛsusua Biblia kanemɔ krɛdɛɛ kɛha Kaimɔ lɛ he daa gbi. Susumɔ bɔ ni oná kpɔ̃mɔnɔ lɛ he sɛɛ akɛ aŋkro lɛ he, ni osusu bɔ ni etsake osusumɔ yɛ Yehowa, bo diɛŋtsɛ, mɛi krokomɛi, kɛ wɔsɛɛ be he lɛ he. Ehe baanyɛ aba sɛɛnamɔ kɛha nyɛ hu kɛ́ nyɛkase lalai heei enyɔ ni ji lala 8 kɛ 109 lɛ ni abaalá yɛ Kaimɔ lɛ shishi lɛ.—Lala 77:13.
3. Mɛɛ gbɛ nɔ wɔbaanyɛ wɔtsɔ wɔjie hiɛsɔɔ kpo?
3 Nifeemɔi ni Tsɔɔ Hiɛsɔɔ: Hiɛsɔɔ ni wɔyɔɔ kɛha kpɔ̃mɔnɔ lɛ tsirɛɔ wɔ koni wɔkɛ mɛi krokomɛi agba Yehowa, kɛ suɔmɔ kpele kpo ni ejie beni etsu e-Bi lɛ kɛba lɛ he sane. (Lala 145:2-7) Yɛ March, April, kɛ May nyɔji lɛ amli lɛ, wekui komɛi jieɔ hiɛsɔɔ ni amɛyɔɔ lɛ kpo kɛtsɔ gbɛjianɔ ni amɛtoɔ koni weku lɛ mlinyo kome anyɛ ekɛ ehe awo gbɛgbalɔi awamɔ nitsumɔ lɛ mli lɛ nɔ. Kɛ́ enɛ ehiii feemɔ lɛ, ani nyɛbaanyɛ ‘nyɛhe be’ kɛtsu babaoo yɛ shiɛmɔ nitsumɔ lɛ mli? (Efe. 5:16) Hiɛsɔɔ ni wɔyɔɔ lɛ hu baatsirɛ wɔ ni wɔye wɔbua mɛi krokomɛi koni amɛkɛ wɔ aya Kaimɔ lɛ. (Kpoj. 22:17) Jee shishi oŋmala mɛi ni obaaku osɛɛ kɛyasara amɛ, Biblia mli nikaselɔi, wekumɛi, mɛi ni okɛtsuɔ nii, kɛ okutsoŋbii ni obaafɔ̃ amɛ nine lɛ oshwie shi, ní yɛ no sɛɛ lɛ okɛ ohe awo tafãa krɛdɛɛ kɛha Kaimɔ lɛ mli kɛmɔ shi.
4. Mɛɛ gbɛ̀i anɔ wɔbaanyɛ wɔkɛ Kaimɔ be lɛ atsu nii jogbaŋŋ?
4 Kaimɔ be lɛ haa wɔnáa hegbɛi heei ni wɔkɛbaaha Yehowa ana bɔ ni wɔhiɛ sɔɔ nikeenii ni ekɛha adesai lɛ. Eba akɛ wɔkɛ be nɛɛ baatsu nii kɛjie hiɛsɔɔ ni wɔyɔɔ kɛha kpɔ̃mɔnɔ lɛ kɛ “Kristo nifalɛ ni anyɛɛɛ shishi ana” lɛ fɛɛ.—Efe. 3:8.