‘Aaashiɛ Sanekpakpa Nɛɛ’!
1. Te wɔfeɔ tɛŋŋ wɔleɔ akɛ nɔ ko nɔ ko nyɛŋ atsi shiɛmɔ nitsumɔ lɛ naa lɛ?
1 Nɔ ko nɔ ko nyɛŋ atsi Yehowa naa kɔkɔɔkɔ koni ekanyɛ etsu esuɔmɔnaa nii ahe nii. (Yes. 14:24) Eyɛ mli akɛ ebafee tamɔ nɔ ni Kojolɔ Gideon kɛ ehii 300 lɛ nyɛŋ aye Midian asraafoi 135,000 lɛ anɔ kunim kɔkɔɔkɔ moŋ, shi Yehowa kɛɛ lɛ akɛ: ‘Ooohere Israel yiwala yɛ Midianbii lɛ adɛŋ! Ani jeee mi mitsuo?’ (Koj. 6:14) Mɛɛ nitsumɔ Yehowa fiɔ sɛɛ ŋmɛnɛ? Yesu kɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.” (Mat. 24:14) Mɔ ko mɔ ko nyɛŋ atsi nitsumɔ nɛɛ naa koni akanyɛ atsu agbe naa!
2. Mɛni hewɔ wɔbaanyɛ wɔkpa gbɛ akɛ Yehowa baaye ebua wɔteŋ mɔ fɛɛ mɔ yɛ sɔɔmɔ nitsumɔ lɛ mli lɛ?
2 Yehowa Yeɔ Ebuaa Wɔ akɛ Aŋkroaŋkroi: Eyɛ mli akɛ wɔyɛ nɔmimaa akɛ Yehowa baaha e-Dasefoi lɛ aye omanye akɛ kuu moŋ, shi ani wɔbaanyɛ wɔkpa gbɛ akɛ ebaaye ebua wɔ akɛ aŋkroaŋkroi? Beni bɔfo Paulo yaje fimɔ shihilɛ mli lɛ, Yehowa tsɔ e-Bi Yesu nɔ eye ebua lɛ. (2 Tim. 4:17) Nakai nɔŋŋ hu wɔbaanyɛ wɔná nɔmimaa akɛ Yehowa baajɔɔ mɔdɛŋ ni wɔteŋ mɔ fɛɛ mɔ bɔɔ akɛ ebaafee esuɔmɔnaa nii lɛ nɔ.—1 Yoh. 5:14.
3. Mɛɛ shihilɛi amli Yehowa yeɔ ebuaa wɔ yɛ?
3 Ani daa gbi shihilɛ mli henaagbamɔ lɛ gbalaa omli aahu akɛ onyɛɛɛ otsu babaoo yɛ sɔɔmɔ nitsumɔ lɛ mli? “Lɛ ehaa mɔ ni egbɔjɔ lɛ hewalɛ.” (Yes. 40:29-31) Ani okɛ yiwaa loo shiteekɛwoo miikpe? “Shɛ ojatsu lɛ ofɔ̃ Yehowa nɔ, ni lɛ eeehiɛ omli.” (Lala 55:23) Ani bei komɛi lɛ osheɔ gbeyei akɛ oooshiɛ? “Yaa, ni mikɛ onaabu aaahi shi.” (2 Mose 4:11, 12) Ani hela haaa onyɛ otsu babaoo yɛ sɔɔmɔ nitsumɔ lɛ mli? Yehowa hiɛ sɔɔ mɔdɛŋ ni ojɛɔ otsui muu fɛɛ mli obɔɔ lɛ, ekɔɔɔ he eko bɔ ni eji bibioo ha, ni ebaanyɛ ekɛ bo atsu esuɔmɔnaa nii ahe nii.—1 Kor. 3:6, 9.
4. Mɛɛ gbɛ nɔ Yehowa mli hekɛnɔfɔɔ ni wɔɔná lɛ baaye abua wɔ?
4 Yehowa “ekpã enine mli, ni namɔ aaakpale lɛ?” (Yes. 14:27) Akɛni wɔyɛ hekɛnɔfɔɔ yɛ Yehowa mli akɛ ebaajɔɔ wɔsɔɔmɔ nitsumɔ lɛ nɔ hewɔ lɛ, nyɛhaa wɔyaa nɔ wɔshiɛa kɛ “ekãa [yɛ Yehowa hewalɛ naa, NW].”—Bɔf. 14:3.