Gbɛjegbɛ He Odaseyeli ni Mɔɔ Shi
1. Mɛni ji gbɛ kome ni wɔbaanyɛ wɔtsɔ nɔ wɔkase Yesu?
1 Beni Yesu tsuɔ esɔɔmɔ nitsumɔ lɛ yɛ shikpɔŋ lɛ nɔ lɛ, eshashaooo shi akɛ eeeshiɛ eha mɛi ni ekɛkpeɔ yɛ gbɛ nɔ kɛ hei krokomɛi lɛ. (Luka 9:57-61; Yoh. 4:7) Eesumɔ ni ekɛ mɛi babaoo agba eshɛɛ sane ni he hiaa lɛ he sane bɔ ni eeenyɛ. Ŋmɛnɛ lɛ, gbɛjegbɛ he odaseyeli ji gbɛ ko ni sa jogbaŋŋ ni wɔɔtsɔ nɔ wɔye wɔbua mɛi koni amɛná Nyɔŋmɔ he nilee. (Abɛi 1:20) Kɛ́ wɔ tsutsu wɔŋɔ hegbɛ kɛshiɛ, ni wɔkɛ sanesɛɛkɔmɔ tsu nii lɛ, wɔbaaye omanye waa.
2. Mɛɛ gbɛ nɔ wɔɔtsɔ wɔtsu gbɛjegbɛ he odaseyeli nitsumɔ lɛ jogbaŋŋ?
2 Bo Tsutsu Ŋɔɔ Hegbɛ Lɛ: Bei pii lɛ, ehi jogbaŋŋ akɛ wɔ tsutsu wɔɔnina mɛi fe nɔ ni wɔɔdamɔ shi loo wɔɔta shi yɛ he kome wɔmɛ koni amɛ moŋ amɛbanina wɔ. Feemɔ ohiɛ ŋmɔlɔŋmɔlɔ, kwɛmɔ mɔ lɛ hiɛ, ni okɛ lɛ awie kɛ naajɔlɛ tamɔ onaanyo. Kɛ́ shiɛlɔi krokomɛi fata ohe lɛ, ehi jogbaŋŋ akɛ nyɛgbɛlɛ nyɛmli ni nyɛnina mɛi lɛ mɔ kome mɔ kome. Esa akɛ obɔ mɔdɛŋ otao gbɛ nɔ ni oootsɔ onine ashɛ mɔ lɛ nɔ ekoŋŋ. Kɛ́ ebaahi lɛ, beni nyɛgba sane lɛ nyɛta lɛ, jɛɛ mlihilɛ mli oha mɔ lɛ atsɔɔ bo bɔ ni ooofee onine ashɛ enɔ ekoŋŋ. Shiɛlɔi komɛi fɔɔ gbɛjegbɛ he odaseyeli yɛ he kome too lɛ nɔŋŋ, ni no haa amɛkɛ mɛi ni amɛkɛwie pɛŋ lɛ nɔŋŋ kpeɔ shii abɔ, ni amɛyaa nɔ amɛhaa mɛi lɛ náa anɔkwale lɛ he miishɛɛ.
3. Mɛɛ gbɛ nɔ wɔɔtsɔ wɔkɛ sɛɛyoomɔ atsu nii kɛ́ wɔmiiye odase yɛ gbɛjegbɛi ahe?
3 Okɛ Sɛɛyoomɔ Atsu Nii: Kɛ́ ookwɛ akɛ nɛgbɛ esa akɛ odamɔ, ni namɔ esa akɛ okɛwie lɛ, okɛ sɛɛyoomɔ atsu nii. Ehe ehiaaa ni oye mɔ fɛɛ mɔ ni baaho lɛ odase. Okɛ ohiɛ afɔ̃ shi. Ákɛ nɔkwɛmɔnɔ lɛ, kɛ́ ona akɛ mɔ lɛ miiye oyai lɛ, ebaahi jogbaŋŋ akɛ oha eho. Kɛ́ ooye odase yɛ shwapo ko hiɛ, loo he ko ni tamɔ nakai lɛ, okɛ hiɛshikamɔ atsu nii bɔni afee ni okaha nɔtsɛ lɛ mli fu bo. Bei pii lɛ, ehi jogbaŋŋ akɛ oshiɛ otsɔɔ mɛi kɛ́ amɛmiije kpo moŋ fe be ni amɛmiibote mli. Ninamɔ mɛi bɔ ni haŋ amɛtsui afã loo amɛhiɛ afee amɛ yaa. Kɛfata he lɛ, okɛ hiɛshikamɔ atsu nii kɛ́ okɛ woji miiha. Kɛ́ mɛi nyaaa sane lɛ he tsɔ lɛ, obaanyɛ oha amɛ dɛhiɛmɔ wolo moŋ fe nɔ ni okɛ woji tɛtrɛbii lɛ aaaha amɛ.
4. Mɛni hewɔ gbɛjegbɛ he odaseyeli ji shiɛmɔ nitsumɔ lɛ fã ko ni ŋɔɔ ni he yɔɔ sɛɛnamɔ lɛ?
4 Wɔtsɔɔ gbɛjegbɛ he odaseyeli nitsumɔ lɛ nɔ wɔgbɛɔ anɔkwale lɛ he dumɔwui lɛ babaoo wɔshwãa yɛ be kukuoo mli. (Jaj. 11:6) Ehaa wɔkɛ mɛi ní wɔyaninaaa amɛ kɛ́ wɔtee shĩa kɛ shĩa lɛ ateŋ mɛi komɛi kpeɔ. Too gbɛjianɔ ni okɛ ohe awo gbɛjegbɛ he odaseyeli nitsumɔ lɛ mli, ejaakɛ eji shiɛmɔ nitsumɔ lɛ fã ko ni ŋɔɔ ni mɔɔ shi jogbaŋŋ.