“Nyɛmli Ashãa Nyɛ”
1. Mɛni ehe ebahia waa ni afee aha mɛi ŋmɛnɛ?
1 Ehe ebahia waa ni akɛ mlitsɔlɛ aye abua mɛi babaoo fe bei fɛɛ ni eho. Bɔ ni je lɛŋ shihilɛ lɛ yaa nɔ efiteɔ lɛ eha mɛi babaoo bɛ miishɛɛ, amɛhao waa, ni amɛhiɛnɔkamɔ hu etã. Yelikɛbuamɔ he miihia mɛi akpekpei abɔ, ni akɛni wɔji Kristofoi hewɔ lɛ, wɔji mɛi ni esa akɛ wɔjie suɔmɔ krɔŋŋ kpo wɔtsɔɔ mɛi nɛɛ. (Mat. 22:39; Gal. 6:10) Mɛɛ gbɛ nɔ wɔɔtsɔ wɔfee enɛ?
2. Mɛni ji gbɛ ni hi fe fɛɛ ni wɔɔtsɔ nɔ wɔjie mlitsɔlɛ kpo?
2 Mlitsɔlɛ Nitsumɔ: Nyɔŋmɔ pɛ ji mɔ ni baanyɛ ashɛje adesai amii diɛŋtsɛ ní eha amɛná miishɛɛ daa. (2 Kor. 1:3, 4) Yehowa woɔ wɔ hewalɛ ni wɔkase lɛ kɛtsɔ ‘wɔmli ni aaashã wɔ aha wɔhe’ lɛ nɔ, ni ekɛ nitsumɔ ewo wɔdɛŋ ni wɔshiɛ Maŋtsɛyeli lɛ he sanekpakpa lɛ wɔtsɔɔ mɛi ni yɔɔ wɔshikpɔŋkuku lɛ mli lɛ. (1 Pet. 3:8, Ga Biblia hee) Wɔnyɛmɔ fɛɛ ni wɔkɛaatsu nitsumɔ nɛɛ ji gbɛ ni hi fe fɛɛ ni wɔɔtsɔ nɔ wɔshɛje “mɛi ni amɛtsuii ekumɔ lɛ” amii, ejaakɛ Nyɔŋmɔ Maŋtsɛyeli lɛ pɛ ji adesai ni naa nɔ lɛ ahiɛnɔkamɔ diɛŋtsɛ. (Yes. 61:1) Akɛni Yehowa mli shãa lɛ yɛ ewebii lɛ ahe hewɔ lɛ, etsɛŋ ni ebaafo efɔŋfeemɔ sɛɛ ni ekɛ jeŋ hee ni jalɛ yɔɔ mli baaba.—2 Pet. 3:13.
3. Te wɔɔfee tɛŋŋ wɔna mɛi taakɛ Yesu fee lɛ?
3 Naa Mɛi Taakɛ Yesu Fee Lɛ: Beni Yesu shiɛɔ ehaa asafoi babaoo po lɛ, egbala ejwɛŋmɔ kɛtee amɛnɔ akɛ aŋkroaŋkroi. Ekɛ ejwɛŋmɔ ma amɛteŋ mɔ fɛɛ mɔ mumɔŋ hiamɔnii anɔ. Amɛtamɔ tooi ni bɛ kwɛlɔ. Beni Yesu na amɛ lɛ emli tsɔ lɛ, ni no ha ekɛ tsuishitoo tsɔɔ amɛ nii. (Mar. 6:34) Kɛ́ wɔna mɛi taakɛ Yesu fee lɛ, no baatsirɛ wɔ koni wɔjie mlitsɔlɛ diɛŋtsɛ kpo wɔtsɔɔ amɛ akɛ aŋkroaŋkroi. Gbee ni wɔkɛbaawie kɛ bɔ ni wɔbaafee wɔhiɛ wɔha lɛ baaha ana enɛ faŋŋ. Wɔkɛ shiɛmɔ nitsumɔ lɛ baaye klɛŋklɛŋ gbɛhe, ni wɔbaaha nɔ ni wɔbaawie lɛ akɔ aŋkro fɛɛ aŋkro hiamɔ nii ahe.—1 Kor. 9:19-23.
4. Mɛni hewɔ esa akɛ wɔwo mlitsɔlɛ lɛ?
4 Mɛi babaoo ni jɛ jeŋmaji fɛɛ amli lɛ miibo Maŋtsɛyeli shɛɛ sane lɛ toi, ni amɛhaaa suɔmɔ kpo ni ajieɔ atsɔɔ amɛ lɛ afee efolo. Kɛ́ wɔtee nɔ wɔwo mlitsɔlɛ lɛ, ebaawo Yehowa, wɔ-Nyɔŋmɔ ni mli shãa lɛ lɛ hiɛ nyam, ni wɔbaasa ehiɛ.—Kol. 3:12.