Buu Oshiɛmɔ Nitsumɔ lɛ Akɛ Hegbɛ ni Jara Wa
1. Te mɛi babaoo ni yɔɔ je lɛ mli lɛ buɔ wɔshiɛmɔ nitsumɔ lɛ amɛhaa tɛŋŋ?
1 Mɛi babaoo ni yɔɔ Satan je lɛ mli lɛ buɔ wɔshiɛmɔ nitsumɔ lɛ akɛ “kwashiaiasane.” (1 Kor. 1:18-21) Kɛ́ wɔkwɛɛɛ jogbaŋŋ lɛ, susumɔ ni ejaaa nɛɛ baanyɛ aha wɔnijiaŋ aje wui, ni ebaaha ekãa ni wɔkɛtsuɔ nii lɛ naa aba shi. (Abɛi 24:10; Yes. 5:20) Mɛɛ yiŋtoi ahewɔ esa akɛ wɔbu hegbɛ ni wɔyɔɔ akɛ wɔji Yehowa Odasefoi lɛ akɛ nɔ ni jara wa lɛ?—Yes. 43:10.
2. Mɛni hewɔ abaanyɛ akɛɛ akɛ wɔshiɛmɔ nitsumɔ lɛ ji nitsumɔ krɔŋkrɔŋ lɛ?
2 Nitsumɔ Krɔŋkrɔŋ: Bɔfo Paulo tsɔɔ akɛ shiɛmɔ nitsumɔ lɛ ji nitsumɔ krɔŋkrɔŋ, ni ewie he akɛ eji osɔfo nitsumɔ, ni tsɔɔ akɛ wɔmiitsu kɛmiiha Nyɔŋmɔ. (Rom. 15:15, 16) Mɛɛ gbɛ nɔ shiɛmɔ nitsumɔ lɛ ji nitsumɔ krɔŋkrɔŋ? Wɔhe ni wɔkɛwoɔ shiɛmɔ nitsumɔ lɛ mli lɛ haa wɔbatsɔmɔɔ ‘Mɔ Krɔŋkrɔŋ lɛ,’ Yehowa “hefatalɔi nitsulɔi,” ni wɔyeɔ wɔbuaa kɛtseɔ egbɛ́i lɛ he. (1 Kor. 3:9; 1 Pet. 1:15) Yehowa buɔ wɔshiɛmɔ nitsumɔ lɛ akɛ eji “yijiemɔ afɔle,” no hewɔ lɛ, shiɛmɔ nitsumɔ lɛ ji wɔjamɔ lɛ fã ko ni he hiaa waa diɛŋtsɛ.—Heb. 13:15.
3. Mɛni hewɔ sanekpakpa lɛ shiɛmɔ ji hegbɛ kpele lɛ?
3 Sanekpakpa lɛ shiɛmɔ ji hegbɛ kpele ko ni akɛha mɛi fioo ko. Eji akɛ nitsumɔ nɛɛ wo ŋwɛi bɔfoi adɛŋ kulɛ, ŋwanejee ko kwraa bɛ he akɛ amɛkɛ miishɛɛ baatsu he nii kɛmɔ shi diɛŋtsɛ. (1 Pet. 1:12) Shi Yehowa ehala wɔ ní wɔji adesai ni yeee emuu, “sũ nii” lɛ, koni wɔtsu hegbɛ kpele nɛɛ he nii!—2 Kor. 4:7.
4. Te wɔɔfee tɛŋŋ wɔha ana akɛ wɔbuɔ shiɛmɔ nitsumɔ lɛ akɛ eji nɔ ko ni jara wa lɛ?
4 Wɔkɛyeɔ Klɛŋklɛŋ Gbɛhe: Akɛni wɔbuɔ hegbɛ ni wɔná nɛɛ waa hewɔ lɛ, wɔnaa shiɛmɔ nitsumɔ lɛ akɛ eji “nii ni hi titri” yɛ wɔshihilɛ mli lɛ ateŋ ekome. (Fil. 1:10) No hewɔ lɛ, wɔtoɔ gbɛjianɔ yɛ otsi fɛɛ otsi mli koni wɔná mli gbɛfaŋnɔ. Lalafolɔ ko ni buɔ hegbɛ ni ená akɛ efata lalafolɔi akuu ko ni ehe gbɛ́i waa yɛ je lɛŋ lɛ ahe lɛ buɔ hegbɛ nɛɛ akɛ ejara wa waa, no hewɔ lɛ, esaa ehe jogbaŋŋ yɛ lalai lɛ amli be fɛɛ be kɛ́ amɛyaalá, ni ebɔɔ mɔdɛŋ ni etsu hesai ni eyɔɔ lɛ ahe nii jogbaŋŋ. Nakai nɔŋŋ esa akɛ wɔ hu wɔsaa wɔhe jogbaŋŋ dani wɔkɛ wɔhe awo shiɛmɔ nitsumɔ lɛ mli, bɔni afee ni ‘wɔnyɛ wɔja anɔkwale wiemɔ lɛ mli pɛpɛɛpɛ,’ koni wɔbɔ mɔdɛŋ ni wɔha bɔ ni ‘wɔtsɔɔ nii’ wɔhaa lɛ aya hiɛ.—2 Tim. 2:15; 4:2.
5. Namɔ hiɛ sɔɔ wɔshiɛmɔ nitsumɔ lɛ waa?
5 Kaaha susumɔ ni ejaaa ni mɛi babaoo hiɛ lɛ miiha onijiaŋ miije wui. Kaimɔ akɛ mɛi babaoo yɛ wɔshikpɔŋkuku lɛ mli lolo ní náa wɔsaramɔi lɛ ahe miishɛɛ. Shi, jeee adesai anɔkpɛlɛmɔ ji nɔ ni wɔtaoɔ. Nɔ ni he hiaa fe fɛɛ ji bɔ ni Yehowa nuɔ he ehaa, ni ehiɛ sɔɔ mɔdɛŋ ni wɔbɔɔ lɛ waa naakpa.—Yes. 52:7.