Yehowa Miitsɔse Wɔ Kɛha Nitsumɔ Nɛɛ
1. Kɛ́ Yehowa kɛ nitsumɔ ko wo adesai adɛŋ lɛ, mɛni hu efeɔ?
1 Kɛ́ Yehowa kɛ nitsumɔ ko wo adesai adɛŋ lɛ, ekɛ yelikɛbuamɔ haa amɛ koni amɛnyɛ amɛtsu he nii. Akɛ nɔkwɛmɔnɔ lɛ, beni Yehowa kɛɛ Noa koni ekpɛ adeka, ni ji nɔ ko ni ekpɛko eko pɛŋ lɛ, Yehowa tsɔɔ lɛ bɔ ni esa akɛ efee lɛ. (1 Mose 6:14-16) Beni akɛ nitsumɔ wo Mose ni ji tookwɛlɔ ni baa ehe shi lɛ dɛŋ koni ekɛ Israel maŋ onukpai lɛ kɛ Farao ayawie lɛ, Yehowa wo lɛ shi akɛ: “Mikɛ onaabu aaahi shi, ni matsɔɔo nɔ ni owie.” (2 Mose 4:12) Yɛ nitsumɔ ni akɛha wɔ akɛ wɔshiɛ sanekpakpa lɛ gbɛfaŋ hu lɛ, Yehowa tsɔɔ wɔ bɔ ni wɔbaafee wɔtsu he nii. Eetsɔ Teokrase Sɔɔmɔ Skul lɛ kɛ Sɔɔmɔ Kpee lɛ nɔ eetsɔse wɔ kɛha nitsumɔ nɛɛ. Te wɔɔfee tɛŋŋ wɔná tsɔsemɔ nɛɛ he sɛɛ?
2. Mɛɛ gbɛ nɔ wɔɔtsɔ wɔná Teokrase Sɔɔmɔ Skul lɛ he sɛɛ?
2 Teokrase Sɔɔmɔ Skul Lɛ: Kanemɔ ni okase nibii ni abaasusu he yɛ kpee nɛɛ eko fɛɛ eko shishi lɛ dani oya. Kɛkɛ lɛ, beni onaa bɔ ni nifeelɔi lɛ tsuɔ amɛnifeemɔi lɛ ahe nii amɛhaa lɛ, ebaaha oya nɔ okase bɔ ni atsɔɔ nii jogbaŋŋ. (Abɛi 27:17) Kɛ́ ooba kpeei nɛɛ lɛ, esa akɛ okɛ Sɔɔmɔ Skul wolo lɛ aba, koni onyɛ okadi otii komɛi yɛ mli. Kɛ́ skul nɔkwɛlɔ lɛ tsɛ́ sane yisɛɛ yɛ wolo lɛ mli, yɛ skulnyo fɛɛ skulnyo nifeemɔ sɛɛ lɛ, folɔmɔ saji otii ni obaasumɔ ni okɛtsu nii lɛ ashishi, koni oŋmala otii lɛ yɛ gbɛ ni ashi yɛ wolo lɛ baafai lɛ anaabugbɛ lɛ anɔ. Shi, gbɛ ni hi fe fɛɛ ni obaanyɛ otsɔ nɔ oná skul lɛ he sɛɛ ji, ni okɛ ohe baawo mli. Ani oŋma ogbɛ́i? Kɛ́ aha bo nifeemɔ lɛ, saamɔ ohe jogbaŋŋ, ní okɛ ŋaa ni abaawo bo lɛ atsu nii. Okɛ nɔ ni okase lɛ atsu nii yɛ shiɛmɔ nitsumɔ lɛ mli.
3. Mɛni baanyɛ aye abua wɔ koni wɔná Sɔɔmɔ Kpee lɛ he sɛɛ?
3 Sɔɔmɔ Kpee Lɛ: Wɔbaanyɛ wɔkai ŋaawoi ni akɛhaa yɛ kpee nɛɛ shishi lɛ jogbaŋŋ kɛ́ wɔtsɔ hiɛ wɔkane sane ni abaasusu he lɛ, ni wɔsaa wɔhe kɛha saji ahetoohamɔ. Kɛ́ wɔha wɔsaji ahetoo lɛ fee kukuji lɛ, ebaaha mɛi babaoo anyɛ awie eko. Kwɛmɔ nɔkwɛmɔnii ni afeɔ lɛ jogbaŋŋ, koni okɛ ŋaawoi ni onaa akɛ ebaanyɛ eha oshiɛmɔ nitsumɔ lɛ amɔ shi jogbaŋŋ lɛ atsu nii. Kɛ́ akɛ saji komɛi ni baanyɛ aye abua bo yɛ oshiɛmɔ nitsumɔ lɛ mli lɛ wo Wɔ Maŋtsɛyeli Sɔɔmɔ lɛ mli lɛ, okɛ nakai saji lɛ ato.
4. Mɛni hewɔ esa akɛ wɔkɛ tsɔsemɔ ni Yehowa kɛhaa wɔ lɛ atsu nii jogbaŋŋ lɛ?
4 Taakɛ nitsumɔ ni akɛha Noa kɛ Mose lɛ ji lɛ, nitsumɔ ni akɛwo wɔdɛŋ akɛ wɔshiɛ sanekpakpa lɛ yɛ shikpɔŋ lɛ nɔ fɛɛ lɛ bɛ mlɛo. (Mat. 24:14) Kɛ́ wɔkɛ wɔhe fɔ̃ Yehowa, wɔ-Tsɔɔlɔ Kpeteŋkpele lɛ nɔ, ni wɔkɛ tsɔsemɔ ni ekɛhaa wɔ lɛ tsu nii jogbaŋŋ lɛ, wɔbaaye omanye.—Yes. 30:20.