Kapɛji Enyɔ ni Shɛɛɛ Nɔ Ko

Gbɛ kome ni he hiaa waa ni wɔtsɔɔ nɔ wɔfĩɔ Maŋtsɛyeli lɛ he nibii asɛɛ ji shika ní wɔkɛfiɔ jeŋ muu fɛɛ shiɛmɔ nitsumɔ lɛ sɛɛ lɛ. Ni kɛji wɔbɛ nɔ ko tsɔ hu?

Be ko lɛ, Yesu na yoo okulafo ohiafo ko ni kɛ kapɛji enyɔ ni shɛɛɛ nɔ ko miiwo sɔlemɔwe lɛ onia adeka lɛ mli. Suɔmɔ ni eyɔɔ kɛha Yehowa lɛ tsirɛ lɛ ni ekɛ ‘nɔ ni eyɔɔ yɛ ehia mli ni ekɛlɛɔ ehe lɛ fɛɛ bawo mli.’ (Mar. 12:41-44, Ga Biblia hee) Yesu na enɛ ni ewie he, ni tsɔɔ akɛ onia ni etsu lɛ sa Nyɔŋmɔ hiɛ waa diɛŋtsɛ. Nakai nɔŋŋ hu mra be mli Kristofoi lɛ bu hegbɛ kpele akɛ atsu onia kɛfĩ sɔɔmɔ nitsumɔ lɛ sɛɛ lɛ akɛ eji Kristofoi fɛɛ, mɛi ni yɔɔ nii kɛ ohiafoi fɛɛ asɔ̃. Ákɛ nɔkwɛmɔnɔ lɛ, bɔfo Paulo wie Makedoniabii lɛ ahe akɛ, yɛ “amɛhia ni mli kwɔ lɛ” fɛɛ sɛɛ lɛ, ‘amɛkɛ tutɔmɔ babaoo kpa fai koni aha amɛ hu amɛha nɔ ko.’—2 Kor. 8:1-4.

No hewɔ lɛ, kɛ́ ‘kapɛji enyɔ ni shɛɛɛ nɔ ko’ pɛ wɔbaanyɛ wɔha po lɛ, esa akɛ wɔkai akɛ kɛ́ abua onia bibii nɛɛ fɛɛ anaa lɛ, efeɔ babaoo. Kɛ́ wɔjɛ wɔtsuiŋ wɔtsu onia lɛ, ebaasa wɔŋwɛi Tsɛ ní mli hi waa lɛ hiɛ, ejaakɛ “tsuijurɔnaa halɔ Nyɔŋmɔ sumɔɔ.”—2 Kor. 9:7.