Buu Ohenilee He
1. Mɛni ji afi 2013 sɔɔmɔ afi lɛ gbi kome kpee krɛdɛɛ lɛ saneyitso, ni mɛɛ yiŋtoo yɔɔ kpee lɛ sɛɛ?
1 Wɔkɛ shihilɛi ni baanyɛ aha wɔfite wɔhenilee lɛ kpeɔ daa gbi. No hewɔ ni afi 2013 sɔɔmɔ afi lɛ gbi kome kpee krɛdɛɛ lɛ hiɛ saneyitso ni ji “Buu Ohenilee He” lɛ. (1 Tim. 1:19) Ato kpee lɛ he gbɛjianɔ ni eye ebua wɔteŋ mɔ fɛɛ mɔ koni ekɛ hiɛdɔɔ asusu bɔ ni ekɛ nikeenii ni nɔ bɛ ni jɛ wɔ-Bɔlɔ lɛ ŋɔɔ nɛɛ tsuɔ nii ehaa lɛ he.
2. Mɛɛ sanebimɔi ni he hiaa abaaha hetoo yɛ kpee lɛ shishi?
2 Kwɛmɔ akɛ Obaana Saji Otii Nɛɛ Lo: Abaaha sanebimɔi titrii kpawo komɛi ni kɔɔ henilee he lɛ ahetoo yɛ kpee lɛ shishi, ni nomɛi nɛ:
• Mɛni baanyɛ ekɛ wɔhenilee awo oshara mli?
• Te wɔɔfee tɛŋŋ wɔtsɔse wɔhenilee lɛ?
• Mɛni wɔbaanyɛ wɔfee ni wɔkaye mɔ ko mɔ ko la yi sɔ̃?
• Te Biblia mli shishitoo mlai lɛ anɔjwɛŋmɔ kɛ amɛkɛ nitsumɔ haa anaa wɔ tɛŋŋ?
• Te wɔɔfee tɛŋŋ wɔkwa mɛi krokomɛi ahenilee awui ni wɔɔye lɛ?
• Oblahii kɛ oblayei bibii, te nyɛaafee tɛŋŋ nyɛmia nyɛhiɛ kɛ́ aanyɛ nyɛnɔ koni nyɛŋmɛɛ saji ahe kɛsaa?
• Mɛɛ jɔɔmɔi mɛi ni haa mumɔ krɔŋkrɔŋ lɛ kudɔɔ amɛhenilee lɛ náa?
3. Mɛni baaha wɔná kpee lɛ he sɛɛ?
3 Kɛ́ wɔha Yehowa ye ebua wɔ lɛ, wɔbaanyɛ wɔdamɔ mɔdɛŋ fɛɛ ni Satan bɔɔ koni efite wɔhenilee lɛ naa. Wɔŋwɛi Tsɛ ni yɔɔ suɔmɔ lɛ tsɔɔ Nyɔŋmɔ Wiemɔ lɛ kɛ esafo lɛ nɔ ekɛɔ wɔ akɛ: “Gbɛ lɛ nɛ! nyɛnyiɛa nɔ!” (Yes. 30:21) Kpee nɛɛ ji gbɛi ni Yehowa tsɔɔ nɔ etsɔɔ wɔ gbɛ lɛ ateŋ ekome. No hewɔ lɛ, tsɔ hiɛ oto gbɛjianɔ koni onyɛ ohi kpee lɛ shishi gbi muu lɛ fɛɛ. Bo kpee lɛ shishi nifeemɔi lɛ atoi jogbaŋŋ, ni osusu bɔ ni ooofee okɛtsu nii yɛ bo diɛŋtsɛ oshihilɛ mli lɛ he. Nyɛfea ekome akɛ weku kɛgbaa kpee lɛ he sane. Kɛ́ wɔkɛ nibii ni abaatsɔɔ wɔ lɛ tsu nii lɛ, ebaawaje wɔ koni wɔya nɔ ‘wɔhiɛ henilee kpakpa,’ ni ebaaye ebua wɔ koni Satan je lɛŋ ŋɔɔmɔyelii ni hiɔ shi be kukuoo ko lɛ akaha wɔkplaŋ kɛjɛ gbɛ lɛ nɔ.—1 Pet. 3:16.