Ná Odeŋmegbomɔ lɛ He Miishɛɛ
1. Mɛni nyɛɔ ehaa ekãa ni wɔyɔɔ yɛ sɔɔmɔ nitsumɔ lɛ mli lɛ nɔ gbɔɔ?
1 Afee gbɔmɔ koni ená ‘edeŋmegbomɔ lɛ he miishɛɛ.’ (Jaj. 2:24) Kɛlɛ, kɛ́ wɔnaaa yibii ni wɔsɔɔmɔ nitsumɔ lɛ woɔ lɛ, nijiaŋwujee baanyɛ aha wɔmiishɛɛ atã, ni ekãa ni wɔyɔɔ lɛ nɔ baagbɔ. Mɛni baanyɛ aye abua wɔ koni wɔná jwɛŋmɔ ni ja?
2. Mɛni hewɔ esa akɛ wɔná gbɛkpamɔi ni sa yɛ bɔni mɛi feɔ amɛnii amɛhaa yɛ wɔsɔɔmɔ nitsumɔ lɛ he lɛ he?
2 Ná Gbɛkpamɔi ni Sa: Kaimɔ akɛ eyɛ mli akɛ mɛi fioo ko pɛ kpɛlɛ Yesu sane lɛ nɔ moŋ, shi ekã shi faŋŋ akɛ esɔɔmɔ nitsumɔ lɛ ye omanye. (Yoh. 17:4) Yɛ Yesu abɛbua ni kɔɔ nidulɔ lɛ he lɛ mli lɛ, Yesu gba akɛ mɛi babaoo atsuii ekpɛlɛŋ Maŋtsɛyeli lɛ he sane ni tamɔ dumɔwui lɛ anɔ. (Mat. 13:3-8, 18-22) Fɛɛ sɛɛ lɛ, mɔdɛŋ ni wɔbɔɔ lɛ nyɛɔ ewoɔ yibii babaoo.
3. Mɛɛ gbɛ nɔ wɔtsɔɔ wɔwoɔ yibii kɛ́ mɛi fioo ko pɛ boɔ wɔshiɛmɔ lɛ toi?
3 Bɔni Wɔfeɔ Wɔwoɔ Yibii Pii: Taakɛ Yesu abɛbua lɛ tsɔɔ lɛ, mɛi ni hereɔ sane lɛ nɔ lɛ ‘baawo yibii.’ (Mat. 13:23) Kɛ́ ŋmaa kwɛ̃ ni eda lɛ, yibii ni ewoɔ lɛ jeee ŋmaa ko kɛkɛ, shi dumɔwui hee hu. No hewɔ lɛ, jeee kaselɔi heei ni Kristofoi ni yeɔ omanye lɛ náa lɛ kɛkɛ ji yibiiwoo lɛ, shi moŋ dumɔwui babaoo ni amɛyaa nɔ amɛduɔ kɛtsɔ Maŋtsɛyeli lɛ he sane ni amɛshiɛɔ lɛ nɔ lɛ hu fata he. Miishɛɛ babaoo jɛɔ enɛ mli kɛbaa, ni no haa kɛ́ mɛi kpɛlɛ wɔsane lɛ nɔ jio amɛkpɛlɛɛɛ nɔ jio lɛ, wɔtsui nyɔɔ wɔmli. Wɔmiiye wɔmiibua kɛtse Yehowa gbɛ́i lɛ he. (Yes. 43:10-12; Mat. 6:9) Wɔnuɔ he akɛ eji hegbɛ kpele ni wɔná akɛ wɔji Nyɔŋmɔ hefatalɔi nitsulɔi. (1 Kor. 3:9) Yehowa mii shɛɔ yibii ni ‘wɔnaabui’ woɔ nɛɛ ahe waa.—Heb. 13:15, 16.
4. Mɛɛ yibii wɔsɔɔmɔ nitsumɔ lɛ baanyɛ awo ni wɔleee?
4 Kɛfata he lɛ, ekolɛ wɔdeŋmegbomɔ lɛ miiwo yibii komɛi po ni wɔleee. Ŋwanejee ko bɛ he akɛ mɛi ni bo Yesu shiɛmɔ lɛ toi lɛ ekomɛi batsɔmɔ ekaselɔi beni egbe eshikpɔŋ nɔ sɔɔmɔ lɛ naa lɛ sɛɛ. Nakai nɔŋŋ hu ekolɛ, Maŋtsɛyeli dumɔwui ni wɔduɔ lɛ ekwɛ̃ŋ yɛ mɔ lɛ tsuiŋ amrɔ nɔŋŋ kɛyashi be ko, ni ekolɛ mɔ lɛ baaba anɔkwale lɛ mli po ní wɔleee. Anɔkwa, wɔsɔɔmɔ nitsumɔ lɛ tsuɔ nibii babaoo diɛŋtsɛ. No hewɔ lɛ, nyɛhaa wɔyaa nɔ ‘wɔwoa yibii pii’ ni wɔkɛtsɔɔ akɛ Yesu kaselɔi ji wɔ.—Yoh. 15:8.