Kɛ́ Aha Bo Oshikpɔŋkuku lɛ, Ani Ebaaye Ebua Bo?
1. Mɛni ji shikpɔŋkuku ni akɛhaa shiɛlɔ ko lɛ?
1 Mɛni ji shikpɔŋkuku ni akɛhaa shiɛlɔ ko lɛ? Eji asafo lɛ shikpɔŋkuku lɛ fã bibioo ko ni bei pii lɛ akɛwo Territory Map Card (S-12) wolo lɛ nɔ, ní akɛhaa shiɛlɔ ko koni etsu mli nii lɛ. Akɛ gbɛjianɔtoo nɛɛ tsuɔ nii yɛ asafoi ni amɛshikpɔŋkuku lɛ dara waa lɛ amli. Eji shikpɔŋkuku ni akɛha bo, ekolɛ nɔ ni bɛŋkɛ he ni oyɔɔ. Akɛ shikpɔŋkuku lɛ haa bo koni otsu mli nii kɛyashi be ko. Kɛ́ fee lɛ, esa akɛ oha sɔɔlɔ ni kwɛɔ shikpɔŋkuku lɛ nɔ lɛ ale he ni otsu oshikpɔŋkuku lɛ mli nii kɛshɛ. Ato Wɔhe Gbɛjianɔ wolo lɛ, baafa 103 lɛ tsɔɔ mli akɛ: “Kɛji ákɛ oyɛ bo diɛŋtsɛ oshikpɔŋkuku ni bɛŋkɛ bo bɔ ni sa lɛ, ebaaha oná be babaoo ni okɛshiɛ. Agbɛnɛ hu, obaasumɔ ni ofɔ̃ nine otsɛ́ shiɛlɔ kroko koni ekɛ bo atsu nii yɛ bo diɛŋtsɛ oshikpɔŋkuku lɛ mli.”
2. Mɛɛ gbɛ nɔ obaanyɛ okɛ shikpɔŋkuku ni akɛha bo lɛ afĩ oshiɛmɔyaa kuu lɛ sɛɛ?
2 Koni Akɛfi Shiɛmɔyaa Kuu lɛ Gbɛjianɔtoo Kɛha Shiɛmɔyaa lɛ Sɛɛ: Kɛ́ aha bo shikpɔŋkuku ni bɛŋkɛ onitsumɔhe lɛ, obaanyɛ oyashiɛ kɛ́ nyɛba shwane hejɔɔmɔ loo okɛ shiɛlɔ kroko ni nitsumɔhe bɛŋkɛ onitsumɔhe lɛ aya shiɛmɔ dani oya shĩa. Kɛ́ aha bo shikpɔŋkuku ni bɛŋkɛ oshĩa lɛ, bo kɛ oweku baanyɛ atsu gbɛkɛnaashi odaseyeli yɛ mli. Shi kɛ́ oyanyɛɛɛ kpee kɛha shiɛmɔ oya lɛ, ehe baahia ni osɔle kɛbi Yehowa dɛŋ gbɛtsɔɔmɔ dani oje shiɛmɔ lɛ shishi. (Fil. 4:6) Kɛfata he lɛ, esa akɛ oŋmɛ pɛpɛɛpɛ yɛ be ni okɛtsuɔ oshikpɔŋkuku lɛ mli nii lɛ kɛ be ni okɛfiɔ asafo lɛ gbɛjianɔ ni eto kɛha kuu lɛ shiɛmɔyaa lɛ sɛɛ lɛ mli. Titri lɛ, yɛ otsi lɛ naagbee, beni mɛi babaoo kpeɔ kɛha shiɛmɔyaa lɛ, esa jogbaŋŋ akɛ obaafata oshiɛmɔyaa kuu lɛ he kɛya shiɛmɔ.
3. Mɛɛ sɛɛnamɔi yɔɔ bo diɛŋtsɛ oshikpɔŋkuku ni ahaa bo lɛ he?
3 Sɛɛnamɔi: Kɛ́ aha bo shikpɔŋkuku lɛ, belɛ oyɛ he ni obaanyɛ oshiɛ yɛ be fɛɛ be ni obe baaŋmɛ bo gbɛ. Akɛni ehe ebahiaŋ ni onyiɛ kakadaŋŋ dani oshɛ he ni akpeɔ yɛ kɛha shiɛmɔyaa lɛ hewɔ lɛ, obaanyɛ oná bei pii kɛshiɛ. Enɛ haa mɛi babaoo kɛ amɛhe woɔ gbɛgbalɔi awamɔ loo daa gbɛgbamɔ nitsumɔ lɛ mli. Akɛni mɛi ni onine shɛɔ amɛnɔ yɛ shĩai lɛ yɛ okutso lɛŋ nɔŋŋ hewɔ lɛ, ewaaa akɛ obaaku osɛɛ oyasara amɛ koni okɛ amɛ afee Biblia mli nikasemɔ. Mɛi babaoo eyɔse akɛ, kɛ́ amɛshiɛ yɛ amɛshikpɔŋkuku lɛ mli lɛ, eyeɔ ebuaa amɛ ni amɛleɔ mɛi ni yɔɔ shikpɔŋkuku lɛ mli lɛ jogbaŋŋ ni mɛi nɛɛ nyɛɔ amɛmuɔ amɛfɔ̃ɔ shiɛlɔi lɛ anɔ, titri lɛ kɛ́ shiɛlɔ lɛ baanyɛ atsu shikpɔŋkuku lɛ mli nii fɛɛ fe shi kome dani ekɛha koni mɛi krokomɛi abi. Ani shikpɔŋkuku ni abaaha bo lɛ baaye abua bo kɛ oweku lɛ koni nyɛnyɛ nyɛye odase jogbaŋŋ kɛmɔ shi?—2 Tim. 4:5.