Nyɛkasea Gbalɔi Lɛ—Yona
1. Mɛɛ sui kpakpai komɛi Yona yɔɔ?
1 Mɛni baa ojwɛŋmɔŋ kɛ́ osusu gbalɔ Yona he? Mɛi komɛi baana lɛ akɛ gbeyeilɔ loo mɔ ko ni yitsoŋ wa. Kɛlɛ, ejie heshibaa, ekãa, kɛ hekɛ-afɔleshãa mumɔ kpo. Mɛɛ gbɛ nɔ wɔbaanyɛ ‘wɔkase’ Yona sui kpakpai nɛɛ?—Yak. 5:10.
2. Mɛɛ gbɛ nɔ wɔbaanyɛ wɔkase Yona heshibaa lɛ?
2 Heshibaa: Shishijee lɛ Yona jo foi kɛtee he ko ni kɛ shikpɔŋkuku mli ni atsu lɛ lɛ bɛŋkɛɛɛ kwraa. Enɛ bɛ naakpɛɛ ejaakɛ Ashurbii lɛ ayi wa waa, ni abale Ninive akɛ “láshishwiemɔ maŋ.” (Nah. 3:1-3) Kɛlɛ, Yehowa gbala Yona toi, ni Yona ba ehe shi ni ekpɛlɛ nitsumɔ ni akɛwo edɛŋ lɛ nɔ beni aha lɛ hegbɛ lɛ ekoŋŋ lɛ. (Abɛi 24:32; Yona 3:1-3) Eyɛ mli akɛ shishijee lɛ ejo foi moŋ, shi efee Yehowa suɔmɔnaa nii. (Mat. 21:28-31) Ani wɔ hu wɔtswa wɔfai shi nakai nɔŋŋ akɛ wɔbaashiɛ sanekpakpa lɛ kɛ́ agbala wɔtoi loo wɔshikpɔŋkuku lɛ mli nitsumɔ bɛ mlɛo?
3. Mɛɛ osɔɔmɔ lɛ fãi komɛi ebaabi ni oná ekãa kɛ hekɛ-afɔleshãa?
3 Ekãa kɛ Hekɛ-afɔleshãa: Beni Yona na akɛ yiŋ fɔŋ ni eto lɛ kɛ amlakui lɛ awala ewo oshara mli lɛ, ejɛ esuɔmɔ mli akɛ ekɛ ewala baashã afɔle. (Yona 1:3, 4, 12) Sɛɛ mli beni etsuɔ nitsumɔ ni akɛwo edɛŋ yɛ Ninive lɛ he nii lɛ, ekpeleke shi kɛtee maŋ lɛ teŋ tuuntu, ekolɛ eetao he ni hi jogbaŋŋ koni ejaje Yehowa fɔbuu kojomɔ lɛ. Jeee gbeyeilɔi anifeemɔ nɛ, shi moŋ eji Nyɔŋmɔ gbalɔ ni yɔɔ ekãa nifeemɔ! (Yona 3:3, 4) Ni wɔ mɛi ni wɔyɔɔ ŋmɛnɛ lɛ hu? Ekãa ni jɛ Nyɔŋmɔ ŋɔɔ he miihia bɔni afee ni wɔnyɛ wɔye odase kɛ́ wɔkɛ shiteekɛwoo kpe. (Bɔf. 4:29, 31) Hekɛ-afɔleshãa he miihia bɔni afee ni wɔnyɛ wɔkɛ wɔbe kɛ wɔnibii ashã afɔle yɛ shiɛmɔ nitsumɔ lɛ mli.—Bɔf. 20:24.
4. Mɛni hewɔ esa akɛ wɔhe be kɛjwɛŋ nɔkwɛmɔnii kpakpai ni Yehowa gbalɔi lɛ fee lɛ anɔ lɛ?
4 Be fɛɛ be ni obaakane nɔ ko yɛ Yehowa gbalɔi lɛ ateŋ mɔ ko he lɛ, obaaná he sɛɛ kɛ́ ofee ohe mfoniri akɛ oyɛ amɛshihilɛ mli. Bi ohe akɛ: ‘Kɛ́ mi ni lɛ te mafee minii maha tɛŋŋ? Mɛɛ gbɛ nɔ matsɔ majie esui kpakpai lɛ akpo yɛ mishihilɛ mli?’ (Heb. 6:11, 12) Saji krokomɛi ni akɛbaawo Wɔ Maŋtsɛyeli Sɔɔmɔ lɛ mli wɔsɛɛ lɛ baawie nikasemɔi ni he hiaa ni wɔbaanyɛ wɔkase kɛjɛ Yehowa gbalɔi anɔkwafoi krokomɛi ahe.